¹ ۱۔آن اوتھ خاں روانہ ہو ان او یہودیہ رے علاقے میں آن اُردن رے پار آیو ۔ آن پچھے ٹوݪو اُوے کڈھے بھیݪو ہو گیو آن او آپرے قانون رے مطابق اواں نا تعلیم ݙیوݨ لاگو۔ ² ۲۔آن فریسی اُوے کڈھے آیا آن اُوے نا آزماوݨ خارُو اُوے خاں پُوچھیو کہ کی ایہ جائز ہے کہ مرد آپری لُگاآی نا چھوڑ ݙے۔ ³ ۳۔اُوے اواں نا بݪتی ݙے کہیو کہ موسٰی تھانا کی حُکم ݙنو ہے۔ ⁴ ۴۔اُواں کہیو کہ موسیٰ اجازت ݙنی ہے کہ طلاق نامو لکھ چھوڑ ݙے۔ ⁵ ۵۔پر یسوع اُواں نا کہیو اُوے تھانری سخت دِلی ریی وجہ خاں تھانرے خارُو ایہ حُکم لکھیو ہتو۔ ⁶ ۶۔پݨ خلقت رے شروع خاں ایشور اُوے نا نر ناری بݨایا۔ ⁷ ۷۔ایئے خارُو مرد آپرے ٻاپ آن ماں نا چھوڑخے آن آپری لُگائی کڈھے رہخے۔ ⁸ ۸۔ان او ٻنھائیں ہیک تن ہوخے ہمے او ٻے کوننی بلکہ ہیک ہے۔ ⁹ ۹۔پݨ جکے نا ایشور جوڑیو ہے اُوے نا انسان جُدا نی کرے۔ ¹⁰ ۱۰۔آن گھر میں اُوے رے شاگرداں اُوے خاں اُوے بات رے بارے میں بھݪے پُوچھیو۔ ¹¹ ۱۱۔آن اُوے اُواں نا کہیو جکو کوآی آپری لُگائی نا چھوڑے آن ٻجی خاں بیہاں کرے تو او اُوے رے خلاف زنا کرئی۔ ¹² ۱۲۔جے کوئی لُگائی آپرے دھݨی نا چھوڑ ݙے آن ٻجے خاں بیہاں کرے تو زنا کرئی۔ ¹³ ۱۳۔ پھچے لوگ ٻاݪاں نا اُوے کڈھے لے آیا کہ او اواں تے ہاتھ راکھ برکت ݙے پݨ چیلاں اواں نا دڑکا ݙنا۔ ¹⁴ ۱۴۔یسوع ایہ جو راضی نی ہویو۔ آن اواں نا کہیو کہ چھوٹے ٻاݪاں نا مھیں کڈھے آوݨ ݙو اُواں نا روکو نی کیانکہ ایشور ری بادشاہی ایاں جیڑھاں ری جی ہے۔ ¹⁵ ۱۵۔ ہُوں تھاناں خچی کہیں جکو کوئی خُدا ری بادشاہی نا چھوٹے ٻاݪاں آݪیکار قبول نی کرے اور اُوے میں بالکل داخل کونی ہو خگے۔ ¹⁶ ۱۶۔پچھے اُوے اواں نا آپرے کھوݪے میں لِنھا آن اُواں تے ہاتھ راکھ اُواں نا برکت ݙنی۔ ¹⁷ ۱۷۔ آن جݙے او نکݪ ان مارگ میں آیو ہیک منکھ اُوے ݙخا ناخ آیو۔ آن اُوے رے آگے گوݙا تاݨی ٻیخ اُوے خاں پُوچھیو۔ اے نیک اُستاد ہُوں کی کراں تاکہ خداں ری زندگی حاصل کراں۔ ¹⁸ ۱۸۔یسوع اُوے نا کہیو تُو منا نیک کیاں کہیں کوئی نیک کونی پݨ ہیک خُدا ہے۔ ¹⁹ ۱۹۔تُو حکماں خاں تو واقف ہے۔ زنا نی کر۔ خون نی کر۔ چوری نی کر۔ کُوڑی گواہی نی ݙے۔ دھوکو نی ݙے۔ آپرے ماں ٻاپ ری عزت کر۔ ²⁰ ۲۰۔ آن اُوے اواں نا کہیو اے اُستاد ایئاں خاریاں تے ہُوں چھوٹے تھکے خاں کرتو آیو ہاں۔ ²¹ ۲۱۔جݙے یسوع اُواں تے نگاہ کری آن عزیز جاݨیو۔ آن اُوے نا کہیو ہیک بات ری تھیں میں کمی ہے جا آپرو خارو کجھ بیچ ݙے آن گریٻاں ناں ݙے تو تناں آسمان تے خزانو لادھخے۔ آن پچھے مھارے لارے آ رو۔ ²² ۲۲۔ایئے بات تے اُوے رے مھانݙے تے اُداسی چھا گی آن او غمگین ہو بُوہو گیو کیانکہ اُوے ری گھݨی دولت ہَتی۔ ²³ ۲۳۔ تو یسوع نظر مار آپرے شاگرداں خان کہیو۔ خُدا ری بادشاہی میں دولتمند رو جاوݨ کِترو مُشکل ہے۔ ²⁴ ۲۴۔شاگرد اُوے ری باتاں خاں حیران ہویا۔ تو یسوع بھݪے مخاطب ہو آن اواں نا کہیو ٻاݪاں ایشور ری بادشاہی میں جاوݨ کِتو مُشکل ہے۔ ²⁵ ۲۵۔خُوئی رے ناکے خان اُونٹ رو گزر جاوݨ دولت مند رو ایشور ری بادشاہی میں جاوݨ خاں آسان ہے۔ ²⁶ ۲۶۔ او گھݨا حیران ہو آپت میں کہوݨ لاگا پچھے کݨ مُگتی پا خگئی۔ ²⁷ ۲۷۔یسوع اُواں تے نگاہ کر کہیو کہ منکھاں خارُو ایہ ممکن کونی پݨ ایشور خارُو کونی کیانکہ ایشور خارُو ہر چیز ممکن ہے۔ ²⁸ ۲۸۔آن پطرس اُوے نا کہوݨ لاگو جو مھیں خارو کجھ چھوڑ ݙنو ہے۔ ان تھارے لارے آیو رو۔ ²⁹ ۲۹۔ یسوع کہیو ہُوں تھانا خچی کہیں ایہڑو کوئی کونی جکے گھر جاں بھایا جاں ٻہناں جاں ماں ٻاپ جاں ٻاݪ ٹینگر جاں زمیناں نا مھارے خارُو جاں انجیل خارُو چھوڑ ݙنو ہوے۔ ³⁰ ۳۰۔جکو ہمیں ایئے زمانے میں خؤ گُنا کونی پاوے۔ گھراں آن بھائیاں آن ٻہناں آن ماواں آن ٻاݪ ٻچاں آن زمیناں میں ظلم آوݨ آݪے زمانے میں اِیشور ری زندگی۔ ³¹ ۳۱۔پݨ گھݨا جکو آگے ہے او لارے ہوجاخے آن جکو لارے ہے او آگے۔ ³² ۳۲۔ ان او یروشلم جاوتا مارگ میں ہَتا۔ ان یسوع اُواں رے آگے آگے بیوتو ہَتو۔ ان او حیران ہوݨ لاگا۔ ان جکو لارے لارے بیہوتا وا او ٻیہوتا وا۔ پچھ او ٻارھے نا بھیݪو لے اُواں نا کہوݨ لاگو کہ مھیں تے کی کی ہوݨ آݪو ہے۔ ³³ ۳۳۔جووہ مھاں یروشلم ݙخا جاوی اَن منس پُتر اِیشور رے موٹے پُجاریاں ان فقیہاں رے حوالے کریو جاخے۔ ان اُوے ری موت رو فیصلو کرخے ان اُوے نا غیر قوماں رے حوالے کرخے۔ ³⁴ ۳۴۔او اُوے خاں ہاخا کرخے ان اُوے تے تھُوکخے۔ اُوے نا کوڑا مار تے ان اُوے نا قتل کرخے ان اور تین ݙن بعد جی اُٹھخے۔ ³⁵ ۳۵۔تو زبدی رے ݙیکراں یعقوب ان یوحنا اواں کڈھے آن کہیو کہ اے اُستاد مھاں چاہویں کہ جکو کجھ تھیں خاں مانگاں تُو مھانرے خارُو کر۔ ³⁶ ۳۶۔اُوے اُواں نا کہیو تھیں کی چاہوی کہ ہُوں تھانرے خارُو کراں۔ ³⁷ ۳۷۔اُواں اُوے نا کہیو مھاں نا تھاری جلال ری بادشاہی میں ہیک تھارے خاجڑی ہیک کھاٻڑی ٻیخے۔ ³⁸ ۳۸۔جݙے پربھُو یسوع اوان نا کہیو تھاں کونی جاݨتا تھیں کی مانگئی ووا۔ جکو پیالو ہوں پیئیں کی تھیں پی خگئی۔ جاں جکو بپتسمو ہُوں لئیں تھیں لے خگوئی۔ ³⁹ ۳۹۔اُواں اوے نا کہیو مھاں لے خگئیں ایئے تے یسوع اُواں نا کہیو کہ جکو پیالو ہُوں پیئیں تھاں وی پیخو ان جکو بپتسمو ہُوں لئیں تھیں لیخو۔ ⁴⁰ ۴۰۔پݨ آپرے خاجڑی جاں کھاٻڑی کئی نا ٻیخاݨݨ مھارو کام کونی خِوا اُواں رے جکاں خارُو تیار کریو گیو ہے۔ ⁴¹ ۴۱۔ ان او ݙخ ایہ خݨ یعقوب ان یوحنا تے خفا ہوݨ لاگا۔ ⁴² ۴۲۔جݙے یسوع اُواں نا کڈھے ہیلو کر اُواں نا کہیو تھیں جاݨآی کہ او جکو غیر قوماں را خردار خمجھیا جاوی۔ اُواں تے حُکم چلاوی۔ ان اُواں را وزیر اُواں تے اِختیار جِتاوتا۔ ⁴³ ۴۳۔ پݨ تھاں میں ایہڑو کونی۔ بلکہ جکو تھاں میں موٹو ہوݨ چاہوے اور تھانرو خادم بݨے۔ ⁴⁴ ۴۴۔ آن جکو تھاں میں پیلکو ہوݨ چاہوے او خاراں رو غلام بݨے۔ ⁴⁵ ۴۵۔ کیانکہ منش پُتر وی ایئے خارُو کونی آیو جو خِدمت کراوے بلکہ ایئے خارُو کہ خِدمت کرے آپ آپری جان گھݨا خارُو قُربان کرے۔ ⁴⁶ ۴۶۔پچھے او یریحو میں آیا۔ آن جݙے او آپرے شاگرداں آن موٹے ٹوݪے خمیت یریحو خاں نکݪتو ووہ تو تیمائی رو ݙیکرو بیتمائی آندھو فقیر مارگ کِنارے ٻیٹھو ہَتو۔ ⁴⁷ ۴۷۔ایہ خݨ او یسوع ناصری ہے رڑے کر ان کہوݨ لاگو اے داؤد را ݙیکرا یسوع مھیں تے رحم کر۔ ⁴⁸ ۴۸۔آن گھݨا اُوے نا دڑکایو کہ چپ کر پݨ او ٻجو وی زور زور خاں کہیو کہ اے داؤد رے ݙیکرے مھیں تے رحم کر۔ ⁴⁹ ۴۹۔ جݙے یسوع ابھیج کہیو کہ اُوے نا ہیلو کرو۔ اوان اوئے آندھے نا اے کہ ہیلو کرایو کہ حوصلو راکھ اُٹھی تنا او ہیلو کرئی۔ ⁵⁰ ۵۰۔او آپرو گابھو ناکھ ان ٹپو کھادو آن یسوع کڈھے آیو۔ ⁵¹ ۵۱۔ یسوع اُوے نا بݪتی ݙے کہیو کہ تو کی چاہویں کہ ہُوں تھارے خارُو کراں اُوے آندھے کہیو ربونی ایہ کہ ہُوں جوݨ لاگاں۔ ⁵² ۵۲۔یسوع اُوے نے کہیو جا تھارے ایمان تھنا بچایو ہے۔ آن اُوے گھری او جوݨ لاگو آن مارگ میں اُوے بھیݪو ہو گیوا۔