¹ ۱۔ میرے بچیو! ایہ گَلاں مَیں تُہانوں ایس ماریاں لِکھنا پئی تُسیں پاپ نا کَھٹو اَتے جے کِسے کولوں پاپ ہو وی جاوے تے باپ کول اَساڈا اِک شِفاعت کرن والا ہے وے مطلب کہ یِسُوعؔ مسِیح راست باز۔ ² ۲۔اَتے اوہو ای اَساڈے پاپاں دا کفّارہ اے اَتے اَساڈے پاپاں دا ای نئیں سَگوں کُل جہان دے پاپاں دا وی۔ ³ ۳۔جے اَسیں اوہدے حُکماں اُتے عَمَل کراں گے تے ایس توں اَسیں جان لَواں گے پئی اَساں اوہنوں سنجھان لیا اے۔ ⁴ ۴۔جیہڑا آکھدا اے پئی مَیں اوہنوں جان گیا واں پَر اوہدے حُکماں اُتے عَمَل نئیں کردا اوہ جُھوٹھا اے اَتے اوہدے وِچ سچیائی نئیں۔ ⁵ ۵۔پرجیہڑااوہدے کلام اُتے عَمَل کردا اے اوہدے وِچ بے شک رَب دی مُحَبَّت توڑ اَپڑ گَئی اے۔ اَساہنوں ایسے توں پتا لگ جاندا اے پئی اَسیں اوہدے وِچ آں۔ ⁶ ۶۔ جیہڑا آکھدا اےپئی مَیں اوہدے وِچ قیئم آں تے اوہنوں چاہیِدا اے پئی جیِویں اوہ چلدا سی اوویں ای چَلے۔ ⁷ ۷۔ پیاریو! مَیں تُہانوں کِسے نَویں بارے نئیں سَگوں اوسے پُرانے حُکم بارے لِکھنا واں جیہڑا تُہانوں شُروع توں مِلیا اے۔ ایہ پُرانا حُکم اوہو ای کلام اے جیہڑا تُسیں سُن بیٹھے او۔ ⁸ ۸۔تاویِں جو لِکھنا واں اوہ اِک نَواں حُکم ای اے اَتے ایہ گَل اوہدے اُتےاَتے تُہاڈے اُتے پُوری اُتر دی اے کیوں جو ہنیرا مُک دا جاندا اے اَتے حقِیقی چانن چمکن لگا اے۔ ⁹ ۹۔جیہڑا آکھدا اے پئی مَیں چانن وِچ آں تے اپنے وِیر نال وَیر رکھدا اے اوہ ہُن تِیک ہنیرے وِچ ای اے۔ ¹⁰ ۱۰۔جیہڑا اپنے وِیر نال مُحَبَّت رَکھدا اے اوہ چانن وِچ وَسدا اے اَتے ٹھیڈا نئیں کھاندا۔ ¹¹ ۱۱۔پَر جیہڑا اپنے ویِر نال وَیر رکھ دا اے اوہ ہنیرے وِچ وَسدا اے اَتے ہنیرے وِچ ای چَلدا اے اَتے ایہ نئیں جان دا پئی کِدھرنُوں جاندا اے کیوں جو ہنیرے نے اوہدیِاں اَکھاں اَنھیاں کر دِتّیاں نیں۔ ¹² ۱۲۔ بچّیو! مَیں تُہانوں ایس ماریاں وی لِکھنا آں پئی اوہدے ناں توں تُہاڈے پاپ بخشے گَئے نیں۔ ¹³ ۱۳۔ اَتے وڈیریو! تُہانوں ایس ماریاں لِکھنا آں پئی جیہڑا شُروع توں اے تُساں اوہنوں جان لیا اے اَتے جوانو! مَیں تُہانوں ایس ماریاں لِکھنا آں پئی تُسیں اوس شریِر نُوں چِت کیِتا اے۔ اَتے بچیو! مَیں تُہانوں ایس ماریاں لِکھیا اے پئی تُساں باپ نُوں سنجھانیا اے۔ ¹⁴ ۱۴۔ اَتے وَڈیریو! مَیں تُہانوں ایس ماریاں لِکھیا اے پئی تُساں اوہنوں سنجھان لیا اے جیہڑا شُروع توں اے۔ اَتے جوانو! مَیں تُہانوں ایس ماریاں لِکھیا پئی تُسی تگڑے ہو جاو اَتے رَبّ دا کلام تُہاڈے وِچ وَسّیا ہویااےاَتے تُساں اوس شریِر نُوں چِت کر لیا اے۔ ¹⁵ ۱۵۔نا جگ نال پریِتاں پاوو، نا اوہناں شیواں نال جیہڑیاں جَگ وِچ نیں۔ جیہڑا جَگ نال پریِت پاوندا اے اوہدے وِچ باپ دی مُحبّت نئیں۔ ¹⁶ ۱۶۔ کیوں جو جو کُجھ جَگ وِچ ہے وے مطلب کہ جُسّے دا چاہ اَتے اَکھاں دا چاہ اَتے حیاتی دا گَھمنڈ اوہ باپ وَلوں نئیں سَگوں جَگ وَلوں اے۔ ¹⁷ ۱۷۔ جَگ تے اوہدا چاہ دونویں مُک دے جاندے نیں پَر جیہڑا رَب دے مَرضی اُتے چَلدا اے اوہ سَدا تِیک قیئم رہندا اے۔ ¹⁸ ۱۸۔اَتے بچیو! ایہ اَخیری ویلا اے اَتے اونج تے تُساں سُنیا ہویا وے پئی مخالفِ مسِیح آون والا پَر اَج دے دَور وِچ وی کَئی مخالفِ مسِیح جَم پَئے نیں۔ ایسے توں ساہنوں پتا لگ جاندا اے پئی اَخِیری ویلا ایہو ای اے۔ ¹⁹ ۱۹۔اوہ نِکلے تےاَساڈے وِچوں ای سَن پر اَساڈے ہے نئیں سَن کیوں جو جے اوہ اَساڈے وِچوں ہُندے تے اَساڈے نال رہندے پَر ایہ ایس ماریاں ہویا پئی ظاہر ہو جاوے پئی اوہ سبھوں اَساڈے وِچوں نئیں۔ ²⁰ ۲۰۔ پَر تُہانوں اوس قُدُوس توں مَسح مِلیا اے اَتے تُسیں سبھو جاندے او۔ ²¹ ۲۱۔مَیں تُہانوں ایس ماریاں نئیں لِکھیا پئی تُسیں حَق توں اَنجان او سَگوں ایس ماریاں پئی تُسیں اوہنوں جاندے او اَتے ایہ وی پئی کوئی جُھوٹھ حَق وَلوں نئیں ہُندا۔ ²² ۲۲۔ جُھوٹھا کون اے باہج اوہدے جیہڑا یِسُوع دے مسِیح ہون نُوں نئیں مَن دا؟ جیہڑا باپ اَتے بیٹے دا اِنکاری اے اوہو ای مُخالفِ مسِیح اے۔ ²³ ۲۳۔جیہڑا پُتر دا اِنکاری اے اوہدے کول باپ نئیں پر جیہڑا پُتر نُوں مَن دا اے اوہدے کول باپ وی اے۔ ²⁴ ۲۴۔جو کُچھ تُساں شُروع توں سُنیا ہویا اے اوہو ای تُہاڈے وِچ قیئم رہیوے۔ایس ماریاں پئی جو کُجھ تُساں شُروع توں سُنیا ہویا اے جے اوہ تُہاڈے وِچ قیئم رہیوے گا تے تُسیں وی بیٹے اَتے باپ وِچ قیئم رہو گے۔ ²⁵ ۲۵۔ اَتے جیس سَدا دی حیاتی دا وعدہ اوہنے اَساڈے نال کیِتا اے اوہ ایہو ای اے۔ ²⁶ ۲۶۔ مَیں ایہ گَلاں تُہانوں اوہناں بارے لِکھیاں نیں جیہڑے تُہانوں دوکھا دیندے نیں۔ ²⁷ ۲۷۔پَر اوہ مسَح جیہڑا تُہانوں اوہدے کولوں مِلیا اے تُہاڈے وِچ قیئم رہندے اے اَتے تُہانوں ایس گَل دے لَوڑ نئیں پئی ہر کوئی تُہانوں سِکھاندا پِھرے سگوں جِویں ایہ مسَح تُہانوں سارِیاں گَلاں بارے سِکھاندا اے ایہ حَق اے اَتے جُھوٹھ نئیں اَتے تُسیں اوہدے وِچ اُکا اونج ای قیئم رہیو جِویں تُہانوں سِکھاندا اے۔ ²⁸ ۲۸۔ بچیو! ہُن ایہ وے پئی تُسیں اوہدے وِچ قیئم رہیو تاں جو جد اوہ ظاہِر ہووے تے ساہنوں دلیری ہووے اَتے اَسیں اوہدے آون تے شرمندے نا ہوئیے۔ ²⁹ ۲۹۔جے تُسیں جاندے او پئی اوہ راست باز اے تے ایہ وی جاندے اوپئی ہر کوئی جیہڑا راست بازی دے کَم کردا اے، اوسے توں جَمیا اے۔