1
۱۔ اِیئے خارُو اَے وشواسی بھائیاں، تھے مھناں گھݨا پیارا ہو اَن ہُوں تھاں نا خہٹݨ ری گھݨی خِک راکھئیں کیان٘کے تھے مھاری خُوشی ہو اَن مھناں تھاں ماتھے ماݨ ہے۔ اَے عزیزاں، تھے اِیئان٘ج پربھُو میں قائم رہو۔
2
۲۔ہُوں ٻہن یوؤدیہ اَن ٻہن سُنتخے ری مِنتھ کرئیں کہ او پربھُو میں ہووݨ ری وجہ خاں آپت میں ہیک جیَہڑی خوچ راکھے۔
3
۳۔ہاوے، اَے مھیں بھیݪی شیوا کرݨ آݪا، ہُوں تھاری مِنتھ کرئیں کہ اِیئاں ٻہناں ری مدد کر کیان٘کے اِیئاں کلیمینس، ٻِجے شیوا کرݨ آݪاں اَن مھیں بھیݪا بھِݪ را خُوشی ری خبر رو پرچار کرݨ میں گھݨی محنت کی۔ اِیئاں را ناں زندگی ری کِتاب میں لِکھیوڑا ہے۔
4
۴۔پربھُو میں ہر گھڑی راضی رہو، بھَݪے کَہیں کہ راضی رہو۔
5
۵۔ہر کَئی خاں نرم دل خاں رہو۔ یاد راکھو کہ پربھُو آوݨ آݪو ہے۔
6
۶۔کَئی بات ری فِکر نی کرو اَن جَݙے وی پراتھنا کرو ہمیشہ اُوئے رو شُکر کرو اَن ہر بات رے خارُو اِیشوَر خاں پراتھنا کرو۔
7
۷۔تو پَچھے اِیشوَر رو خُکھ جکو مِنکھ ری خَمجھ خاں ٻاہر ہے، او تھان٘رے مَن اَن خَمجھ نا مسیح یسوع میں بَچا راکھخے۔
8
۸۔آخر میں اَے بھائیاں، جکو باتاں خَچے ہے، جکو عزت رے لائق ہے، جکو ضروری ہے، جکو بھَلے ہے، جکو خاراں نا پسند ہے، جکو مَن نا بھَلے لاگئی مطلب ایہ کہ جکو نیکی اَن تعریف رے باتاں ہے، اُوئاں خارے باتاں تے غور کرتا رہو۔
9
۹۔ جکو باتاں تھاں مھیں خاں خِیکھیے، لِنے، خُݨیے جاں مھیں مئیں جوئے، اُوئاں تے بہوتا رہو تو اِیشوَر جکو خُکھ خاں بھریوڑو ہے، تھاں بھیݪو رہخے۔
10
۱۰۔ہُوں پربھُو میں گھݨو راضی ہاں کہ اِترے ݙناں خاں پَچھے تھاں مھارے بارے میں خوچیو۔ بھَلائیں تھے پہل وی مھاری فِکر کرتا پݨ تھاں نا کَݙے موقعو کونی لابھو۔
11
۱۱۔اِیئے رو مطلب ایہ کونی کہ ہُوں آپری ضرُورت ری وجہ خاں کَہیں وو۔ مھیں ہر حال میں خُوش رہوݨ خِیکھ لِنو رو۔
12
۱۲۔ مھیں غریبی ݙِٹھی ہے اَن اَمِیری ݙِٹھی ہے، ہر بات میں اَن ہر حال میں مھیں دھاپ کھاوݨ، بُوکھو رہوݨ، بَدھݨ اَن گھٹݨ خِیکھیو ہے۔
13
۱۳۔ پربھُو یسوع جکو مھناں طاقت ݙئی اُوئے خاں ہُوں خارے باتاں رو مُقابلو کر خَگئیں۔
14
۱۴۔تو وی تھاں بھَلو کریو کہ مُصیبت میں مھیں بھیݪا شامل ہویا۔
15
۱۵۔اَے فِلپی شہر رے وشواسیاں، تھاں نا آپ نا وی ٹھاء ہے کہ خُوشی ری خبر رے پرچار رے شرُوع آݪے ݙناں میں جَݙے ہُوں مَکِدُنیہ شہر خاں بئیر ہویو، تو تھاں خاں ٹاݪ کَئی وشواسی منݙݪی رُپیے پئیخے میں مھاری مدد کونی کی۔
16
۱۶۔جَݙے ہُوں تھِسلُنِیکے شہر میں ہَتو، تو تھاں مھارے ضرورتاں پُورو کرݨ رے خارُو ہیک واری کونی پݨ ٻے واری مھیں خارُو مدد میلی۔
17
۱۷۔ ہُوں ایہ کونی چاہوتو کہ تھے مھناں دان ݙیوتا رہو پݨ ایہ کہ تھان٘رے دان ݙیوݨ خاں اِیشوَر تھاں نا گھݨی برکت ݙے۔
18
۱۸۔ مھیں کَڈھے خارو کُجھ ہے اَن ضرُورت خاں وی گھݨو ہے۔ جکو چیزاں تھاں اِپَفرُدِتُس رے ہاتھ میلیے ہَتے، او مھاری ضرُورت خاں وی گھݨے ہے۔ تھان٘رو دان خُوشبو آݪے ٻلِیدان آݪِیکار ہے جکو اِیشوَر نا پسند ہے۔
19
۱۹۔مھارو اِیشوَر آپرے پرتاٻ آݪے خزانے خاں مسیح یسوع میں تھان٘ری ہر ہیک ضرُورت نا پُوری کرخے۔
20
۲۰۔اَپݨے ٻاپ اِیشوَر ری بَݙائی ہمیشہ تک ہووتی رہ۔ اِیئان٘ج ہووے۔
21
۲۱۔ہر ہیک وشواسی نا مسیح یسوع میں سلام کَہیا۔ جکو وشواسی مھیں بھیݪا ہے، او وی تھاں نا سلام کَہی۔
22
۲۲۔خارا وشواسی خاص کر جکو قَیصر رے محل میں کام کرئی، تھاں نا سلام کَہی۔
23
۲۳۔ پربھُو، یسوع مسیح ری کِرپا تھان٘ری آتما بھیݪی رہ۔