¹ ۔ یار بعام بادشاہ دے اٹھارویں ورھے وچ ابی یاہ یہودہ دا بادشاہ بنیا ۔ ² ۔ اوہنے یروشلیم وچ تن ورھے بادشاہی کیتی ۔ اوہدی ماں دا ناں معکہ سی ۔ جیہڑی جبعہ دے اوری ایل دی دھی سی ۔ تے ابی یاہ تے یار بعام وچ لڑائی ہوئی ۔ ³ ۔ تے ابی یاہ چار لکھ متھے ہوئے جنگی بہادراں دے لشکر نال لڑائی نوں نکلیا ۔ تے یار بعام نے اٹھ لکھ بہادر تے دلیر مرداں نال صف بدھی ۔ ⁴ ۔ تے ابی یاہ صمارائم دے پہاڑ تے کھلویا ۔ جیہڑا کوہستان افرائیم وچ اے ۔ تے آکھیا ۔ اے یار بعام تے کُل اسرائیل میری گل سنو ۔ ⁵ ۔ کیہ تسیں نہیں جاندے ؟ پئی خدا وند اسرائیل دے خدا نے اسرائیل دی بادشاہی دائود نوں تے اوہدے پتراں نوں ابد تیکر لُون دے عہد نال عطا کیتی ۔ ⁶ ۔ تے سلیمان بن دائود دے خادم نباط دے پتر یار بعام نے اُٹھ کے اپنے آقا دے خلاف بغاوت کیتی ۔ ⁷ ۔ تے اوہدے کول نکمے خبیث لوک کٹھے ہوئے ۔ تے حبعام بن سلیمان دے خلاف غلبہ کیتا کیوں جو رحبعام حالی منڈا کمزور دل آلا سی ۔ تے اوہناں دے ساہمنے ٹک نہ سکیا ۔ ⁸ ۔ تے تسیں ہن خیال کردے او۔ کہ تسیں خدا وند دی بادشاہی دے اگے کھلوتے رہوو گے جیہڑی بنی دائود دے ہتھ وچ اے ۔ تے تسیں وڈا اکٹھ او۔ تے تہاڈے نال سونے دے میمنے نیں ۔ جنہاں نوں یار بعام نے تہاڈے لئی معبود بنایا ۔ ⁹ ۔ کیہ تساں خدا وند دے کاہناں بنی ہارون تے لاویاں نوں کڈھ نہ دتا ؟ تے دیساں دیاں قوماں وانگوں اپنے لئی کاہن بنائے ۔ کہ جو کوئی اک بلد تے ست بھیڈو لے کے اپنے ہتھ دی تقدیس کرن نوں آیا ۔ اوہ اوپرے معبوداں دا کاہن بنیا ۔ ¹⁰ ۔ پر خدا وند ساڈا ای خدا اے ۔ تے اساں اوہنوں نہیں چھڈیا ۔ تے کاہن جیہڑے خدا وند دی سیوا لئی متھے گئے ۔ اوہ بنی ہارون نیں تے لاوی اپنے کم تے نیں ۔ ¹¹ ۔ تے اوہ ہر سویر تے ہر شام نوں خدا وند لئی سوختنی قربانیاں تے مشک آلے بخور چڑھاندے نیں ۔ تے نذر دیاں روٹیاں پاک میز تے رکھیاں جاندیاں تے سونے دے شمع دان دے دیوے ہر شام نوں بالے جاندے نیں ۔ کیوں جو اسیں خدا وند اپنے خدا دے حکماں تے قائم ہاں ۔ پر تساں اوہنوں چھڈ دتا اے ۔ ¹² ۔ تے ویکھو خدا وند ساڈے نال ساڈا پیشوا اے ۔ تے اوہدے کاہن وی جیہڑے پھوکن آلے نرسنگے لتے ہوئے تہاڈے خلاف پھوکدے نیں ۔ اے بنی اسرائیل تسیں خدا وند اپنے پیو دادے دے خدا نال لڑائی نہ کرو ۔ کیوں جو تسیں کامیاب نہیں ہووو گے ۔ ¹³ ۔ پر یار بعام نے پھر کے کمین بٹھائی ۔ پئی اوہناں دے پچھوں دی آون ۔ سو اوہ یہودہ دے سامنے سن تے کمین اوہناں دے پچھے سی ۔ ¹⁴ ۔ تے یہودہ نے پچھے نظر کیتی تاں ویکھو لڑائی اوہناں دے اگوں تے اوہناں دے پچھوں دی سی ۔ تد اوہ خدا وند دے کول چیکے تے کاہناں نے نرسنگیاں نال شور مچایا ۔ ¹⁵ ۔ یہودہ دے بندے للکارے تے یہودہ دے بندیاں دی للکار ویلے خدا نے یار بعام نوں تے سارے اسرائیل نوں ابی یاہ تے یہودہ دے سامنے ماریا ۔ ¹⁶ ۔ تاں بنی اسرائیل یہودہ دے ساہمنیوں نسے تے خدا نے اوہناں نوں اوہناں دے ہتھ وچ کر دتا ۔ ¹⁷ ۔ تد ابی یاہ تے اوہدے لوکاں نے وڈا خون خرابہ کیتا ۔ تے اسرائیل وچوں پنج لکھ متھے ہوئے بندے قتل ہو کے ڈگے ۔ ¹⁸ ۔ سو اُس ویلے بنی اسرائیل مغلوب ہوئے تے بنی یہودہ غالب آئے ۔ کیوں جو اوہناں نے خدا وند اپنے پیو دادا دے خدا تے بھروسہ کیتا ۔ ¹⁹ ۔ تے ابی یاہ نے یار بعام دا پچھا کیتا ۔ تے اُس کولوں شہر لے لتے بیت ایل تے اوہدے پنڈ تے مشانہ تے اوہدے پنڈ تے عفرائن تے اوہدے پنڈ ۔ ²⁰ ۔ تے ایہدے مگروں ابی یاہ دے دناں وچ یار بعام نے زور نہ پھڑیا۔ تے خدا وند نے اوہنوں ماریا تے اوہ مر گیا ۔ ²¹ ۔ تے ابی یاہ زور آور ہویا ۔ تے اوہنے چوداں بیویاں کیتیاں ۔ تے اوہدے باوی پتر تے سولہ دھیاں جمیاں ۔ ²² ۔ تے ابی یاہ دا ہور حال تے اوہدے طریقے تے اوہدے قول عدو نبی دی تفسیر وچ لکھے ہوئے نیں ۔ ¹⁹ ۔ تے ابی یاہ نے یار بعام دا پچھا کیتا ۔ تے اُس کولوں شہر لے لتے بیت ایل تے اوہدے پنڈ تے مشانہ تے اوہدے پنڈ تے عفرائن تے اوہدے پنڈ ۔ ²⁰ ۔ تے ایہدے مگروں ابی یاہ دے دناں وچ یار بعام نے زور نہ پھڑیا۔ تے خدا وند نے اوہنوں ماریا تے اوہ مر گیا ۔ ²¹ ۔ تے ابی یاہ زور آور ہویا ۔ تے اوہنے چوداں بیویاں کیتیاں ۔ تے اوہدے باوی پتر تے سولہ دھیاں جمیاں ۔ ²² ۔ تے ابی یاہ دا ہور حال تے اوہدے طریقے تے اوہدے قول عدو نبی دی تفسیر وچ لکھے ہوئے نیں ۔