¹ ۱۔آن جݙے اُو ہیکل خاں ٻاہر جاوتو ہَتو۔ اُوئے رے چیلاں میں خاں ہیکے اُوئے نا کہیو اے استاد جو ایہ کہڑا پتھر اَن کہڑے جیگاواں ہے۔ ² ۲۔آن یسوع اُوئے نا بݪتی میں کہیو۔ توں ایہ موٹے جگھاواں جووئیں وو؟ ایتھ کہئی پتھر ماتھے پتھر کݙے وی کونی چھوڑیو جاوئے جکو ناکھیو نی جاوئے۔ ³ ۳۔آن جݙے اُو زیتون رے پہاڑ تے ہیکل رے خامھو ٻیٹھو ہَتو۔ تو پطرس اَن یقعوب اَن یوحنا اَن اندریاس ہیکھلے میں اُوئے خاں پوچھیو۔ ⁴ ۴۔مھاناں خُݨا کہ ایہ باتاں کݙے ہوخے۔ آن جݙے ایہ خارو کچھ پورو ہووݨ آݪو ہوخے۔ تو اُوئے گھڑی کی نشان ہوخے؟ ⁵ ۵۔پچھے یسوع اُوئاں نا کہیݨ لاگو۔ خُجاگ تھیا کہ کوئی تھاناں دھوکھو نی ݙے۔ ⁶ ۶۔ کیانکہ گھݨاں مھارو ناں لے تے آخے۔ آن کہخے کہ ہوں جی ہا۔ آن اُو گھݨاں نا پھیرخے را۔ ⁷ ۷۔آن جݙے تھاں بڑھاند اَن بڑھانداں ری اُݙتے باتاں خُݨو۔ تو ٻہی نی جایا۔ کیانکہ ایئاں تھیݨ لازم ہے پݨ جگت رو خاتمو بیگو کونی ہووے۔ ⁸ ۸۔کیانکہ قوم خاں قوم اَن بادشاہی خاں بادشاہی بِڑھخے۔جگہا جگہا زلزلا آخے اَن کاݪ پڑخے۔ ایہ باتاں ݙکھ ری شروعات ہوخے۔ ⁹ ۹۔پݨ تھاں خبردار رہیا۔ اُو تھاناں عدالتاں رے حوالے کرخے۔ اَن بھگتی گھراں میں کوڑا کھاخو آن اُو تھاناں مھارے کرے حاکماں اَن بادشاہواں رے خامھا لے جاخے۔ ایئے رے خارو کہ اُوئاں رے خارو گواہی ہووے۔ ¹⁰ ۱۰۔پݨ ضرور ہے کہ خارے قوماں میں انجیل رو پرچار کریو جاوئے۔ ¹¹ ۱۱۔پݨ جݙے لوک تھاناں لے جا اَن اُوئے رے حوالے کرے تو پہل خاں فکر نی کرو کہ مھاں کی بݪتی ݙخاں۔ بلکہ جو کچھ تھاناں کہوݨو ہے اُوئے گھڑی تھاناں کہیو جاخے۔ کیانکہ کہݨ آݪا تھاں کونی بلکہ پویتر آتماں ہے۔ ¹² ۱۲۔آن بھائی نا بھائی اَن ݙیکرے نا ٻاپ مَراوݨ رے خارو جھلواخے. آن اولاد ماں ٻاپ رے خلاف ابھا ہوخے۔ آن اُوئاں نا مَروا ݙیخے۔ ¹³ ۱۳۔آن مھارے ناں رے کرے خارا تھاں خاں نفرت راکھخے۔ پݨ جکو آخر تے مھارے باتاں منخے اوئے نا جی مگتی لابھخے۔ ¹⁴ ۱۴۔جݙے تھے اُوئے برباد کرݨ آݪی پلیت چیز نا پویتر جگہا میں اَبھوڑِی جووو جیتھ اُوئے رو اَبھیجݨ ٹھیک کونی ۔ تو تھاں خَمجھ جایا۔ اُوئے گھڑی جکو یہودیہ صُوبے میں ہووے ، او پہاڑاں ݙِخا ناخ جاوے۔ ¹⁵ ۱۵۔آن جکو کوٹھے تے ہووے او گھر میں نی آوے نی جی مھنے جاوے کہینک لیوݨ رے خارو۔ ¹⁶ ۱۶۔آن جکو زمین میں ہووے او آپرو گابھو لیوݨ رے خارو پاچھو نی جاوے۔ ¹⁷ ۱۷۔پݨ افسوس اُوئاں لُگائیاں تے جکو اُوے ݙناں میں اُمیدواری خاں ہوخے۔آن جکو ݙُودھ پاوتے ہوخے۔ ¹⁸ ۱۸۔دُعا کرو کہ ایہ باتاں خِیاݪے میں نی خُݨنے پڑے۔ ¹⁹ ۱۹۔کیانکہ اُو ݙِن ایہڑھے مصیبتاں آݪا ہوخے۔ کہ جݙے خاں ایشور دھرتی نا بݨائی۔ہݨے تک نی جی ائیاں ہویو اَن نی کݙے ہوخے۔ ²⁰ ۲۰۔آن جے پرمیشور اُوئاں مصیبت رے ݙناں نا نی گھٹاونت تو کوئی وی کونی بچنت پݨ اُوئے آپرے چُگیوڑے منکھاں رے خارُو اُوئاں ݙنا نا گھٹا ݙنا را۔ ²¹ ۲۱۔اُوئے گھڑی جے کوئی تھاں نا کہے کہ جووو مسیح ایتھ ہے جاں اوتھ ہے۔ تو اُوئے ری بات نی منیا۔ ²² ۲۲۔کیانکہ کوڑا مسیح اَن کوڑا نبی وی آخے۔ او نِشان اَن عجیب کام بتاخے جکاں خاں مِنکھ حیران ہو جاخے۔ اُوئاں رو مقصد ہوخے کہ ایشور را چُگیوڑا وی بھٹک جاوے۔ ²³ ۲۳۔پݨ تھاں خبردار رہیا۔ جووو مھیں اِیئاں باتاں رے ہووݨ خاں پہل تھاں نا خارو کچھ خُݨا ݙنھو رو۔ ²⁴ ۲۴۔پݨ اُوئے ݙناں میں اُوئے مصیبت خاں بعد خورج اندھو ہو جاخے اَن چاند آپرو اجاݪو ݙیوݨ چھوڑ ݙیخے۔ ²⁵ ۲۵۔آن آسمان را تارا کھرخے را اَن جکو طاقتاں آسمان میں ہے اُو خارے ہِلائے جاخے۔ ²⁶ ۲۶۔تو پچھے منکھ ابن آدم نا بادلاں میں موٹی قدرت اَن جلال خاں آتو جوخے۔ ²⁷ ۲۷۔پچھے او آپرے فرشتاں نا میلخے اَن او ایشور رے چُگیوڑے منکھاں نا دھرتی اَن آسمان رے چارے پاخے جیتھ وی ہوخے بھیݪا کرخے۔ ²⁸ ۲۸۔ہمے انجیر رے بݨ ری مثال خاں ایہ خیکھو۔ جݙے اُو ݙاݪی کچی ہووئے اَن پتا نخرئی۔ تو تھاں جو اَن خمجھ جاوئی، کہ اُنہاݪو آوݨ آݪو ہے۔ ²⁹ ۲۹۔ایئاں جی جݙے تھاں ایئاں باتاں نا ہووتے جووو۔ تو خمجھ جایا کہ اُو نیڑو ہے بلکہ دَر تے ہے۔ ³⁰ ۳۰۔ہوں تھاناں خچی کہیں، کہ ایہ پیڑھی کونی مُکے جتری تک کہ ایہ باتاں پورے نی ہووے۔ ³¹ ۳۱۔آسمان اَن زمین ٹݪ جاخے، پݨ مھارے باتاں کݙے کونی ٹݪے۔ ³² ۳۲۔پݨ اُوئے ݙن جاں گھڑی رو ٻاپ خاں ٹاݪ ٻجو کہئی نا وی کونی ٹھاء۔ نی آسمان را فرشتا نی جی ݙیکرو۔ ³³ ۳۳۔ایئے رے خارو تھاں ہوشیار اَن جاگتا رہیا، اَن دُعا کرتا رہیا۔ کیانکہ تھاناں کونی ٹھاء کہ اُو ݙن کݙے ہوخے۔ ³⁴ ۳۴۔ایہ اُوئے منکھ آݪی کار ہے۔ جکو گھر چھوڑ ٻجے مُلکھ بوہو گیو۔ آن آپرے غلاماں نا اختیار اَن ہر ہیک نا اُوئے رو کام خُݨا ݙنو اَن چوکیدار نا حُکم ݙنو کہ خُجاگ رہوے۔ ³⁵ ۳۵۔ ایئے رے خارو خُجاگ رہو( کیانکہ تھاناں کونی ٹھاء کہ گھر رو مالک کݙے آخے۔آتھݨ ری جاں اَدھی رات رو جاں کُوکڑ رے ٻانگ ݙیوݨ آݪی بݪہ جاں خاکݪو ری۔) ³⁶ ۳۶۔ایئاں نی ہووے کہ اُو اچھتو آ تے تھاناں خُوتوڑا جووے۔ ³⁷ ۳۷۔آن جکو کچھ ہوں تھاناں کہیں وو او جی خاراں نا کہیں کہ خُجاگ رہو۔