¹ ۱۔ آن او جھیل رے پار جَرجاخیاں رے علاقے میں پُگا۔ ² ۲۔آن جݙے او ٻیڑی خاں اُتریو اُوے گھڑی ہیک منکھ جَکے میں بھُونت ہتو قبر خاں نَخر تے اوے کَݙھی آیو۔ ³ ۳۔ او قبراں میں رہتو ہتو۔آن کوئی وی اُوے نا جنجھیراں خاں وی کونی ٻاندھ خَگتو ہتو۔کیانکہ او کئی پھیرا ٻیڑیاں آن خانکڑاں خاں ٻاندھیو گیو ہتو۔ ⁴ ۴۔پݨ اُوے خانکڑاں ناں ٹوڑ ݙیوتو ہُوتو۔آن اُوے ٻیڑیاں نا ٹوٹا ٹوٹا کر ݙنا ہتا۔تے کوئی وی اُوے نا قا ٻُو کونی کر خگتا ہتا۔ ⁵ ۵۔ آن او ہمیشہ رات آن ݙن قبراں آن پہاڑاں میں پھِرتو۔آن آپ رےآپ نا پَتھراں خاں زخمی کرتو رہتو۔ ⁶ ۶۔آن ڄݙے اُوے یسوع نا اݪگے خاں آوتو ݙٹھو۔تو ناخ رو اُوے ݙخاگیوے آن خیِخ نِوایوو۔ ⁷ ۷۔آن رڑ کر کہیو۔اے ایشور را ݙیکرا تِناں میں خاں کی کام؟ہوں تناں ایشور ری دھیج ݙئیں۔مناں ݙُکھ نی ݙے۔ ⁸ ۸۔کیانکہ اُوے اُواں نا کہیو ہتو۔کہ اے بھونت ائیے منکھ خاں نِخر آ ⁹ ۹۔ پَچھے یسوع اُوے خاں پوچھیو۔تاجو ناں کی ہے اُوے یسوع نا کہیو۔مانجو ناں ہے بھُوتاں رو موٹو ٹوݪو۔ائیے خاروں مہیں گھݨاخارا ہاں۔ ¹⁰ ۱۰۔پچھے اوے یسوع ری ݙگھ منت کی کہ مہاناں ائیے علاقے خاںٻاہر نی کاݙھ ¹¹ ۱۱۔ آن اوتھ پہاڑ تے خوُہراں رو ہیک موٹو دھݨ چرتو ہتو۔ ¹² ۱۲۔ بھُوتاں یسوع ری منت کر آن کہیو۔کہ مہاناں اُواں خوہراں میں بہیر کر ݙے تاکہ مہاں اواں میں بڑ جاواں۔ ¹³ ۱۳۔پُچھے یسوع اُواں نا موکل ݙے ݙنی۔بھونت نَخر را خوہراں میں بڑگیا۔آن او دھَݨ جکو ٻے ہزار رو ہتو جھیل میں ٻُݙ مریو۔ ¹⁴ ۱۴۔آن اُوے دھَݨ را دھنار اُتھوں خاں بھَجیا۔آن شہر آݪا ناں خٻر پُجائی۔ پَچھے خارا اُوے ناں جووݨ نِخریا۔ ¹⁵ ۱۵۔آن یسوع کݙھی آیا۔آن اوے منکھ نا جَکے خاں بھونت یعنی بھوتاں رو ٹوݪو نِخریو ہتو گابھا پہریوڑا آن پورے ہوش میں ٻیٹھوڑوݙٹھو۔آن ٻہی گیا۔ ¹⁶ ۱۶۔آن جووݨ آݪا بھوتاں آن خوہراں رو حال خُݨایو۔ ¹⁷ ۱۷۔پچھے او اُوے ری منت کرݨ لاگا مھارے علاقے خاں نِخر جا۔ ¹⁸ ۱۸۔ ڄݙے او ٻیڑی تے چھڑیو۔او منکھ جکے خاں بھونت نِخریا ہتامنت کرݨ لاگو ہوں تے بھیݪو رَہاں۔ ¹⁹ ۱۹۔پݨ یسوع اُوے ناں موکل نی ݙنی۔بلکہ اوے ناں کہیو آپ رےگھرے آپ راں میں جا آن اُواں نا خُݨا کہ ایشور تاجے خاروں کہڑو موٹو کام کِیو ہے۔آن تے تے کرپا کئی ہے۔ ²⁰ ۲۰۔پچھے او بوہو گیو۔آن دکپُلس رے علاقے میں اُواں کاماں روپرچار کیو۔ ²¹ ۲۱۔ڄݙے یسوع ٻیڑی تے ٻیخ رو پار آیو تو گھݨا منکھ بھیݪا ہوگیااُوے کݙھی جھیل رے کندھے تے۔ ²² ۲۲۔اوتھ یائیر ناں رو ہیک منکھ آیو جکو بھگتی گھر رو خردارہتو۔او پربھو یسوع نا جو رو اُوے رے پَگاں میں کھِر گیو۔ ²³ ۲۳۔آن اُوے ری منتھ کر کہݨ لاگو۔مہاری چھوٹی ݙیکری مَرݨ آݪی ہے کرپا کر ری تھِیں آؤ آن آپ رو ہاتھ اُوے ماتھے راکھو کہ بھَلاں ہو جاوے آن بَچ جاوے ری۔ ²⁴ ۲۴۔پچھے یسوع اُوے رے لارے لارے بہݨ لاگو آن اُوے رےچودھاروں تمام گھݨا منکھ ہتا۔ ²⁵ ۲۵۔اُواں منکھاں میں ہیک بیمار لُگائی ہتی جکے رو ٻاہرے برخاں خاں لوہی کونی رُکتو ہَتو۔ ²⁶ ۲۶۔آن اُوے آپ را خارا پئخا علاج کراوݨ ماتھے لگا ݙنا پݨ اُوے ناکوئی فرق کونی پڑیو آن او گھݨی بیمار ہُوتی گی۔ ²⁷ ۲۷۔یسوع رے بارے میں خُݨ رو او لُگائی گھݨے خارے منکھاں رےبِچ میں خاں اُوے رو لارے آئی آن اُوے رے گابھاں نا ہاتھ لگایو۔ ²⁸ ۲۸۔ کِیانکہ اُوے آپ رے من میں خوچیو ہَتو۔جے ہوں اُوے رےگابھاں نا چھَڑو ہاتھ لگائخ رو تو ہوں بھَلاں ہُوئیخ ری۔ ²⁹ ۲۹۔آن اُوے گھڑی بھَلاں ہُو گی۔آن اُوے ناآپ رے خَریر میں لاگو کہ ہوں بھَلاں ہوئی ری۔ ³⁰ ۳۰۔پچھے یسوع ڄاݨیو کہ میں خاں طاقت نِخری ہے۔پچھے یسوع پوچھیو کہ مہارے گابھاں نا کے ہاتھ لگایو ہے۔ ³¹ ۳۱۔اُوے رے چیلاں اُوے ناں کہیو۔تُوں جووئیں تو پیو تھارے آخےپاخے گھَݨا مِنکھ ہے۔ آن تو کہیں کہ مَناں کہ ہاتھ لگایو ہے۔ ³² ۳۲۔ڄݙے اُوے لُگائی نا ٹھاہ لاگی تو ٻیہوتی آن کانپتی آئی آن اُوےرے آگِیا کھِر گی آن خاری بات خَچی خَچی کہہ خُݨائی۔ ³³ ۳۳۔او لُگائی جو کُجھ اُوے خاں ہُوو ہَتو جو رو محخوخ کیو آن ٻہیوتی آن کانپتی آئی آن اُوے رے اَگیا پَگاں میں ٻیخ ری اُوے ناں خارو حال خَچ خَخ خُݨایو۔ ³⁴ ۳۴۔ پچھے اُوے کہیو۔ ݙیکری تاجے ایمان تَناں بھَلاں کِیو ہے۔خئی خلامت جا آن آپ ری تکلیف خاں بَچی رہ۔ ³⁵ ۳۵۔او اے کہوتو جی ہتو۔کہ بھگتی گھر رے خردار رے منکھاں آ آن کہیو تاجی ݙیکری مر گی ری گرو جی نا تکلیف نی ݙے۔ ³⁶ ۳۶۔یسوع اُواں رے باتاں نا خُݨ رے تے بھگتی گھر رے خردار ناکہیو گھٻرا نی بلکہ ایمان راکھ۔ ³⁷ ۳۷۔آن اُوے پطرس،یعقوب آن یعقوب رے بھائی یوحنا خاں ٹاݪ ٻِجوکہیں نا آپ بھیݪو کونی آوݨ ݙنو۔ ³⁸ ۳۸۔آن او بھگتی گھر رے خردار رے گھرے آیا۔آن اُتھے ݙگھ خارولُڑ، ماتم آن رووا پِٹکو ہتو۔ ³⁹ ۳۹۔آن او گھر میں جا آن کہیو۔تھاں کِیاں ماتم آن روا پِٹکو کرئی ووا۔چھوکری مر ی کونی بلکہ خُوتی پئی ہے۔ ⁴⁰ ۴۰۔او اُوے تے ہخݨ لاگا۔پݨ او خاراں نا ٻاہر کاݙھ چھوکری رے ماں ٻاپ آن آپ رے چیلاں نا لے چھوکری رے ماچے تے گیو۔ ⁴¹ ۴۱۔آن چھوکری رو ہاتھ جھال آن کہیو۔اے چھوکری تَناں کہیَں اُٹھی۔ ⁴² ۴۲۔چھوکری اُوے گھڑی اُٹھی آن پھرݨ لاگی کیانکہ او ٻاہرے برخ ری ہتی۔اے جو رو خارا منکھ حیران ہو گِیا۔ ⁴³ ۴۳۔پچھے اُواں ناخَختی خاں کہیوکہ۔اے بات کہیں نا وی نی خُݨایا۔آن ایہ کہیو کہ اِئیے ناں کَئیں کھاوݨ نا ݙنو جاوے۔