¹ ۱۔ پیاریو! ہر اِک رُوح اُتے یَقِین ناکرو سگوں رُوحاں نُوں پرکھو پئی اوہ رَب وَلوں ہے نیں کہ نئیں کیوں جو بتھیرے جھُوٹھے نبی جَگ وِچ اُٹھ کھلوتے نیں۔ ² ۲۔تُسیں ایس گَل توں رَب دے رُوح نُوں سنجھان سکدے مطلب کہ ہر اوہ رُوح جیہڑی مَن دی اے پئی یِسُوع مسِیح رَب وَلوں جُسّے وِچ آیااے۔ ³ ۳۔اَتے جیہڑی رُوح یِسُوعؔ نُوں نا مَنے اور رَب وَلوں نئیں سگوں ایہو ای مُخالفِ مسِیح دی رُوح اے جَہدی خَبر تُسیں سُن بیٹھے او پئی اوہ آون والی اے سگَوں پہیلاں ای جَگ وِچ موجُود اے۔ ⁴ ۴۔بچیو! تُسیں رَب توں جے اَتے اوہناں نُوں چِت کر بیٹھے او کیوں جو جیہڑا تُہاڈےوِچ اے اوہ اوہدے توں وَڈا اے جیہڑا جَگ وِچ وے۔ ⁵ ۵۔اوہ جَگ دے نیں ایسے ماریاں جَگ دی گَل کردی نیں اَتے جَگ اُوہناں دی سُن دا اے۔ ⁶ ۶۔ اَسیں رَب توں آں۔ جیہڑا رَب نُوں جان دا اے اوہ اَساڈی گَل سُن دا اے اَتے جیہڑارَب توں نئیں اوہ اَساڈی نئیں سُن دا۔ ایسے گَل توں اَسیں حَق دے رُوح تے گُمراہی دی رُوح نُوں سنجھان لینے آں۔ ⁷ ۷۔پیاریو! آو اَسیں آپو وِچ پرِیت رَکھیئے کیوں جو مُحبت رَب توں اے اَتے جیہڑا پرِیت رکھدا اے اوہ رَب توں جَمیا اے اَتے رَب نُوں جان دا اے۔ ⁸ ۸۔جیہڑا مُحبت نئیں رکھدا اوہ رَب نُوں نئیں جان دا ایس لئی پئی رَب مُحبت اے۔ ⁹ ۹۔جیہڑی مُحبت رَب نُوں اَساڈے نال اے اوہ ایس گَل توں ظاہر ہوئی پئی رَب نے اپنے اَکلے پُتر نُوں جَگ اُتے گھلیا اے تاں جو اَسیں اوہدی راہِیں حیاتی پائِیے۔ ¹⁰ ۱۰۔مُحبت ایس گَل وِچ نئیں پئی اَساں رَب نال مُحبت کیِتی سَگوں ایس گل وِچ ایہ پئی اوہنے اَساڈے نال مُحبت کیِتی اَتے اپنے پُتر نُوں گھلیا پئی اوہ اَساڈے پاپاں دا کفارہ ہووے۔ ¹¹ ۱۱۔پیاریو! جد رَب نے اَساڈے نال اجیہی مُحبت رکھی تے چاہیدا اے پئی اَسیں وی اِک دُوجے نال مُحبت کرئیے۔ ¹² ۱۲۔ رَب نُوں کَدی کِسے نے نئیں ویکھیا جے اَسیں اِک دُوجے نال مُحبت کرئِیے تے رَب اَساڈے وِچ وَسدا اےاَتے اَساڈے وِچ جیہڑی اوہدی مُحبت اے توڑ چَڑھ گَئی اے۔ ¹³ ۱۳۔اَسیں ایسے گَل توں جاننے آں پئی اَسیں اوہدے وِچ وَسنے آں اَتے اوہ اَساڈے وِچ کیوں جو اوہنے اپنے رُوح وِچوں ساہنوں دِتّا اے۔ ¹⁴ ۱۴۔ اَتے اَساں ویکھ لیا اے اَتے گَواہی دینے آں پئی باپ نے پُتر نُوں ایس لئی گَھلیا اے پئی جَگ دا مُنجّی ہووے۔ ¹⁵ ۱۵۔جیہڑا کوئی مَنے پئی یِسوعؔ رَب دا پُتر اے رَب اوہدے وِچ تے اوہ رَب وِچ وَسدا اے۔ ¹⁶ ۱۶۔ اَتے جیہڑی مُحبت رَب نُوں اَساڈے نال اے اَساں اوہنوں جان لیا اے اَتے ساہنوں اوہدا یَقین اے۔ ¹⁷ ۱۷۔ ایسے سببوں مُحبت اَساڈے وِچ توڑ چڑھ گَئی تاں جو اَسیں نیاں دے دیہاڑے دلیر رہِئیے کیوں جو جینج دا اوہ اے اَسیں وی ایس جَگ وِچ اونج دے ای آں۔ ¹⁸ ۱۸۔مُحبت وِچ ڈر نئیں ہوندا سَگوں کامِل مُحبت ڈر نُوں باہر کَڈ دیندی اے کیوں جو ڈر نال عذاب ہندا اے اَتے جیہڑا ڈر دا اے اوہدے وِچ پُوری مُحبت نئیں ہندی۔ ¹⁹ ۱۹۔سو اِسیں ایس ماریاں مُحبت کرنے آں کیوں جو اوہنے اَسادے نال پہیلاں مُحبت کیِتی سی۔ ²⁰ ۲۰۔جے کوئی آکھے پئی مَیں رَب نال مُحبت کرنا واں پَر اپنے ویِر نال وَیر رکھے تے جھُوٹھا اے کیوں جو جیہڑا اپنے بھرا نال جِنھوں اوہنے ویکھیا اے مُحبت نئیں کردا اوہ رَب نال وی جِنھوں اوہنے نئیں ویکھیا مُحبت نئیں کر سکدا۔ ²¹ ۲۱۔اَتے اَساں اوہدے کولوں ایہ حُکم پایا اے پئی جیہڑا رَب نال مُحبت رکھدا اے اوہ اپنے وِیر نال وی مُحبت کر دا۔