¹ ۱۔ویکھو باپ نے اَساڈے نال کینج دی مُحبت کیِتی اے پئی اَسیں رَب دے بچے اَکھوائے اَتے اَسیں ہیں وی آں۔جَگ ایسے ماریاں ساتھوں اَنجان اے کیوں جو اوہنے اوہنوں وی نئیں جانیا۔ ² ۲۔ پیاریو! ہُن اَسیں رَب دے بچے آں اَتے ہُن تِیک ظاہر نئیں ہویا پئی اَسیں کیِہ کُچھ ہوجاواں گے پر اَسیں ایہ جاننے آں پئی جد اوہ ظاہر ہووے گا تے اَسیں وی اوہدے ورگے ہو جاواں گے کیوں جو اوہنوں اونج دا ای ویکھاں گاے جِنج دا اوہ ہے وے۔ ³ ۳۔اَتے جیہڑا کوئی اوہدے اُتے ایہ آس رکھ دا اے اوہ اپنے آپ نُوں اونج دا ای پوِتِر رکھ دا اے جینج دا اوہ پَوِتِر اے۔ ⁴ ۴۔جو کوئی پاپ کَھٹ دا اے اوہ شرِیعت دی مخالفت کر دا اے کیوں جو پاپ شرِیعت دی مخالفت ای تے ہے۔ ⁵ ۵۔اَتے تُسیں ایہ جاندے او پئی اوہ ایس ماریاں ظاہر ہویا سی پئی پاپاں نُوں چُک لے جاوے پر اوہدے وِچ پاپ نئیں۔ ⁶ ۶۔جیہڑا کوئی اوہدے وِچ قیئم رہندا اے اوہ پاپ نئیں کَھٹ دا پَر جیہڑا کوئی پاپ کَھٹ دا اے نا تے اوہنے اوہنوں ویکھیا اے اَتے نا ای جانیا اے۔ ⁷ ۷۔بچیو! کوئی تُہانوں دوکھا نا دے سکے جیہڑا راست بازی دے کَم کردا اے اوہ راست باز اے۔ ⁸ ۸۔جیہڑا پاپ کَھٹ دا اے اوہ شیطان دا اے کیوں جو شیطان شُرُوع توں ای پاپ کَھٹ دا آیا اے۔رَب دا پُتر ایسے ماریاں ظاہر ہویا سی پئی شیطان دے کَماں نُوں مُکا دیوے۔ ⁹ ۹۔ جیہڑا رَب توں جَمیا اے اوہ پاپ نئیں کَھٹ دا۔ ایس لئی پئی اوہدا بیِہ اوہدے وِچ وَسدا اے اَتے اوہ پاپ نئیں کر سکدا کیوں جو رَب توں جَمیا اے۔ ¹⁰ ۱۰۔ایسے گَل توں رَب دے بچیاں اَتے شیطان دے بچیاں وِچ وَنڈ ہو جاندی اے۔ جیہڑا راست بازی دے کَم نہیں کردا اور رَب توں نئیں اَتے اوہ وی نئیں جیہڑا اپنے وِیر نال پرِیت نئیں رکھ دا۔ ¹¹ ۱۱۔ کیوں جو اوہ سُنیہا جیہڑا تُسیں شُرُوع توں سُن بیٹھے او ایہو ای اے پئی اَسیں آپو وِچ پرِیت رکھئیے۔ ¹² ۱۲۔اَتے قائِن ورگے نا بنئیے جیہڑا شرِیر دا سی اَتے جِنھے اپنے وِیر نُوں قَتْل کیِتا اَتے اوہنے اوہنوں کیوں قَتْل کیِتا؟ اوہ ایس لئی پئی اوہدے کَم بھیڑے سَن پَر اوہدے بھرا دے کَم راسْت سَن۔ ¹³ ۱۳۔ بھراو! جے جگ تُہاڈے نال وَیر رَکھے تے حیران نا ہوو۔ ¹⁴ ۱۴۔اِسیں تے جاننے آں پئی اَسیں موت کولوں چُھٹ کے حیاتی وِچ وَڑ گَئے کیوں جو اَسیں بھراواں نال پرِیت رَکھنے آں۔ جیہڑا پرِیت نئیں رکھدا اوہ موت دی حالت وِچ رہندا اے۔ ¹⁵ ۱۵۔جیہڑا اپنے وِیر نال وَیر رکھ دا اے اوہ قاتِل اے اَتے تُسیں جان دے او پئی کِسے قاتِل وِچ سَدا دی حیاتی قیئم نئیں رہندی۔ ¹⁶ ۱۶۔ اَساں محبَت نُوں ایسے گَل توں جانیا اے پئی اوہنے اَساڈے لئی اپنی جان دے دِتّی اَتے ایسے ماریاں ساہنوں وی اپنے بھراواں لئی جان دینی چاہیِدی اے۔ ¹⁷ ۱۷۔ جیس کِسے کول دُنیا دا مال ہووے اَتے اوہ اپنے وِیر نُوں ماہتڑ ویکھ کے رحم کرن توں کَنی کتراوے تے اوہدے وِچ رَب دی مُحبت کِینج قیئم رہ سکدی اے؟ ¹⁸ ۱۸۔ بچیو!اَسیں زبانی کلامی ای نئیں سَگوں عَمَل اَتے سچیائی دی رائِیں وی پرِیت نبھائِیے۔ ¹⁹ ۱۹۔ایس توں ایسی جاناں گے پئی حَق دے آں اَتے اَسیں اوہدے حُضُور دِلوں خُوش ہوواں گے۔ ²⁰ ۲۰۔کیوں جو جے اَساڈے دِل ساہنوں اِلزام دین تے رَب تے اَساڈے دِلاں توں وَڈا اے نا! اَتے سبھو کُچھ جان دا اے۔ ²¹ ۲۱۔ پیاریو! جے ساڈا دِل ساہنوں الزام نہ دیوے تاں اَسیں رَب دے حُضُور دلیر رہیواں گے۔ ²² ۲۲۔اَتے جو کُچھ اَسیں منگیِئے پاواں گے کیوں جو اَسیں اوہدے حُکم مَننےاَتے جو کُچھ اوہنوں چنگا لگدا اے اوہدے حُضُور پُورا کرنے آں۔ ²³ ۲۳۔اَتے اوہدا حُکم ایہ وے پئی اَسیں اوہدے پُتر یسُوع مسِیح اُتے اِیمان لیائِیے اَتے جیہڑا اوہنے ساہنوں حُکم کیِتا اے آپو وِچ پرِیت رکھیِئے۔ ²⁴ ۲۴۔اَتے جیہڑا اوہدے حُکماں نُوں من دا اے ایہ اوہدے وِچ اَتے اوہ ایدے وِچ وَسدا اے اَتے اوہدے مطلب کہ اوس رُوح دے وسِیلے جیہڑا اوہنے ساہنوں بخشیا اے اَسیں جاننے آں پئی اوہ اَساڈے وِچ وَسدا اے۔