¹ ۔ آسا دی بادشاہی دے چھتیویں ورھے شاہ اسرائیل بعشا نے یہودہ تے حملہ کیتا تے رامہ نوں اُساریا ۔ تاں جو کوئی بندہ شاہ یہودہ آسا دے کول آ جا نہ سکے ۔ ² ۔ تد آسا نے خدا وند دے گھر دے خزانے تے بادشاہ دے گھروں چاندی تے سونا کڈھیا ۔ تے ارام دے بادشاہ بن ہدد دے کول جیہڑا دمشق وچ رہندا سی گھلیا تے آکھیا ۔ ³ ۔ کہ میرے تے تیرے وچ تے میرے پیو تے تیرے پیو وچ عہد اے ۔ تے ویکھ میں تینوں چاندی تے سونا گھلدا ہاں ۔ تاں توں آ ۔ تے اپنے عہد نوں تروڑ دے جیہڑا اسرائیل بعشا دے نال اے ۔ تاں جو اوہ میرے کولوں دی چلا جاوے ۔ ⁴ ۔ تے بن بدد نے آشا بادشاہ دی گل نوں نہ منیا ۔ تے لشکراں دے سرداراں نوں اسرائیل دے شہراں ول بھیجیا ۔ تے اوہناں نے عیون تے دان آہل مائم تے نفتالی دے اکٹھ دے سارے شہراں نوں ماریا۔ ⁵ ۔ جدوں بعشا نے سنیا تاں رامہ دی اساری توں رُکیا تے کم بند کیتا ۔ ⁶ ۔ تد آسہ بادشاہ نے سارے یہودہ نوں لتا تاں اوہ رامہ دیاں پتھراں تے لکڑاں نوں جنہاں نال بعشا اُساری کر رہیا سی لے گئے تے اوہناں نے اوہدے نال جبع تے مصفہ نوں اُساریا ۔ ⁷ ۔ اُس ویلے حنانی غیب بین آسا بادشاہ دے کول آیا تے آکھیا ۔ کیوں جو توں شاہ ارام تے وساہ کیتا ۔ تے خدا وند اپنے خدا تے توکل نہ کیتا ۔ ایس لئی شاہ ارام دا لشکر تیرے ہتھوں بچ گیا ۔ ⁸ ۔ کیہ کوشیاں تے لوبیاں دا بہت وڈا لشکر بہتیاں گڈیاں تے سواراں نال نہیں سی ؟ پر جدوں توں خدا وند تے توکل کیتا ۔ اوہنے اوہناں نوں تیرے ہتھ وچ دے دتا ۔ ⁹ ۔ کیوں جو خدا وند دیاں اکھاں ساری زویں تے پھردیاں رہندیاں نیں ۔ تاں جو اوہناں نوں طاقت بخشے جیہڑے اوہدے حضور کامل دل نیں ۔ تاں ایہدے وچ توں بے وقوفی کیتی ۔ کیوں جو ہن توں تیرے خلاف لڑائیاں ہون گیاں ۔ ¹⁰ ۔ تد آسا اُس غیب بین توں ناراض ہویا ۔ تے اوہنوں بندی وان بنایا ۔ کیوں جو ایس گل پاروں اوہ اوہدے اُتے غضب ناک ہویا ۔ تے اُس ویلے آسا نے لوکاں وچوں کئی اک تے ظلم کیتا ۔ ¹¹ ۔ تے آسا دا پہلا تے پچھلا حال اسرائیل تے یہودہ دیاں کتاباں وچ لکھیا ہویا اے ۔ ¹² ۔ تے آسا دی بادشاہی دے انتالیویں ورھے وچ اوہدے پیراں وچ بماری ہوئی ۔ تے اوہ بماری بہت ودھی ۔ پر اوہنے اپنی بماری وچ وی خدا وند نوں نہیں سگوں حکیماں نوں لبھیا ۔ ¹³ ۔ تے آسا اپنے پیو دادے نال سوں گیا ۔ تے اپنی بادشاہی دے اکتالویئیں ورھے مر گیا۔ ¹⁴ ۔ تے اپنے اُس مزار وچ دبیا گیا جیہڑا اوہنے اپنے لئی دائود دے شہر وچ اُساریا سی ۔ تےاوہناں نے اوہنوں پلنگ تے رکھیا جیہڑا خوشبو بنان آلیاں دی گاری گری دیاں مشکاں تے ون سونے عطراں نال بھریا ہویا سی ۔ تے اوہناں نے اُس لئی بہت وڈی اگ بالی ۔