1
۱۔مسیح میں تھاں نا حوصلو اَن اُوئے رے پریم خاں تسلی لابھئی۔ پویتر آتما تھاں بھیݪو ہے اَن تھے ہیکے ٻِجے رے خارُو مہربانی اَن دَیا راکھئی۔
2
۲۔جے اِیئاں ہے تو مھاری ایہ خُوشی پُوری کرو کہ ہیک جیَہڑی خوچ راکھو، ہیکے ٻِجے خاں پریم راکھو، ٻَدھی میں رہو اَن ہیک خیال راکھو۔
3
۳۔آپری غرض اَن ہَرُو بھَرُو رے ماݨ میں کئیں نی کرو پݨ نِوڑت خاں ہر کوئی ٻِجے نا آپ خاں بھَلو خَمجھے۔
4
۴۔تھاں مئیں خاں ہر کوئی چھَڑو آپرے بارے میں نی پݨ ٻِجاں رے بارے میں وی خوچے۔
5
۵۔ایَہڑی جِی خوچ راکھو جیَہڑی مسیح یسوع ری وی ہَتی۔
6
۶۔او آپ اِیشوَر رے رُوپ تے ہَتو تو وی اُوئے اِیشوَر رے برابر رہوݨ ری کوشش کونی کی۔
7
۷۔اُوئے خارو کُجھ چھوڑیو اَن غُلام بݨ رو اِنسان رے رُوپ میں آیو۔
8
۸۔اِنسان رے رُوپ میں آ رو آپرے آپ نا جھُکایواَن اِتری تک اِیشوَر رے کَہیے میں رہیوکہ موت پݨ خُوݪی آݪی موت قبُول کی۔
9
۹۔اِیئے خارُو اِیشوَر اُوئے نا خاراں خاں عزت آݪی جگہا تے ٻِخاݨیو اَن او ناں ݙِنو جکو خارے ناواں خاں اُتم ہے۔
10
۱۰۔اِیئاں اِیئے خارُو ہویو کہ یسوع رے ناں تے ہر کوئی گوݙا کھووے،پَچھے بھَلائیں او اَکاش ماتھے ہووے جاں دھرتی ماتھے جاں دھرتی رے ہین٘ٹھا۔
11
۱۱۔اَن اِیشوَر ٻاپ ری بَݙائی رے خارُوہر ہیک زبان مِنکھاں رے رُوبرُو منے کہ، یسوع مسیح جِی پربھُو ہے۔
12
۱۲۔اَے عزیزاں، جَݙے ہُوں تھاں بھیݪو رہیو اَن تھاں نا خِکھایو، تو تھاں اِیشوَر رے باتاں منیے اَن ہیݨا وی منئی وا، جَݙے ہُوں تھاں کَڈھے ہئی کونی۔ اِیئے خارُو تھے ٻِیہوتا اَن کان٘پتا اِیشوَر رے کَہیے میں زندگی گُزارو کہ تھاں نا پُوری مُگتی لابھ جاوے۔
13
۱۳۔کیان٘کے او اِیشوَر ہے جکو تھاں نا نیت اَن کام ٻِنہاں نا آپرے نیک مقصد نا پُورو کرݨ رے خارُو ہمت ݙئی۔
14
۱۴۔ہر کام خِدھی نیت اَن بِنا تکرار رے کرو،
15
۱۵۔اِیئاں تھے اِیئے دُنیا رے نَکھٹے اَن پاپی مِنکھاں رے بِچ میں اِیشوَر را بے قصُور اَن بے عیب ٻاݪ بݨ را رہو۔ مِنکھاں رے بِچ میں تھے اِیئاں ہو جاں دُنیا رے خارُو ݙِیئو۔
16
۱۶۔اَن تھے اَمر جِیون ݙیوݨ آݪو خَنݙیخو خُݨاوئی۔ جے تھے اِیئاں باتاں ماتھے بہوتا رہخو، تو ہُوں مسیح رے بھَݪے آوݨ رے ݙن تھاں تے ماݨ کر خَگیخ کہ نی مھاری ناخ بھَج بیکار گی اَن نِیج مھاری محنت تے پاݨی پھِریو۔
17
۱۷۔شیوا رو جکو کام تھے وشواس خاں کرئی وا، او ہیک ایَہڑو ٻلِیدان ہے جکو اِیشوَر نا پسند ہے۔ اِیئے رے خارُو جے مھناں مَرݨو وی پڑے، تو وی ہُوں راضی ہاں اَن تھاں بھیݪو خُوشی مناوئیں۔
18
۱۸۔اِیئے خارُو تھے وی خُوشی مناؤ اَن مھیں بھیݪا راضی رہو۔
19
۱۹۔مھناں پربھُو یسوع میں اُمید ہے کہ تِیمُتھِیُس نا بیگو تھاں کَڈھے میلیخ کہ او تھان٘رو حال حوال لے آوے اَن مھناں تسلی ہووے۔
20
۲۰۔کیان٘کے مھیں کَڈھے ٻِجو کوئی کونی جکے ری خوچ مھیں خاں بِچڑتی ہووے اَن جکو خَچےلی تھان٘رے خارُو چِنتا راکھے۔
21
۲۱۔ٻِجاں خاراں نا آپری آپری چِنتا لاگوڑی ہے نی کہ یسوع مسیح ری۔
22
۲۲۔پݨ تھاں نا ٹھاء ہے کہ تِیمُتھِیُس ماتھے بھروسو کر خَگئیں کیان٘کے اُوئے مھارو ݙِیکرو بݨ رو مھیں بھیݪو اِیشوَر ری خُوشی ری خبر رو پرچار کریو۔
23
۲۳۔ہمے مھناں اُمید ہے کہ جَݙے مھناں آپرے کیس رے بارے میں ٹھاء لاگ جاخے، تو ہُوں تِیمُتھِیُس نا اُوئے گھڑی تھاں کَڈھے میل ݙئیخ۔
24
۲۴۔ اَن مھناں پربھُو ماتھے یقین ہے کہ ہُوں وی بیگو تھاں کَڈھے آئیخ۔
25
۲۵۔ہیݨا ہُوں ایہ ضرُوری خَمجھئیں کہ اِپَفرُدِتُس نا پاچھو تھاں ݙِخا میلاں جکو مسیح میں مھارو بھائی، مھیں بھیݪو شیوا رو کام کرݨ آݪو اَن خِپائی ہے۔ او تھان٘رو خَنݙیخو پُگاوݨ آݪو وی ہے جکے نا تھاں مھارے ضرُورتاں پُورے کرݨ رے خارُو شیوادار بَݨا رو مھیں ݙِخا میلیو ہَتو۔
26
۲۶۔ہُوں اُوئے نا تھاں کَڈھے اِیئے خارُو میلئیں وو کیان٘کے اُوئے نا تھان٘ری گھݨی یاد آوئی۔ او تھان٘رے خارُو خِکئی کیان٘کے تھاں اُوئے ری بِیماری رے بارے میں خُݨیو ہَتو۔
27
۲۷۔او اِترو بِیمار ہَتو کہ مَرݨ تے ہَتو پݨ اِیشوَر اُوئے تے دَیا کی، نی چھَڑو اُوئے تے پݨ مھیں تے وی کہ مھیں تے گھݨا ݙُکھ نی آوے۔
28
۲۸۔اِیئے خارُو ہُوں جِترو بیگو ہو خَگیو اُوئے نا تھاں کَڈھے میلیخ کہ تھے اُوئے نا جو را راضی ہو جاؤ اَن مھاری پریشانی وی مِٹ جاوے۔
29
۲۹۔جَݙے او تھاں کَڈھے پُگے، تو تھے پربھُو میں خُوشی خاں اُوئے نا ٹَکریا اَن ایَہڑے مِنکھاں نا عزت ݙیوتا رہیا۔
30
۳۰۔اِیئے خارُو کہ او مسیح ری خُوشی ری خبر رے خارُو مَرݨ تے ہَتو اَن اُوئے آپری جان خطرے میں گھات ݙِنی کہ اُوئے کمی نا پُوری کر خَگے جکو تھاں خاں رہ گی ہَتی۔