1
۱۔اَے مھارے بھائیاں، پربھُو میں ہمیشہ راضی رہو۔ ہُوں تھاں نا ہیک بات گھڑی گھڑی لِکھݨ خاں کونی تھکتو کیان٘کے ایہ بات تھاں نا غلط خِکھایوڑے باتاں خاں بَچاوݨ رے خارُو ہے۔
2
۲۔کُتاں خاں ہُشیار رہو یعنی اُوئاں مِنکھاں خاں جکو بُرا کام کرئی اَن ختنو کراوݨ رو کَہی۔
3
۳۔یاد راکھو کہ اصل میں ختنو کریوڑا آپاں ہاں جکو اِیشوَر رے پویتر آتما ری مرضی خاں بھَگتی کرئیں، یسوع مسیح تے فخر کرئیں اَن ݙِیل رے باتاں تے بھروسو کونی کرتا۔
4
۴۔جووو، ہُوں وی آپرے ݙِیل رے باتاں تے بھروسو راکھ خَگئیں۔ ہاں، جے کوئی ٻِجو مِنکھ خَمجھئی کہ او وی ݙِیل رے باتاں تے بھروسو راکھ خَگئی، تو ہُوں اُوئے خاں وی گھݨو راکھ خَگئیں۔
5
۵۔کیان٘کے ہُوں جَنم خاں اِسرائیلی اَن بِنیامین رے قبیلے خاں ہَتو اَن آٹھویں ݙن مھارو وی ختنو ہویو۔ ہُوں پَکو عِبرانی اَن دھَرمی قانُون رے مطابق فریسی پنتھ خاں ہَتو۔
6
۶۔ہُوں دھَرم ری غیرت رے لِحاظ خاں وشواسی منݙݪی نا تن٘گ کرتو اَن دھَرمی قانُون تے بہوݨ میں بے قصُور اَن بے عیب ہَتو۔
7
۷۔اُوئے گھڑی جکو باتاں مھارے فائدے رے ہَتے، ہمے اُوئاں نا مھیں مسیح رے خارُو نُقصان آݪے خَمجھیے رے۔
8
۸۔ہُوں پربھُو یسوع مسیح ری اوݪکھاݨ ری خاراں خاں موٹی بات خاں ٹاݪ ٻِجے باتاں نا نُقصان آݪے خَمجھئیں۔ جکے ری وجہ خاں مھناں خارے چیزاں میں نُقصان ہویو، ہُوں اُوئاں خارے چیزاں نا گند آݪِیکار بیکار خَمجھئیں کہ مھناں مسیح لابھے۔
9
۹۔اَن ہُوں مسیح خاں واسطو راکھ خَگاں۔ ہُوں ایہ خارو کُجھ آپری اُوئے نیکی ری وجہ خاں کونی لے خَگتو جکو دھَرمی قانُون تے بہوݨ خاں لابھئی پݨ ہمے مھیں کَڈھے او نیکی ہے جکو مسیح تے وشواس لے آوݨ ری وجہ خاں اِیشوَر ری طرف خاں لابھئی۔
10
۱۰۔ہُوں چھَڑو ایہ چاہوئیں کہ مسیح اَن اُوئے ری بھَݪے جیوتے ہووݨ ری قُدرت نا اوݪکھ خَگاں اَن اُوئے آݪِیکار تکلیفاں برداشت کر رے مَرݨ تک وفادار رہواں۔
11
۱۱۔کہ کَئی طرح مھناں مَریوڑاں مئیں خاں جیوتو ہووݨ رو درجو لابھ خَگے۔
12
۱۲۔ مھارو مطلب ایہ کونی کہ مھناں خارو کُجھ لابھ گیو رو جاں ہُوں کامل ہویو رو پݨ اُوئے مقصد نا لیوݨ ری اُمید راکھ ری آگے ناختو جائیں وو، جکے رے خارُو یسوع مسیح مھناں چُگیو ہے۔
13
۱۳۔اَے وشواسیاں، ہُوں ایہ کونی کَہوتو کہ مھناں او اِنعام لابھ گیو رو پݨ ہُوں ہیکی بات تے زور ݙئیں جکو کُجھ لارے رہ گیو رو اُوئے نا بھُول رو آگے بَدھتو۔
14
۱۴۔نِشان ݙِخا ناختو جائیں وو کہ مھناں اَکاش ماتھے او اِنعام لابھ جاوے جکے رے خارُو اِیشوَر مھناں مسیح یسوع میں ہیلو کریو ہے۔
15
۱۵۔ہمے آپاں مئیں خاں جِترا کامل ہے، او ایَج خوچ راکھے اَن جے کَئی بات میں تھان٘ری خوچ فرق ہے تو اِیشوَر اُوئے بات نا وی تھاں تے ظاہر کرخے۔
16
۱۶۔اِیئے خارُو جِتری تک آپاں پُگا ہاں اُوئے رے مطابق زندگی گُزارتا رہواں۔
17
۱۷۔اَے بھائیاں، تھے خارا بھیݪا ہو مھیں آݪِیکار زندگی گُزارو اَن اُوئاں مِنکھاں تے وی دھیان ݙے رو اُوئاں آݪِیکار زندگی گُزارو جکو مھان٘رے بتایوڑے مارگ تے بَہی۔
18
۱۸۔کیان٘کے پہل وی مھیں کَئی واری تھاں نا کَہیو ہے اَن ہیݨا وی رو رو اَن کَہیں کہ گھݨا مِنکھ آپرے اُٹھݨ ٻیخݨ ری وجہ خاں مسیح ری خُوݪی را دُشمن ہے۔
19
۱۹۔ اَخیر میں ایَہڑا مِنکھ نرگ میں جاخے۔ او پیٹ را پُجاری ہے، ݙِیل رے ختنے تے ماݨ کرئی اَن دُنیا رے چیزاں رے خیال میں رہئی۔
20
۲۰۔پݨ اَپݨو وطن اَکاش تے ہے اَن آپاں ہیکج مُگتی ݙیوݨ آݪے یعنی پربھُو یسوع مسیح رے بھَݪے آوݨ رے اِنتظار میں ہاں۔
21
۲۱۔اُوئے گھڑی او اَپݨے مِٹݨ آݪے ݙِیل نا بدل رو آپرے پرتاٻ آݪے ݙِیل آݪِیکار بَݨا ݙیخے۔ ایہ کام او آپری اُوئے قُدرت خاں کرخے جکے خاں او خارے چیزاں آپرے اختیار میں کر خَگئی۔