¹ ۱۔پچھے او اوتھ خاں بیئر ہو رو آپرے ݙیخ میں آیو۔ ان اوے را چیلا وی اوے رےلارے بیئر ہویا۔ ² ۲۔جݙے سبت رو ݙن آیو تو او بھگتی گھر میں پرچار کرݨ لاگو اَن خُݨݨ آݪاں میں خاں کہینک حیران ہو را کہݨ لاگا اُوے نا ایے خارو کچھ کیتھ خاں لابھو اَن ایہ کہڑی خیاݨپ ہے جکو ایے نا ݙنوڑی ہے۔اَن کہڑ پرچا ایے رے ہاتھاں خاں ہووئی۔ ³ ۳۔کی اے او ڈکھاݨ کونی ابنِ مریم ان یقعوب ان یوسف اَن یہودہ ان شمعون رو بھائی ان کی ائیاں رے ٻہناں آپاں کݙے کونی آن اوئاں نا ایئے رے خارو تھُݙو لاگو۔ ⁴ ۴۔ائیے تے یسوع اُئاوں کہیو سنت کݙے وی بے عزت کونی ہووتو۔ پݨ آپرے ݙیخ آپرے عزیزاں آن آپرے گھر میں ⁵ ۵۔ آن او اوتھ کوئی معجزو نی جووݪ خگیو۔ پݨ بھݪے وی کہینک بیماراں تے ہاتھ راکھ ان شفا ݙنی۔آن اوے اُوئاں ری بے اعتباری تے حیران ہویو۔ ⁶ ۶۔ آن کݙے کݙے رے گاواں میں پرچار کرتو پھریو۔ ⁷ ۷۔ آن اُوئے اُوئاں ٻارہاں نا ہیلو کریو ان اُوئاں نا ٻے ٻے کر بہیر کرݨ لاگو۔ آن اُوئاں نا بھوتاں تے وی اختیار ݙنو۔ ⁸ ۸۔آن اُوئاں نا حکم ݙنو کہ مارگ میں خوائے گیݙی رے ٻجو کئی نی لیا۔ نی ٻاٹی نی جھوݪی ان نی جی پیخہ۔ ⁹ ۹۔پݨ جُتی پہریا آن ٻے چوݪا نی پہریا۔ ¹⁰ ۱۰۔ آن اُوئاں نا کہیو کہ جکے گھر میں جاؤ اوتھ جی رہو۔ جتری تک کے تھاں اُتھ خاں آگا بہیر نی ہو وو۔ ¹¹ ۱۱۔آن جکے جگہ لوک تھاناں نی منئے ان تھاری نی خُݨے اُوتھ خاں جاوتے بݪا آپری جُتی ری مٹی چھنڈک ڈو ایہ اُوئاں رے خارو گواہی ہوخے۔ ¹² ۱۲۔آن اُو بہیر ہوتا پرچار کرݨ لاگا کہ توٻہ کرو۔ ¹³ ۱۳۔آن او گھݨئے بھوتݨیاں نا کڈھتا ان گھݨے بیماراں نا تیل لگا ان شفا ݙیوݨ لاگا۔ ¹⁴ ۱۴۔آن ہیرودیس باچھاہ اُئاوں رے بارے میں خُݨیو۔ کیانکہ اُوئاں رو ناں گھݨو مشہور ہو گیو ہَتو۔ اَن لوک کہوتا وا کہ یوحنا اصطباغی مریوڑاں میں خاں جیتو ہویو ہے۔ایے خارو او معجزہ بتائی وا۔ ¹⁵ ۱۵۔پݨ کہینک کہݨ لاگا کہ الیاس ہے آن کہینک کہوتا وا کہ سنتاں میں خاں ہیک سنت آݪی کار ہے۔ ¹⁶ ۱۶۔ پݨ ہیرودیس خُݨ رو کہیو یوحنا جکے رو ماتھو میں بڈھوایو او جی جیتو تھیو ہے۔ ¹⁷ ۱۷۔کیانکہ ہیرودیس آپ جی ہیرودیاس رے وجہ جکو اوے رے بھائی فیلبُوس رے لُگائی ہَتی۔ یوحنا نا جھلوایو ان اوے نا جیل میں ڈھکوایو کیانکہ اُوے اُوے خاں بہیاں کریو ہتو۔ ¹⁸ ۱۸۔ آن یوحنا ہیرودیس نا کہیو ہتو کہ آپرے بھائی ری لُگائی راکھݨ تھارے خارو ٹھیک کونی۔ ¹⁹ ۱۹۔ایئے خارو ہیرودیاس اُوئے خاں دشمنی رکھے ٻیٹھی ہتی آن او چاہتی کہ اُوے نا مَرواوے پݨ نی کروا خگئی۔ ²⁰ ۲۰۔ایئے خارو کہ ہیرودیس یوحنا نا راستباز ان بھلو منکھ جاݨ تے اُوے نا بچائے راکھتو پݨ اُوئاں رے باتاں خُݨ تے گھݨو پریشان ہوجاتو۔ پݨ خُݨتو گھݨو راجی تھی تے۔ ²¹ ۲۱۔ ہیک ݙن جݙے ہیرودیس آپرے جنم ݙن رے ݙن آپرے امیر لوکاں اَن فوج رے سردارں اَن موٹے لوکاں ری دعوت کی۔ ²² ۲۲۔پچھے ہیرودیاس ری جی ݙیکری مہنے آئی اَن نچ نچ تے ہیرودیس اَن اوئے رے بھیݪا ٻیٹھوڑا نا راجی کریا۔ پچھے باچھاہ چھوکری نا کہیو مانگ ہوں تنا کی ݙا۔ ²³ ۲۳۔اَن اُوئے دھیج اُکھݨ اَن کہیو کہ مانگ جے تو آدھی راجئی مانگے تو وی ہوں تنے ݙئخ۔ ²⁴ ۲۴۔ اُو ٻاہر گی اَن آپری ماں نا کہیو کہ ہوں کی مانگا اَن اُوے کہیو یوحنا اصطباغی رو خر۔ ²⁵ ۲۵۔پچھے اُو بیگی پاچھی مہنے آئی اَن ارداس کی کہ ہون چاہوئی کہ توں یوحنا اصطباغی رو خر تھاݪ میں مناں ݙے۔ ²⁶ ۲۶۔ باچھاہ گھݨو حیران ہویو پݨ او آپری دھیج اَن آپرے مہماناں رے خامھوں اوے رو دل کونی ݙُکھاݨو چاہتو ہَتو۔ ²⁷ ۲۷۔پچھے باچھاہ اوئے جی گھڑی خپائیاں نا حکم ݙنو کہ اُوے رو خر لے آؤ اوئاں جا تے جیل میں جی اُوئے رو خر باڈھیو۔ ²⁸ ۲۸۔اَن اُوئے رو خر تھاݪ میں لے آیا۔ اَن اُوے چھوکری نا ݙنو اَن چھوکری آپری ماں نا جا ݙنو ²⁹ ۲۹۔اَن اُوے را چیلا ایئے خُݨ تے آیا اَن اُوئے ری لاش نا قبر میں راکھی۔ ³⁰ ۳۰۔ اَن خنت یسوع کڈھے بھیݪا ہویا۔ اَن جکو کج اُوئاں کریو اَن خکھایو ہَتو۔ خارو اُوئے نا خُݨایو۔ ³¹ ۳۱۔پچھے اُوے اُوئاں نا کہیو کہ تھاں دھار پدھر میں آؤ۔ اَن تھوڑو آرام کرو۔ ایئے خارو کہ رش گھݨی ہتی اَن اُوئاں نا ٻاٹی کھاوݨ رو وی ٹائم کونی مِلیو ہَتو۔ ³² ۳۲۔پچھے اُو ٻیڑی میں ٻیخ اَن دھار ہیک کھلی جگہ تے گیا۔ ³³ ۳۳۔ اَن گھݨے منکھاں اُوئاں نا جاتا جویو اَن اُوئاں نا ٹھا لاگ گی اَن خارا شہراں خاں بھیݪا ہو اَن پینݙے ہوڑے کڈھتا اُوئاں خاں پہل جا پُگا۔ ³⁴ ۳۴۔اَن یسوع اتر تے منکھاں رو موٹو ٹوݪو جویو۔ اَن اُوئے نا اُوئاں تے ترخ آیو کیانکہ اُو اُوئاں بھیݙاں آݪی کار ہتا جکا رو کوئی دھنار کونی ہتو۔ اَن اُو اُوئاں نا گھݨے باتاں ری تعلیم ݙیوݨ لاگو۔ ³⁵ ۳۵۔ جݙے گھݨی دیر تھی گی تو اُوئے را چیلا اوئے کڈھے آ اَن کہیو ایہ جگہ ویران ہے اَن گھݨی دیر تھی ری۔ ³⁶ ۳۶۔ائیاں نا جاوݨ ݙے کیانکہ کڈھلے گاں بختی خاں آپرے کھاوݨ خارو ٻاٹی مول ری لیوئے۔ ³⁷ ۳۷۔اُوئے بݪتی میں اُوئاں نا کہیو تھاں جی ائیاں نا کھاوݨ رے خارو ݙو۔پچھے او ٻولیا کی مھاں جا تے ٻے خو دینار رے ٻاٹے مول رے لاں اَن ائیاں نا کھواواں۔ ³⁸ ۳۸۔پݨ اُوئے اُوئاں نا کہیو کے تھاں کڈھے کیترے ٻاٹے ہے۔ جاؤ جو وو اَن اُوئاں جویو پانچ ٻاٹے اَن ٻے مَچھے۔ ³⁹ ۳۹۔ اَن اُوئے اُوئاں نا کہیو خاراں نا خاوے چارے تے لین خاں ٻیخاݨو۔ ⁴⁰ ۴۰۔اُو خو خو اَن پچاخ پچاخ ری لین میں ٻیخ گیا۔ ⁴¹ ۴۱۔پچھے اُوئے پانچ ٻاٹے اَن ٻے مَچھے لنھے اَن آکاش نی مھانݙو کر اَن برکت مانگی اَن ٻاٹے توڑئیے اَن آپرے چیلاں نا ݙنے کہ اُوئاں رے آگیا راکھے اَن اُوئاں او ٻے مَچھے اُوئاں خاراں میں بنڈئیے۔ ⁴² ۴۲۔اَن خارا کھا اَن دھاپا۔ ⁴³ ۴۳۔اَن اُوئاں بچوڑا ٹُکڑا را ٻارھے ٹوکرا بھریا۔ اَن کہینک مَچھیاں را۔ ⁴⁴ ۴۴۔اَن جکاں اُو ٻاٹے کھادھے او پانچ ہزار منکھ ہَتا۔ ⁴⁵ ۴۵۔ اَن اُوئے جی گھڑی اُوئے آپرے چیلاں نا کہیو کہ بیڑی آݪے پاخے جاؤ اَن اُوئے خاں پہل بیت صیدا نی پار جاؤ جیتری تاڑی ہوں عوام نا بہیر کراں۔ ⁴⁶ ۴۶۔اَن اُوئاں نا بہیر کر اَن پہاڑ ماتھے دُعا کرݨ لاگو۔ ⁴⁷ ۴۷۔اَن جݙے آتھݨ ہوئی تو ٻیڑی جھیل رے آدھ میں ہَتی اَن او ہیکھلو جی خشکی تے ہتو۔ ⁴⁸ ۴۸۔اَن اُوئے جویو کہ او گھݨاں تنگ تھیی وا کیانکہ ہوا اُوئاں رے خامھلی ہَتی۔ پچھے او رات رے چوتھے پاہر جھیل میں پاݨی تے اُوئاں کڈھے آیو اَن او چاہتو کہ ہوں ایاں خاں آگھو نکݪ جاواں۔ ⁴⁹ ۴۹۔جݙے اُوئاں اُوئے نا پاݨی رے بہتے جویو تو اوئاں خوچیو کہ کوئی بھونت ہے اَن رڑے کرݨ لاگا۔ ⁵⁰ ۵۰۔کیانکہ خاراں اوئے نا جویو اَن ٻہی گیا۔ پݨ اُوئے جلدی خاں اُوئے خاں باتاں کریے اَن کہیو کہ ٻہیو نی حوصلو راکھو ہوں ہاں ٻہیو نی۔ ⁵¹ ۵۱۔ اُو ٻیڑی تے اُوئاں کڈھے آیو۔ اَن ہوا رُک گی۔ پچھے او آپرے من میں ٻجا وی حیران ہویا۔ ⁵² ۵۲۔ایئے خارو کہ او ٻاٹیاں آݪی بات وی کونی خمجھیا پݨ اُوئاں را من سخت رہیا۔ ⁵³ ۵۳۔ اَن او پار جا را گنیسرت رے علاقہ میں پُگا اَن ٻیڑی نا گھٹ تے لگائی۔ ⁵⁴ ۵۴۔جݙے او ٻیڑی میں خاں اُتریا تو لوکاں اُوے جی گھڑی اُوئے نا اوݪکھیو۔ ⁵⁵ ۵۵۔اَن او پورے گاں میں گیا اَن بیماراں نا مانچاں تے اُکھݨ اوئے جگہ گیا جیتھ اُوئاں خُݨیو کہ او ہے۔ ⁵⁶ ۵۶۔ اَن او جیتھ وی گاں بستی میں جاوتو ہتو اوتھ لوک بیماراں نا چوک میں ٻیخاݨتا۔ اَن اُوئے رے منتھ کرتا ہتا۔ کہ او چھڑو اوئے رے گابھا ری چاݪ نا جی ہاتھ لگاوئے اَن جتراں اُوئے نا ہاتھ لگایو او بھلاں تھی جاوتا ہتا۔