¹ ۔ تے خدا وند دی روح عزریاہ بن عودید تے لتھی ۔ ² ۔ تاں اوہ آسا نوں ملن لئی باہر آیا تے اوہنوں آکھیا ۔ اے آسا تے سارا یہودہ تے بنیامین میری سنو ۔ خدا وند تہاڈے نال اے ۔ جدوں تیکر پئی تسیں اوہدے نال او۔ جے تسیں اوہنوں لبھو گے تاں لبھ لوو گے ۔ تے جے تسیں اوہنوں چھڈو گے تاں اوہ وی تہانوں چھڈ دے گا ۔ ³ ۔ تے اسرئیل چوکھے دناں تیکر بناں سچے خدا دے تے بناں سکھان آلے کاہن دے تے بناں شریعت دے رہیا ۔ ⁴ ۔ پر جدوں اوہناں نے خدا ول رجوع کیتا ۔ تے اوہنوں لبھیا تاں اوہنوں لبھ لتا ۔ ⁵ ۔ تے اوہناں دناں وچ باہر جان آلے تے اندر آن آلےدی سلامتی نہیں سی ۔ سگوں سارے دیس واسی ڈاہڈے بے چین سن ۔ ⁶ ۔ گوت گوت نال تے شہر شہر نال لڑیا ۔ کیوں جو خدا وند نے اوہناں نوں مصیبت نال بے چین کیتا ۔ ⁷ ۔ پر تسیں پکے او تے اپنے ہتھاں نوں ڈھلا نہ ہوون دیو ۔ کیوں جو تہاڈے کم دا اجر ملے گا ۔ ⁸ ۔ جدوں آسا نے عزریاہ بن عودید نبی دی نبوت دیاں ایہناں گلاں نوں سنیا ۔ اوہنے بہادری کیتی ۔ تے اوہنے یہودہ تے بنیا مین دے سارے دیس توں تے اوہناں شہراں وچوں مکروہات نوں دور کیتا ۔ جیہڑے اوہنے افرائیم پہاڑ توں لتے سن ۔ تے خدا وند دے اُس مذبح نوں نویں سریوں بنایا جیہڑا خدا وند دے برانڈے اگے سی ۔ ⁹ ۔ تے اوہنے سارے یہودہ تے بنیامین نوں تے اوہناں پر دیسایاں نوں کٹھا کیتا جیہڑے افرائیم تے منسے تے شمعون وچوں اوہدے نال سن ۔ کیوں جو جدوں اوہناں ویکھیا پئی خدا وند اوہدا خدا اوہدے نال اے ۔ تاں اسرئیل وچ بہتے اوہدے کول آئے ۔ ¹⁰ ۔ تاں آسا دی بادشاہی دے پندرھویں ورھے دے تیجے مہینے وچ اوہ سارے یروشلینم وچ کٹھے ہوئے ۔ ¹¹ ۔ تے اُس دن اوہناں لٹ دیاں چیزاں وچوں جیہڑیاں اوہ اپنے نال لیائے سن ست سو بلد تے ست ہزار بھیڈاں خدا وند لئی کوہیاں ۔ ¹² ۔ تے اوہناں عہد کیتا پئی اوہ خدا وند اپنے پیو داداے دے خدا نوں اپنے سارے دل تے اپنی ساری جان نال لبھن گے ۔ ¹³ ۔ تے جو کوئی خدا وند اسرائیل دے خدا نوں نہیں ڈھونڈے گا قتل کیتا جاوے گا کیہ وڈا کیہ نکا ۔ کیہ مرد کیہ زنانی ۔ ¹⁴ ۔ تے اوہناں نے اچی واج تے خوشی دے للکار تے نرسنگیاں تے ونجھلیاں نال خدا وند دی سونہہ کھادی ۔ ¹⁵ ۔ تے سارا یہودہ اُس سونہہ توں خوش ہویا ۔ کیوں جو اوہناں سارے دل نال سونہہ کھادی ۔ تے پورے گوہ نال اوہنوں ڈھونڈا ۔ تے اوہنوں لبھ لتا ۔ تے خدا وند نے اوہناں نوں چونہاں پاسیوں ارام بخشیا ۔ ¹⁶ ۔ تے آسا بادشاہ دی ماں معکہ توں اوہنے ملکہ دا لقب ہٹا دتا ۔ کیوں جو اوہنے عشیرہ دی نفرت کرن آلی مورتی بنائی سی ۔ تاں آسا نے اُس مورتی نوں تروڑیا ۔ تے اوہنوں چور چور کیتا ۔ تے وادی قدرون وچ اوہنوں ساڑ چھڈیا ۔ ¹⁷ ۔ پر اچیاں تھانواں اسرائیل کولوں دور نہ کیتیاں گیاں ۔ فیر وی آسا دا دل اوہدےسارے دناں وچ کامل سی ۔ ¹⁸ ۔ تے اوہ اپنے پیو دیاں متھیاں ہویاں شیواں چاندی دیاں تے سونے دیاں تے بھانڈے خدا دے گھر وچ لیایا ۔ ¹⁹ ۔ تے آسا دی بادشاہی دے پینتیویں ورھے تیکر فیر لڑائی نہ ہوئی ۔ ¹⁸ ۔ تے اوہ اپنے پیو دیاں متھیاں ہویاں شیواں چاندی دیاں تے سونے دیاں تے بھانڈے خدا دے گھر وچ لیایا ۔ ¹⁹ ۔ تے آسا دی بادشاہی دے پینتیویں ورھے تیکر فیر لڑائی نہ ہوئی ۔