¹ ۱۔ اُوے گھڑی چیلا پربھویسوع کوڈھی آیا آݨ کہوݨ لاگا ایشور ری راجائی میں موٹو کوݨ ہے۔ ² ۲۔ پربھو یسوع آپرے کوڈھیاہیک ٻاݪ ناں ہیلو کیو آݨ اُوے ناں بیچ میں ٻیخاݨیو۔ ³ ۳۔ آݨ کہیو کے ھوں تھاناں خچی کہیں کے جیسی تائیں تھیں توبہ کر، تے ائیے ٻاݪ آݪی کر نی تھیخو اتیری تائیں تھیں ایشور ری راجائی میں کونی داخل تھیو۔ ⁴ ۴۔پݨ جکو آپرے آپ ناں ائیے ٻاݪ آݪی کر نعماݨو کرخے اُو ماݨخ ایشور ریراجائی میں خاراں خاں موٹو ھوخے۔ ⁵ ۵۔ آݨ اُو جکو ائیے نڈھیے ٻاݪ ناں مانجے ناں (نام) خاں قبول کرخے اُو مناں قبول کرئی۔ ⁶ ۶۔ آݨ جکو ائیاں نڈھیاں میں خاں میں تے وشواش لے آوے کہئں ناں نقصان ݙئی تو اُوے رے خاروں بھلو ہے کے اُوے رے گݪے میں گھرٹی رو پاٹ ٻاندھ رو سمندر میں ناکھیو جاوئے۔ ⁷ ۷۔ ٹھوکراں رے کرے جگت تے افسوس ہے جکے ری وجہ تھوݙو (ٹھوکر) آویں۔ ⁸ ۸۔ جیکݙے تاجو ہاتھ یا پُگ تناں تھوݙو ݙیوݨ رو سبب بݨے تو توں اُوے ناں باڈ چھوڑ ھاں آپرو آپ خاں دھار کر چھوڑ ۔ منڈو ٹونڈو تھی تے خورگ میں جاؤݨ تاجے خاڑوں بھلو ہے، ٻہیں ہاتھ تے پُگ نرگ میں جاویں۔ ⁹ 9۔ جیکݙھیں تاجی آنکھ ٹھوکر ݙیوݨ ری سبب بݨیئ تو توں اُوے ناں کاڈھ آݨ کاݨو ہو تے خورگ میں جاوݨ تاجے پگا بہتر ہے کہ توں ٻہیاں آنکھیاں رے ہوتے توں جہنم رے باخݙے میں ناکھیو جاوئے۔ ¹⁰ ۱۰۔ جوؤ تھیں اِے چھوٹا میں خاں کہیں ناں گھٹ نی خمجھو، ھوں تھاناں کہیݨ وہ کہ آکاش تے اُوے را فرشتہ مانجے پتا رے چہرے ناں جکو آکاش تے ہے جووئ۔ ¹¹ ۱۱۔ کیانکہ ابن آدم بھٹکیوڑاں ناں بچاوݨ آیو ہے ¹² ۱۲۔ تھیں کی خوچئی پیا؟ ہیک ماݨخ کوڈھی خو(سو)(100) ریڈھاں ہوئے آݨ اُوے میں ہیک ریڈھ گومیجے ری تو اُو کی نڑانوے ناں ٹکر تے چھوڑ رے کی اُو اُوے ہیکی ریڈھ ناں لابھݨ (جووݨ) کونی جاوئے؟۔ ¹³ ۱۳۔جیکݙھیں اُو اُوے ناں لابھے ری تو ھوں تھاناں خچی کہیں وہ کہ گُم تھیوڑی ریڈھ ری خوشی نڑانوے ریڈھاں خاں گھݨی ھوخے۔ ¹⁴ ۱۴۔ ائیاں ہی آکاشی پتا کونی چاھتو کے نیڈیا وی ہلاک ھوئے۔ ¹⁵ ۱۵۔جیکݙھیں تاجو بھائی تاجے خلاف پاپ کرے تو توں جا رو اُوے ناں اُوے ری غلطی خوݨاں، جے تاجی بات ناں خوݨے تو توں اُوے ناں آپ رو بݨائیخ رو۔ ¹⁶ ۱۶۔ جیکݙھیں تاجی بات کونی خݨتو تو توں آپرے بھیݪو ہیک یا ٻئہیاں بھائیاں ناں لے جا کیاں کے اُو ہر لفظ را شاہد ہوئے۔ ¹⁷ 17۔ آݨ اُو ائیاں ری خوݨݨ نی چاوئے تو خارو معاملو منڈݪی (کلیسیا) ناں خوݨاوے آݨ منڈݪی ری بھی نی خاݨے توپچھے غیراقوام آݨ چونگی لیوݨ آݪا رے حوالے کیوجاوے۔ ¹⁸ ۱۸۔ھُوں تھاناں خاں خچ کہیں پیو، کہ جکو کجھ تھیں زمین تے باندھ خو اُو آکاش تے بھی باندھیو جاخے آݨ جکو کجھ زمین تے کھولخو اُو ہی آکاش تے کھلخے۔ ¹⁹ ۱۹۔ بیڑے ھُوں تھاں کہیں پیو جیکݙھیں تھاں میں خاں ٻئے منکھ زمین تے کہیں بات رے خاروں جیکر اُو چاویں راضی ہوئے تو اُو مانجے پتا ری طرف خاں جکو آکاش تے ہے اُواں رے خاروں ہوخے ری۔ ²⁰ ۲۰۔ کیاں کے جِتھے ٻئے یا تین منکھ مانجے ناں خاں بھیݪا ہُوئی ھُوں اُوئاں بھیݪو ہُوئیں۔ ²¹ ۲۱۔ پطرس آیو آݨ پربھویسوع ناں کپوݨ لاگو، پربھو اگر مانجو بھائی مانجے ݙوھ کرے تو ہُوں اُوے ناں کیرا پھیرا بخکاں (معاف)؟ " کی ساتھ پھیرا؟" ²² ۲۲۔ پربھویسوع اُوے ناں کہیو، ہُوں تھاناں ساتھ پھیرا نی پݨ خِتر پھیرا کہیں پیو۔ ²³ ۲۳۔ ائیے رے خاروں آکاش ری راجائی اُوے راجا آݪی کر ہے جکو آپرے نوکراں خاں حِخاب کِتاب لیوݨ چاہتو پیو۔ ²⁴ ۲۴۔ آݨ جاں ہی اُوے حِخاب کرݨ شروع کیو، اُوے کوڈھی اُو نوکرل؟ لِیایو گیو جکے ناں ݙخ (دس) ہزار روپیا اُدھار تے ݙھنا گیا ہُتا۔ ²⁵ ۲۵۔ پݨ اُوے کوڈھی قرض ݙیوݨ رے خارو پیخا کونی ہُتا۔ اُوے رے مالک حُکم ݙنوں کہ اُوے آݨ اُوے ری لُگائی آݨ ٻاݪا ناں بیچ را رقم پوری کی جاوے۔ ²⁶ ۲۶۔جݙے نوکر کھریو رو آݨ نگڑ رو کہیوݨ لاگو۔ اُوے مالک میں تے ݙایا کر ہُوں تاجو خارو قرض اُتار ݙیئخ رو۔ ²⁷ ۲۷۔ مالک ناں اُوے تے ترس آیو آݨ اُوے اُوے ناں چھوڑ ݙنو آݨ اُوے رو خارو قرض بخک ݙنو۔ ²⁸ ۲۸۔ پچھے اُو نوکر گیو آݨ اُوے رو ٻجے نوکر نی ہیک خَو رپیو قرض ݙنو ڑو ہتو۔ اُوے ناں جھال رو گھٹو ݙے رو کہیو۔ "مناں پئیخا ݙے جکو تیں میں خاں قرض لیو ہیں ۔ ²⁹ ۲۹۔ ٻجوڑو نوکر ہیٹھو نگڑیو آݨ منت کر ری کہیوݨ لاگو تھوڑو صِبر کر ہُوں تاجو خارو قرض تنا ݙئیخ رو۔ ³⁰ ۳۰۔ پݨ پہلکو نوکر نی منیو۔ آݨ اُوے ناں قید کرواݙنو۔ جِتی تائیں اُو قرض نی ݙے۔ ³¹ ۳۱۔ جݙے اُوے ناں ٻجاں نوکراں ݙٹھو کہ اِے کی تھیو ہے اُو گھݨاں ݙُکھی تھیا، اُو گیا آݨ آپ رے مالک ناں خرو کجھ کہے ݙنو۔ ³² ۳۲۔ پچھے اُوے نوکر رے مالک اُوے ناں آݨوایو آݨ کہیو، " اِے چلاک نوکر، تنا تاجو خرو قرض بخک ݙنو۔ کیاں کےتیں مناں منت کی ہتی۔ ³³ ۳۳۔ کی تناں ٻجوڑے نوکر تے ݙایا کونی کرݨی کھپتی، جاں میں تیں تے ݙایا کی۔ ³⁴ ۳۴۔ اُوے رے مالک ناں ریخ آئی آݨ اُوے ناں پولیس رے حوالے کیو۔ جِتی تائیں اُو قرض پاچھو نی ݙے۔ ³⁵ ۳۵۔ جݙے مانجو آکاشی پتا وی تھاں خاں ائیاں ہی کرخے۔ جِتی تائیں تھیں آپ رے بھائی ناں پورے مَن خاں نی بکخو۔ (معاف نی کرخو)