¹ ۱۔ آن جݙے اُو یروشلم رے نیڑو زیتون رے پہاڑ تے بیت فگے ان بیت عنیاہ رے نیڑو آیو تو اُوے آپ رے چیلاں میں خاں ٻہیاں نا بہیر کریا۔ ² ۲۔آن اُواں نا کہیو جکو گاں تھارے خامھو ہے اُوے میں جاؤ آن اُوے میں بڑتے جی تھیں ہیک گݙہی رو ٻچیو ٻادھوڑو جوخو جکے تے اجاں تک کوئی منکھ کونی چڑھیو۔ اُوے نا کھول لے آو۔ ³ ۳۔آن جے کوئی تھاناں کہے کہ تھیں ایے نا کی کرخو۔ تو کہیا کہ ایشور نا ایے ری لوڑھ ہے آن او بیگو ایے نا پاچھو ݙخے۔ ⁴ ۴۔او گیا آن ٻچیے نا در رے نیڑو ٻاہر چوک میں ٻادھوڑو جویو۔ آن اوے نا کھولݨ لاگا۔ ⁵ ۵۔آن نیڑا ابھوڑا میں خاں کہیاں اواں نا کہیو کہ تھیں ایے کی کرئی وا تھاں ٻچیے نا کھولئی وا۔ ⁶ ۶۔اُواں یسوع رے کہوڑے رے مطابق اُواں نا کہیو آن اواں اواں نا لے جاوݨ ݙنو۔ ⁷ ۷۔او ٻچیے نا یسوع کݙے لایا آن آپرا گابھا اوے تے اُڈھیا آن او اوے تے ٻیٹھو۔ ⁸ ۸۔آن گھݨائی لوکاں آپرا گابھا مارگ میں بچھایا آن ٻجا فصل خاں لاماں باڈھے مارگ تے بچھائے۔ ⁹ ۹۔آن جکو آگیا آگیا جاتا آن ٻجا جکو لارے لارے آوتا ہتا او زور زور خاں نعرا لگاوتا ہتا۔ ایشور ری بݙائی ہوئے۔ دھن ہے جکو ایشور پرمیشور رے ناں خاں آوئی۔ ¹⁰ ۱۰۔دھن ہے مھانرے ٻاپ داؤد ری رجائی آئی وی۔ آکاش ماتھے وی دھن کرخے۔ ¹¹ ۱۱۔ آن او یروشلم میں ہیکل میں آیو آن خارے چیزاں نا جویو آن اُواں ٻارھاں بھیݪو بیت عنیاہ نی گیو کیانکہ آتھݨ ہوئی ہتی ری۔ ¹² ۱۲۔آن ٻجے ݙن جݙے او بیت عنیاہ خاں ٻاہر آیو تو اوے نا بُکھ لاگوڑی ہتی۔ ¹³ ۱۳۔ آن اوے پرہے خاں انجیر رو خاوو بݨ جو رو گیو کے متاں اُوے میں کہنیک لابھے پݨ جݙے اوے رے نیڑو آیو تو پاناں خاں ٹاݪ کیں کونی لابھو کیانکہ پھݪ ری مُند کونی ہَتی۔ ¹⁴ ۱۴۔پچھے اُوے اوے نا کہیو اگتے تیں خاں کݙے وی کوئی میوو کونی کھاوے آن اوے رے چیلاں وی خُݨیوں۔ ¹⁵ ۱۵۔ آن او یروشلم میں آیا آن او ہیکل میں بڑ رو اُواں ناں جکو ہیکل میں بپار کرتا وا ٻاہر کاڈھݨ لاگو آن صرافاں را پھٹا آن کبوتر بیچݨ آݪاں را کُھݙا اوندھا کریا۔ ¹⁶ ۱۶۔آن کہے نا وی ہیکل میں خاں کوئی ٹھاں ٹھیکر لے جاوݨ کونی ݙنو۔ ¹⁷ ۱۷۔آن اُواں نا خمجھایو کہ کی ایے کونی لِکھیوڑو کے مھارو گھر خارے قوماں رے خارو بھگتی رو گھر ہوخے۔ پݨ تھاں اُوے نا چوراں رے ٻیخݨ ری جگھہ بݨائی ری۔ ¹⁸ ۱۸۔جݙے موٹا دھرمی گُرواں اے خݨیوں تو اوے نا مارݨ رو مارگ لابھݨ لاگا۔ کیانکہ او اوے خاں ایئے رے خاروں ٻہتا ہتا کہ خاری عوام اُوے رے باتاں خاں حیران تھیتا ہتا۔ ¹⁹ ۱۹۔آن آتھݨ رو او شہر خاں ٻاہر جاتا ہتا۔ ²⁰ ۲۰۔ آن خاکلو رو جݙے او اتھ خاں ٹپیا تو جویو کہ انجیر رو بݨ جڑ خاں خوکو رو۔ ²¹ ۲۱۔پچھے پطرس نا یاد آیو آن اوے اوے نا کہیو گُرو جی انجیر رو بݨ جکے تے تئیں لعنت کری ہتی خوک گیو رو۔ ²² ۲۲۔یسوع بݪتی میں اواں نا کہیو کہ ایشور تے بھروسو راکھ کہ۔ ²³ ۲۳۔ہوں تھاناں خچی کہیں وو جکو کوئی ایئے پہاڑ نا کہیے کہ پٹیج جا آن سمندر میں جا پڑ آن آپرے دل میں شک نی لے آوے آن بھروسو راکھے کہ جکو اُو کہیئی وو ہو جاخے تو اُوے رے خارو او تھی جاخے۔ ²⁴ ۲۴۔ایئے خاروں ہوں تھاناں کہیں کے جکو تھیں دُعا میں مانگئی بھروسو راکھو کہ تھاناں ملیو رو تو تھاناں مل جاخے۔ ²⁵ ۲۵۔ آن جݙے تھاں دُعا رے خاروں ابھیجو تو جے کݙے تھاں کئی رے خارو کاݪ راکھئی تو معاف کرو تو تھارو ٻاپ وی جکو آکاش تے ہے تھارا پاپ معاف کرے۔ ²⁶ ۲۶۔آن جے تھاں معاف نی کرخو تو تھارو ٻاپ وی جکو آکاش تے ہے تھارا پاپ معاف کونی کرے۔ ²⁷ ۲۷۔ آن بݪے یروشلم میں آیا آن جݙے او ہیکل میں پھرتو وو تو دھرمی گُرو ان اُواں را بوڈھیا اُوے کڈھے آیا۔ ²⁸ ۲۸۔آن اوے نا کہیو کے تو کے رے زور خاں ایئے کرئی۔ آن ایہ زور تنے کے ݙنو ہے کہ ایاں کر۔ ²⁹ ۲۹۔ پچھے یسوع اُواں نا کہیو کے ہوں وی تھاں خاں ہیک بات پوچھیں جے تھاں بݪتی ݙنی تو ہوں وی تھاناں خُݨائخ کے ہوں کے رے زور خاں کرئی۔ ³⁰ ۳۰۔یوحنا رو پوتر شنان آکاش خاں ہتو یا منکھاں خاں مناں بݪتی ݙو۔ ³¹ ۳۱۔ پچھے او خوچݨ لاگا کہ جے مھاں کہیو آکاش خاں تو او کہخے تو تھاں اوے رو یقین کیاں نی کریو۔ ³² ۳۲۔تو پچھے کی ائیاں کہاں کے منکھاں خاں تو او منکھاں خاں ٻہتا ہتا کیانکہ خارا یوحنا نا خچو سنت خمجھتا ہتا۔ ³³ ۳۳۔پچھے اُواں یسوع نا کہیو مھاناں کونی ٹھاہ یسوع اواں نا کہیوں ہوں وی تھاناں کونی خُٹاوتو کہ ہوں کے رے زور خاں ایہ کرئی وو۔