¹ ۱۔جیہڑا ایہ اِیمان رکھدا اے پئی یِسوعؔ ای مسِیح اے اوہ رَب توں جَمیا اے اَتے جیہڑا باپ نال مُحبت کردا اے اوہ اوہدے توں جَمن والے نال وی مُحبت کردا اے۔ ² ۲۔ جد اَسیں رَب نال مُحبت کرنے آں اَتے اوہدے حُکماں اُتے چلنے آں تے ایس گَل توں اَساہنوں پتا لگ جاندا اے پئی اَسیں رَب دے بچیاں نال وی مُحبت کرنے آں۔ ³ ۳۔کیوں جو رَب نال مُحبت کرنا ایہو ای اے پئی اَسیں اوہدے حُکماں تے چَلیئے تے نالے اوہدے حُکم ڈاہڈے نئیں۔ ⁴ ۴۔ کیوں جو جیہڑا رَب توں جَمیا اے اوہ جَگ اُتے فتح پاندا اے اَتے ایہ فتح جِہدے نال اَساں جَگ نُوں چِت کر لیا اے اَساڈا اِیمان ای تے ہے وے! ⁵ ۵۔تے فیر جَگ نُوں چِت کرن والا کون ہویا باہج اوہدے جیہڑا ایہ مَن دا اے پئی یِسُوعؔ رَب دا پِتر اے؟ ⁶ ۶۔ایہ اوہو ای اے جیہڑا پانی اَتے رَت نال آیا مطلب کہ یِسُوعؔ مسِیح جیہڑا نِرے پانی نال نئیں سَگوں پانی تے رَت دونواں دی راہِیں آیا سی اَتے جیہڑا گَواہی دیندا اے اوہ رُوح اے کیوں جو رُوح سچیائی اے۔ ⁷ ۷۔کیوں جو جیہڑے گَواہی دیندے نیں اوہ تِن نیں مطلب کہ (اَرش تے باپ اَتے کلمہ اَتے پَوتِر رُوح اَتے ایہ تِنے اِک ای نیں۔ ⁸ ۸۔اَتے تِن ای جیہڑے دھرتی تے گَواہی دیندے نیں) رُوح اَتے پانی اَتے رَت۔ اَتے ایہناں تِناں دا اِک ای گَل تے ایکا اے۔ ⁹ ۹۔جد اَسیں بندیاں دی گَواہی قبُول کر لینے آں تے فیر رَب دی گَواہی تے وَدھ کے وے کیوں جو رَب دی گَواہی ایہو ای اے پئی اوہنے اپنے پُتر دے حَق وِچ گَواہی دِتّی اے۔ ¹⁰ ۱۰۔جیہڑا رَب دے پُتر تے اِیمان لیاندا اے اوہ اپنے آپ وِچ گَواہی رَکھدا اے۔ جیہڑا رَب دا یَقِین نئیں کردا اوہ اوہنوں جُھوٹھا ٹھہراندا اے کیوں جو اوہ اوس گَواہی اُتے جیہڑی رَب نے اپنے پُتر دے حَق وِچ دِتّی اے، اِیمان نئیں لیاندا۔ ¹¹ ۱۱۔ اَتے اوہ گَواہی ایہ وے پئی رَب نے اَساہنوں سَدا دی حیاتی بخشی اے اَتے ایہ حیاتی اوہدے پُتر وِچ اے۔ ¹² ۱۲۔ جہدے کول پُتر اے، اوہدے کول حیاتی اے اَتے جِہدے کول رَب دا پُتر ای نئیں، اوہدے کول حیاتی وی نئیں۔ ¹³ ۱۳۔مَیں تُہانوں جیہڑے تُسیں رَب دے پُتر تے اِیمان لے آئے او ایہ گَلاں ایس ماریاں لِکھیاں نیں پئی جان جاو کہ تُسیں سَدا دی حیاتی رَکھدے او۔ ¹⁴ ۱۴۔ اَتے اَساڈا بھروسہ جیہڑا اوہدے اُتے وے اوہ ایہو ای اے پئی جے اَسیں اوہدی مَرضی دے حِساب نال کُچھ مَنگنے آں تے اوہ اَساڈی سُن دا اے۔ ¹⁵ ۱۵۔ اَتے جد اَسیں جان گَئے آں پئی جو کُچھ اَسیں اوہدے کولوں مَنگنے آں اوہ اَساڈی سُن دا اے تے فیر ایہ وی جاننے آں پئی جو کُچھ اَساں اوہدے کولوں منگیا اے اوہ ساہنوں مِلیا اے۔ ¹⁶ ۱۶۔جے کوئی اپنے بھرا نُوں اجیہا پاپ کردیاں ویکھے جِہدی اَخیِر ہلاکت نا ہووے تے دُعا مَنگے تے رَب اوہدے راہِیں اوہنوں حیاتی بخشے گا۔ مَیں اوہناں بارے ای آکھنا واں جِنھاں توں ہلاک کرن والا پاپ نئیں ہویا۔مَیں ایہ نئیں آکھ دا پئی تُسیں اوہناں لئی وی دُعا مَنگو جِنھاں توں اجیہا پاپ ہویا اے جِہدی اَخیِر ہلاکت اے۔ ¹⁷ ۱۷۔ اونج تے ہر ڈھنگ دی ناراستی پاپ ای اے پَر اجیہا پاپ وی اے جِہدی اَخیِر ہلاکت نئیں ہُندی۔ ¹⁸ ۱۸۔اَسیں جاننے آں پئی جیہڑا رَب توں جَمیا اے اوہ پاپ وِچ نئیں وَسدا سَگوں اوہدی راکھی اوہ کردا اے جیہڑا رَب توں جَمیا اے اَتے شرِیر اوہنوں چُھو نئیں سَکدا۔ ¹⁹ ۱۹۔ اَسیں جاننے آں پئی اَسیں رَب توں آں اَتے ایہ وی پئی سارا جَگ شرِیر دے قَبضے وِچ اے۔ ²⁰ ۲۰۔اَتے ایہ وی جاننے آں پئی رَب دا پُتر آ گیا اے اَتے اوہنے ساہنوں ایہ سمجھ بخشی اے پئی جیہڑا حَق اے اوہنوں جانیئے اَتے اَسیں اوہدے وِچ جیہڑا حق سچ اے مطلب کہ اوہدے پُتر مسِیح یِسُوعؔ وِچ آں۔ اوہو ای حَقیقی رَب اَتے سَدا دی حیاتی اے۔ ²¹ ۲۱۔ بچیو! تُسیں اپنے آپ نُوں بُتاں توں بچائی رَکھو۔