¹ ۱۔ آݨ او اُواں خاں مِخالاں ݙے تے بات کرݨ لا گو ، کہ ہیک مِنکھ باغ لگاوی تے اوے رے چارے طرف جنگلو لگاوی تے بَڑے کھوکھٹی آݨ پچھے تھانبو بݨاوی پچھے او باغ ری راکھی کرݨ آراں نا راکھی تے ݙے تے ٻجے ملک جاوی رو ۔ ² ۲۔بݪے وقت آوݨ تے اوے ہیک نوکر نا باغ ری رکھواݪی کرݨ آراں ݙخا بہر کریو او باغ رے رکھواݪاں خاں پھڑاں رو حخو لے آوے۔ ³ ۳۔پر اُواں اُوے نہ جھال تے کوٹیو تے کھالی ہاتھ پاچھو بہر کریو ۔ ⁴ ۴۔اُوے بَڑے ہیکے ٻجے نوکر نا اُواں ݙخا بہر کریو اُواں اُوے رو ماتھو پھاڑیو بے عزتو کریو ۔ ⁵ ۵۔بَڑے اُوے ہیک ٻِجے نا بہر کریو اُواں اُوے نا مار ݙنوں پچھے اُوے ڈِھِگ خارہ نا بہر کریا اُواں اُوے خاں ڈِھِگاں نہ ماریا تے گݨاں نا قتل کریا ۔ ⁶ ۶۔ہجے اُوے رو ہیک مِنکھ باقی ہو تواُوے رو پیارو ݙیکرو اوے آپ رے پیارے ݙیکرے نا اے کہہ کر بہر کریو کہ او مانجے ݙیکرے رو تو لحاظ راکھخے ۔ ⁷ ۷۔ آݨ اُواں باغ ری راکھی کرݨ آݪاں آپس میں کہیو اے جی بارخ ہے آؤآپاں اییے نا مارجے رو تو ملکیت آپݨی ہوخے ری ۔ ⁸ ۸۔ آݨ اُواں اُوے نا جھال تے قتل کرتے باغ خاں ٻاہرناکھ چھوڑیو ۔ ⁹ ۹۔پݨ باغ رو مالک کی کرخے ؟ او آخے تے اُوے باغ رے رکھواݪاں نا مار چھوڑخے پچھے او باغ ٻجاں نا ݙے ݙیخے۔ ¹⁰ ۱۰۔ کی تھاں اے کہاوت کونی پڑھی ، جکو پتھر مختریاں ناکھ ݙنوں اُوہؤجی کُنڈ ری شروعات بݨیوں ۔ ¹¹ ۱۱۔اے ایشور ری طرف خاں ہویو ہے ،اے آپݨی نظراں میں عجیب ہے وہ ۔ ¹² ۱۲۔بݪے او اُوے نا جھالݨ ری کوشش کرݨ لاگا ، پر او عوام خاں ٻہیتا کیانکہ او خمجھ گیاترا کہ اے مِخال اییاں رے بارے میں ہے ، بس او اُوے نا چھوڑ تے بوہا گیا ۔ ¹³ ۱۳۔ پچھے اُواں کیتک فریسیاں آݨ ہیرودیاں نا اُوے ݙخا بہر کریا تاکہ اُوے نا باتاں میں پھخاوے ۔ ¹⁴ ۱۴۔اُواں آتے اُوے خاں کہیو کہ اے اُستاد تو خچو ہیں آݨ تناں کہیں ری پروا کونی کیانکہ تُو مِنکھاں ری طرفداری کونی کرتو بلکہ خچائی خاں ایشور رو مارگ تیار کرئیں ،بس مھاناں اے ݙخل کہ قیصر نا ٹیکس ݙیوݨ ٹھیک ہے یا کونی؟ کی مھاں ݙیجے یا نی؟ ¹⁵ ۱۵۔اُوے اُواں را مکر جاݨتے ہوئے کہوݨ لاگو تھاں مینا کیاں آزماوی؟ ہیک دینار میں ݙیخا لے آؤ ہوں جوواں ۔ ¹⁶ ۱۶۔ بس اُوے آیا ، جݙے اُوے اُواں نا کہیو ایے تے شکل تے لکھت کے ری ہے ۔ اواں اُوے نا کہیو کہ اے قیصر ری ہے ۔ ¹⁷ ۱۷۔یسوع اُواں نا کہیو نا کہوݨ لاگو جکو قیصر رو ہے او قیصر نا تے جکو ایشور رو ہے ایشور نا ݙو آݨ او ایے بات تے ڈھگ حران ہوا۔ ¹⁸ ۱۸۔ پچھے صدوقی جکو قیامت نا کونی منتا او اُوے ݙیخا آیا تے خوال کریو ۔ ¹⁹ ۱۹۔اے اُستاد مھارے خاروں موسَی لکھیو ہے کہ اگر کہیں رو بھائی مرجاوی رو اُوے ری لُگائی ری کوئی اولاد نی ہووے تو اُوے رو بھائی اُوے نا لیوے کیانکہ اُوے ری نسل پیدا کرے۔ ²⁰ ۲۰۔خات بھائی ہوتا پہلکو اُوے خاں بیہاں کرئی او بے اولاد مر جاوی۔ ²¹ ۲۱۔ پچھے ٻجو اُوے نا لیئ او وی مر جاوی اُوے خاں بھی اولاد کونی ہوتی۔ ²² ۲۲۔ایؔاں جی تیجو بھی بلکہ خات را خات ایّاں جی مرجاوی ،ایّاں خاں پچھے او لُگائی بھی مرجاوی ری۔ ²³ ۲۳۔پچھے جݙے قیامت رے ݙن خارا جی اُٹھخے تو او لُگائی کے ری ہوخے جݙے کہ او خاتاں ری لُگائی ہوتی ۔ ²⁴ ۲۴۔ یسوع اُواں نا کہی کہ تھاں پرانی کہاوتاں تے ایشور ری قدرت نا جاݨتا ہوا غلطی تو کونی کرتاوا۔ ²⁵ ۲۵۔کیانکہ جݙے مریوݪاں نا جیوتا کریا جاخے تو نی بیھاں کراخے نی بیھاں کرخے جݙے کہ آخمان تے خارا فرشتہ آریکر ہوخاں ۔ ²⁶ ۲۶۔ آݨ تھاں مردہ ری قیامت رے بارے میں موسَی ری کتاب جھاڑی رے ذکر میں کونی پڑھیو کہ ایشور اُوے خاں بات کرتے کی کلام کہیو کہ ہوں ابراہیم رو ایشور آݨ اسحاق رو ایشور آݨ یعقوب رو ایشور ہاں ۔ ²⁷ ۲۷۔او مریوڑا رو کونی او جیوتاں رو ایشور ہے، بس تھاں موئی غلطی تے ہو ۔ ²⁸ ۲۸۔ آݨ فقیہاں میں خاں ہیک ایاں رے باتاں خݨتووہ تے او خارا جواب خݨروہ تو او کݙی نا آتے پوچھئی کہ خاراں خاں پہلے حکم کہیو ہے۔ ²⁹ ۲۹۔یسوع اُوے نا جواب ݙیوی کہ پہلو حکم اے ہے ،خݨ اے اسرائیل ایشور آپݨوں ہیک جی ہے ایشور ہے ۔ ³⁰ ۳۰۔پس تو ایشور آپ رے پویتر ایشور خاں آپ رے خارے دل آݨ آپ ری خاری جان آݨ آپ ری خاری عقل آݨ آپ رے خارے زور خاں اُوے خاں پیار راکھ ۔ ³¹ ۳۱۔آݨ ٻجو اے کہ تو آپ رے گھر رے کݙے آڑے خاں آپ آریکر پیار کر ایے خا موٹو ٻجو کوئی حکم کونی ۔ ³² ۳۲۔ فقیہہ اُوے نے کہیو کی بات ہے تھاں خچی کہیو کہ ایشور ہیک ہے ٻجو کہ اُوے خاں ٹاڑ ٻجو کوئی کونی ۔ ³³ ۳۳۔آݨ آپ رے خارے دل آپ ری خاری عقل آݨ زور آݨ آپ رے گھر رے کݙے آڑے خاں آپ آریکر پیار کرݨ اے خارو کجھ سوختنی قربانیاں آݨ جانوراں نہ باڈھݨ خاں بھلو ہے ۔ ³⁴ ۳۴۔آݨ جݙے یسوع ݙٹھو کہ اُوے خوچ خمجھ تے جواب ݙھنو ہے ۔ تو اُوے نا کہیو کہ ایشور ری بادشاہی تے خاں اڑگی کونی ، ایے خاں پچھے کیہے بھی یسوع خاں خوال کررݨ ری ہمت کونی کری ۔ ³⁵ ۳۵۔ آݨ یسوع ہیکل میں ٻولتو کہیوݨ لاگو کہ فقیہہ کیاں کہیوی کہ المسیح داؤد رو ݙیکرو ہے ۔ ³⁶ ۳۶۔داؤد آپ جی روح القدس خاں کہیو کہ ایشور آپ مانجے ایشورنا کہیو کہ تو مانجے خدھے پاخے ٻیخ ، اتری تک جتے تک تانجے دشمناناں ہوں تانجے پگاں رے ہیٹھا نی کرݙاں۔ ³⁷ ۳۷۔داؤد تو خود اوے نا ایشور کہیوی تو پچھے او اوے رو ݙیکرو کیکݨ ہے ؟ تے گھݨاں مِنکھ خوشی خاں اُوے رے باتاں خݨیں ۔ ³⁸ ۳۸۔ آݨ اُوے آپ رے وچار میں کہیو فقیہاں خاں ہوشیار رہو جکو لامٻا لامٻا چوڑا پہر کر جاوی کہ لوک اُواں نا جوئے ۔ ³⁹ ۳۹۔آݨ بھگتی رے گھراں میں اُواں نا آگے کرخی تے جگہ ݙیوے آݨ موٹے دعوتاں میں اُواں ناں خاراں خا بھلی جگہ ݙے ۔ ⁴⁰ ۴۰۔او بیوا لُگایاں رے گھراں ری طرف جاوی تے مقاری خاں لامٻے لامٻے پراتھناواں کری ، ایڑا لوک ڈھگ سزا را حق دار ہوخے ۔ ⁴¹ ۴۱۔ پچھے یسوع خزانے رے خامے ٻیخ تے جوتووہ کہ لوک ایشور رے ناں تے کیکݨ ݙئی وا اُوے جکو امیر ہوتا اُواں ݙھگ ئج ݙھنو۔ ⁴² ۴۲۔ہیک گریٻ بیوا لُگائی ٻے پیخا یعنی ہیک ٹکو اُوے میں ناکھیو ۔ ⁴³ ۴۳۔ جݙے ایشور آپ رے چیلاں نا ہولو کر تے کہیوݨ لاگو کہ ہوں تھاں خاں خچی کہیں وہ کہ جکو بی غلے میں دان ݙئی وہ اُواں خاراں خا ں زیادواجر اُوے کنگال بیوہ رو ہے ۔ ⁴⁴ ۴۴۔کیانکہ خاراں آپ رے گھݨیں میں خاں ݙئی ، پر ایے آپ ری گریٻی میں خاں جمع کریوڑو خاروکجھ ایے میں ناکھ ݙنو ۔