¹ ۱۔بݪے فریسی آن کئینک دھرمی گروجکو یر شیلم خاں ہوتا۔ اُوے کݙھی بھیݪا وا۔ ² ۲۔ آن اُواں ݙتھو کہ اوُے را کئی چیلا حرام کام کرئی وا یعنی او بِنا ہاتھ دھوئے ٻاٹی کھاوئی۔ ³ ۳۔کیانکہ خارا فریسی آن یہودی بوڈھیاں ری ریت رے مطابق جترے تک آپ را ہاتھ بھلے طریقے خاں کونی دھوتا ہوتا کئیں کونی کھاوتا۔ ⁴ ۴۔آن بازار ری چیزاں ناں اُتی لگ کونی کھاوتا ہوتا جتی لگ اوے تے پاݨی کونی ڈھوڑتا ہوتا۔گھݨے باتان اُواں کݙھیں پُگے ہے جکے ناقائم راکھݨ جروری ہے۔ ⁵ ۵۔پݨ گھݨے دھرمی گروئاں اُوے خاں پوچھیوکہ تاجا چیلا بوڈھیاں ری ریت تے کیاں کونی بہتا؟بلکہ حرام ہاتھاں خاں ٻاٹی کھاوئی۔ ⁶ ۶۔اُوے اواں نا بݪتی ݙنی۔یسعیاہ خنت تھاں ٹھگاں رے بارے میں پہلی ہی صاف صاف کہہ ݙنو ہوتو، کہ ایہ قوم مانجی مانݙھے خاں تو عزت کرخے۔پݨ اواں را دل میں خاں اݪگا ہوُخے۔ ⁷ ۷۔او بے فائدو مانجی بھگتی کرئی وا کیانکہ او منکھاں رے بݨایوڑے ریتاں ائیاں خِکھاوئی،جکݨ اے ایشور را حکم ہوے۔ ⁸ ۸۔ کیانکے تھیں ایشور رے حکماں ری جگہا تے منکھاں رے بݨایوڑے ریت رواج قائم راکھوئی۔ ⁹ ۹۔آن اوے اواں نا ایہ وی کہیو۔کہ تھیں آپ رے بݨایوڑے ریتاں نا تو جاری راکھوئی پݨ ایشور رے حکماں نا رد کروئی وا۔ ¹⁰ ۱۰۔جاں موسیٰ کہیو۔ آپ رے ماں آن ٻاپ ری عزت کرو آن جکو وی آپ رے ماں ، ٻاپ نا بھلو بُرو کہَخے اُوے نا ضرور مار ناکھیو جاوے۔ ¹¹ ۱۱۔یپݨ تھیں منکھاں نا کہوئی پݨ ڄڈے تھارے ماں ٻاپ نا کئی شے ری لوڑ وئی تو تھں کہوئی ماھاں شے ایشور ے ناں کر ݙنی ری۔ ¹² ۱۲۔تو تھیں بݪے ماں آن ٻاپ مدد کونی ہووݨ ݙیوتا۔ ¹³ ۱۳۔آن آپ ری ریت رواج خاں ایشور رے شٻد ناں ٹوڑئی آن ایہڑا گھݨا کام کرئی۔ ¹⁴ ۱۴۔ آن او منکھاں نا بݪے آپ ݙخا ہیلو کر تے کہݨ لاگو مانجی خُݨو آن خَمجو۔ ¹⁵ ۱۵۔کوئی وی چیز ٻاہر خاں منکھ رے بھیتر جا، تے اوے نا حرام کونی کر خَگتی۔پݨ جکو چیز منکھ رے بھیتر خاں نِخرئی اوہو جی اوے نا حرام کرئی۔ ¹⁶ ۱۶۔جے کہیں را خُݨݨ آݪا کان ہووے تو خُݨے۔ ¹⁷ ۱۷۔ آن ڄݙے او ٹوݪے رے کو ڈھیں خاں گھرے گیو تو اُوے را چیلاں اُوے خاں مِخال رو مطبل پوچھیو۔ ¹⁸ ۱۸۔تو اُوے ناں کہیو۔کہ تھیں بھی اِیاں آݪی کر بے خَمجھ ہوکی تھیں کونی خمجھتا کہ کوئی چیزمنکھ رے بھیتر جاوی تو اُوے ناں حرام کونی کرئتی۔ ¹⁹ ۱۹۔ائیے خاروں اُواں رےدل میں کونی پر پیٹ میں جاوئی آن پیٹ خاں ٻاہر نِخر جاوئی ری۔ ²⁰ ۲۰۔ بݪے اُوے کہیو۔جکو منکھ را بھیتر خاں ٻاہر آوئی اُوہو اُوے نا حرام کرئی۔ ²¹ ۲۱۔کیاں کہ منکھ رے بھیتر خاں گندی خوچ نِخرئی او اُوے ناں حرام کرئی۔ ²² ۲۲۔خون کرݨ آݪو ،زنا کرݨ آݪو لالچ، بدی، مکر ،کرݨ آݪو ،جسم ری خواہش کرݨ آݪو،بری نظر خاں جووݨ آݪو،ِگلیہ،شیخی ، مارݨ آݪو آن بیوقوف۔ ²³ ۲۳۔ایہ خارے باتاں بھیتر خاں نخر تے منکھ ناں حرام کرئی۔ ²⁴ ۲۴۔ آن اوتھ خاں اٹھی رو صور آن صیداری حد میں گیو۔آن ہیک گھر میں گیو آن او کونی چاہتو ہتو کہ کوئی اُوے نا آݪکھے بݪے وی لُک کونی خَگیو۔ ²⁵ ۲۵۔بلکہ اوے گھڑی ہیک لُگائی جکے ری چھوٹِی ݙیکری نا بھونتڑی ہتی اے خٻر خُݨ ری آئی آن اوے رے پَگاں میں آ کھِری۔ ²⁶ ۲۶۔او لگائی یونانی ہوتی قوم ری سور فیینکی ۔ اوے اُواں نا منتھ کئی کہ بھونتڑی نا اُوے ری ݙیکریخاں کاڈھے۔ ²⁷ ۲۷۔تو پربھو یسوع اُوے نا کَہیو، پہل ٹاٻراں نا کھاوݨ ݙے کیانکہ ایہ ٹھیک کونی کہ ٹاٻراں ری ٻاٹی کُتاں آگے نکھیجے۔ ²⁸ ۲۸۔آن اوے اواں نا کہیو ہاوے ایشور پرمیشور کُتا وی میز رے ہیٹھاں چھوکراں ری ٻاٹی رے ٹوٹاں میں خاں کھاوئی۔ ²⁹ ۲۹۔اِئیے تے پربھو یسوع کہیو۔تیں بھلی بݪتی ݙنی ہیں ائیے خارو تو جا بھونتڑی تاجی ݙیکری خاں نِخر گی ری۔ ³⁰ ۳۰۔ڄڈے او لگائی گھرے پُگی ۔تو جویو کہ اوے ݙِکری ماچے تے خُتی پئی ہوتی آن اوے خاں بھُونتڑی نخرگیوڑی ہوتی۔ ³¹ ۳۱۔ آن او صور رے علاقے خاں نخر رو صدون رے مارگ خاں گلیل ری جھیل رے پاخے جاوتو ووہ دیکا پولس رے علاقے میں آیو ۔ ³² ۳۲۔آن منکھاں ہیکے گونگے نا اوے کݙھی لے آیا اوے ری منتھ کری کہ او اوے تے ہاتھ راکھے۔ ³³ ۳۳۔او اوے نا ٹوݪے خاں اݪگو لے گیو آن اپ ری آنگڑے اوے رے کاناں میں گھاتیے۔آن تھوک لگا رو اوے ری جٻان نا چھوئی۔ ³⁴ ۳۴۔آن آکاش رے پاخے جو رو کہیو ۔ آن نِخکارو ناکھیو کہ کہ اِفتح یعنی کھُل جا۔ ³⁵ ۳۵۔آن اُوے گھڑی اُوے را کان کھُل گیا آن اوے ری جٻان وی کھُل گی۔آن او صاف صاف ٻولݨ لاگو۔ ³⁶ ۳۶۔ آن اُوے اواں نا جھَلیو کہ اے کہیں نا نی کہیا۔ پݨ جترا نا او روکتو ہوتو اترو ہی زیادہ اوے نا مشہور کرتا رہتا۔ ³⁷ ۳۷۔آن اہوے گھݨا حیران ہُو تے کہیو۔ کہ ائیے خارو کُجھ ٹھیک کیو ہے۔او ٻوڑاں نا خُݨݨ آن گونگاں نا ٻولݨ ری طاقت ݙئی۔