باب۱۷
1
۱۔ چھ ݙناں خاں پچھے پربھویسوع پطرس یعقوب آݨ یوحنا رے بھائی ناں ہیکے اُونچے پہاڑ تے لے گیو۔
2
۲۔ اُوے ری خورت اُواں اگیا بدل گی۔ اُوے رو مہانݙو خورج آݪی کر چمکݨ لاگو، آݨ اُوے را گابھا اُوجاݪے آݪی کر چمکݨ لاگا۔
3
۳۔جوؤ اُواں ناں ایلیاہ آݨ موسٰی سنت اُوے خاں باتاں کرتا نظر آیا۔
4
۴۔ پطرس پربھویسوع ناں کہیو، ایشور مھارو اِتھے ہُوّݨ بھلو ھے۔ جیکݙھں توں چاویں تین جگاہواں ٹھاواں ہیک تاجے خاروں ہیک ایلیاہ آݨ ہیک موسٰی رے خاروں۔
5
۵۔جݙے اُو کہیوتو ہی پیو آݨ باݙݪ میں خاں ہیک آواز آئی،" اِئیے مانجو پیارو ݙیکروہے۔ جکے خاں ھوں ݙاڈھو راضی ھاں،"اِئیے ری خݨو"
6
۶۔ جݙے چیلا اِے خݨیو اُو اُوندھا مانݙے کھریا آݨ ݙاڈھا ٻہیا۔
7
۷۔پچھے پربھیسوع آیو آݨ اُواں ناں ہاتھ لگا رو آݨ کہیوݨ لاگو ٻیھو نی۔
8
۸۔ پچھے اُواں ماتھے ݙٹھو تو اُواں ناں پربھویسوع خاں ٹاݪ ٻیجوکوئی نظرکونی آیو۔
9
۹۔ جݙے اُوجبل (ٹکر) خاں اُترتا پیا تو پربھویسوع اُواں ناں وچن ݙی کہیو، جتری تک اِبن آدم مؤوڑاں خاں جی نی اُوٹھے کہیں ناں اِے بات نی کریا۔
10
۱۰۔ چیلاں اُوے ناں کہیو، عالم اِے کیاں کہی کہ ایلیاہ رو پہلی آوݨ ضرورھے۔
11
۱۱۔پربھویسوع جواب ݙھنو آݨ کہیو،"ایلیاہ بے شک آخے آݨ خارے چیزاں پورے کرخے۔
12
۱۲۔ پݨ ھُوں تھاناں اِے کہیں کے ایلیاہ آیو رو پݨ اُواں اُوے ناں کونی اُوݪکھیو، پݨ اُوے خاں جکو من چاہوے کریو، ائیاں ائہں ابن آدم بھی اُواں رے ہاتھاں خاں ݙُکھ کھݨ خے۔
13
۱۳۔پچھے چیلان اِے خمجھ گیاکہ اُو یوحنا پویترشنان ݙیوݨ آݪے رے بارے میں کہی پیو۔
14
۱۴۔جݙے اُو ٹوݪے رے کوڈھیا آیو تو ہیک منکھ اُوندھا گوݙاں تائیں نوگڑرو اُوے خاں کہیݨ لاگو۔
15
۱۵۔ ایشور مانجے ݙیکرے تے کرپا کر کیاں کے اُو مِرگی خاں ݙاڈھو ݙُکھ (تکلیف) میں ہے۔ اُو خدھاں باخݙے یا پاݨی میں خریئی رو۔
16
۱۶۔ ھوں اُوے ناں تاجے چیلاں کوڈھیا لے آیو، پݨ اُو اُوے ناں بھلاں کونی کرخگھیا۔
17
۱۷۔پربھیسوع جواب ݙھنو آݨ کہیو،" اِے بے یکیناں آݨ حرکتی نخل ھوں کتری تک تھاں بھیݪو رہیخ؟ ھُوں کتری تک تھاری خہیخ؟ اُوے ناں میں کوڈھی لے آؤ۔
18
۱۸۔ پربھویسوع اُوے ناں دڑکو ݙھنو آݨ بھونت اُوے رے بدن (جسم) خاں نخیر گیو، آݨ اُو چھوکرو اُوہی گھڑی بھلاں تھی گیو۔
19
۱۹۔پچھے چیلاں اُوےکوڈھیاں ھکھلائی میں آیا آݨ کہیو،" مھاں اُوے ناں کیاں کونی کاڈھ خگھیا؟
20
۲۰۔ پربھویسوع اُواں کہیو، تھارے تھوڑے بخواخ رے خاروں، ھُوں تھاناں خچی کہیں جیکݙھن تھاں میں خرّم (تُوّر) رے ݙاݨہ جیترو بھی بخواخ وے تو تھیں جبل (ٹکر) ناں کہو کہ ایتھ خاں ٹݪ جارو تو ائیائیں تھیخے، آݨ تھارے خاروں کوئی کام نی تھیݨ جہڑو کونی وہے۔
21
۲۱۔ پݨ اِئیے قسم را بھنت دُعا آݨ روزے رے ٹاݪ کونی کاڈھ خگھتا۔
22
۲۲۔گلیل میں ٻیٹھوڑے وقت پربھویسوع چیلاں ناں کہیو، اِبن آدم منکھاں رے حوالے کیوجاخے۔
23
۲۳۔ آݨ اُو اُوے ناں مارخے رو آݨ تیجے ݙھین اُو جیوتو کیو جاخے، چیلاں گھݨاں پریشان ھُویا۔
24
۲۴۔ جݙے اُو کفرنحوم میں آیا تو چُونگی لیوݨ آݪاں پطرس رے کوڈھیا آیا آݨ کہیو، کی تاجو اُستاد (گرو) آدھی چونگی ݙیخے؟
25
۲۵۔اُوے کہیو ہاں پݨ جݙے پطرس پاچھوگھرے آیو، تو پربھویسوع اُوے رےٻولݨ خاں پہلی ہی کہیو۔ شمعون! توں کی خوچئیں پیو؟ دھرتی را بادشاہ کے خاں جزیہ یا خراج لے وی؟ آپری عوام خاں یا پرائیاں (مخیواڑ یا ٹھیکو لے وی پیا؟
26
۲۶۔ جݙے پطرس کہیو، پرائیاں خاں، تو پربھویسوع اُوے ناں کہیو،"تو پچھے عوام اُوے ناں ادا کرݨ خاں آزاد ہے پچھے اِئیے خاں آزاد ہے
27
۲۷۔ پݨ اِئیاں نی ہوے کہ مھیں چُونگی لیوݨ آݪے رے خاروں پاپاں (گناہواں) رو خیبب بݨاں۔ اِئیے خاروں سمندار تے جاؤ کنڈی ناکھو، آݨ جکو پہلی مچھی اُونچا آوے اُوے ناں چھالوری جݙے تھیں اُوے رو مھانݙو کھول خورو تو تھیں اُوے میں خاں پیخو(روپیہ) لابھخے، اُوے ناں لیے رو آݨ چُونگی لیؤݨ آݪے ناں مانجے آݨ آپ رے خاروں ݙے ݙیا۔