¹ خونو کیکر سوکھ گیو خچو خونو کیکر بدل گیو۔ پویتر پتھر کیکر ہر گھر میں بٹیج گیو۔ ² صیون را گھݨاں خارا منکھ خچے خونے خاں بݨیوڑا ہے۔ کیکر مٹی رے ٹھیکراں آݪی کار گُݨیا گیا ہے۔ ایہ تو کمبھار رے ہاتھ رو کام ہے۔ ³ گیدڑے وی آپری چھاتی کھولی اَن آپرے ٻچیاں نا ݙودھ پلاوئی۔ پݨ ہمارے ݙیکرے رِݨ پَٹ رے شتر مُرغ آݪی کار آپرے من نا کاٹھوکریو رو۔ ⁴ ناسوماں ری زبان ترخ خاں تاݪو خاں جا لاگی۔ چھوٹا ٻاݪیا ٻاٹی مانگئی۔ پݨ کوئی کونی جکو اُوئاں نا توڑ ݙیوے۔ ⁵ جکو بھَلا کھاݨاں کھاوݨ آݪا ہَتا۔ او گھراں میں بے ہوش ہوا پیا ہے۔ جکو قرمزی گابھا پہر اَن موٹا ہوا ہے۔ او اَکوڑی نا کھوݪے میں گھاتے ٻیٹھا ہے۔ ⁶ ہمارے ݙیکریاں ری بُرائی سدوم رے پاپ خاں موٹی ہے اَن اُو اُوئاں تے ہاتھ گھاتے بغیر جی ہیک جی گھڑی میں اُلٹا ݙنا گیا ہَتا۔ ⁷ اُوئاں رے منکھ برف خاں گھݨا اَچھا اَن چٹے ݙودھ خاں وی زیادہ چِٹا ہَتا۔ اُوئاں را ݙیݪ رتے رنگ خاں وی گھݨا راتا لال ہَتا۔ وہ نیلم خاں وی گھݨا چمکتا ہَتا۔ ⁸ اُوئاں را مھانݙا ہمے راکھ خاں وی گھݨا کاݪا ہے۔ اُوئاں نا گھراں میں کوئی کونی اوݪکھتا۔ اُوئاں ری چاٻڑی ہاݙکھیاں نا لاگ گی ری۔ او خُک لکڑی آݪی کار تھی گیا را۔ ⁹ تلوار خاں ماریوڑاں رو حال بکھ خاں مَریوڑاں رے حال خاں بھلو ہے کیانکے یہ زمیں میں پیداوار نی ہووَݨ رے کرے بکھ خاں مَریوڑا مَریوڑا رہوتا رہے۔ ¹⁰ موم خاں وی نرم دل لُگایاں آپرے جی ہاتھ خاں آپرے ٻاݪاں نا اُٻاݪ اَن پکایا۔اِئیاں مھارے ݙیکریاں رو مَرݨ اُوئاں رو پیٹ بھرݨ تھیو۔ ¹¹ پرمیشور آپرو کاݪ برخایو۔ اَن آپری ریخ پٹکی اُوئے صیون میں ہیک باخݙے لگائی جکو اُوئے رے بنیاداں نا ٻاݪ پدھر کر ݙنو۔ ¹² دھرتی رے بادشاہواں نی منیا اَن نی جی دھرتی رے منکھاں میں خاں کہ دشمن یروشلیم رے پھاٹکاں میں بڑ جاخے را۔ ¹³ اُوئاں رے سنتاں رے گلتیاں اَن ایشور رے پُجاریاں رے برائیاں (جکاں اُوئے میں خچیاراں رو لوہی بہایو ہے) ¹⁴ او اندھا تھی را گھراں میں تھوݙا کھاوتا اَن لوہی خاں بھریوڑا اِتری تک کہ کوئی اُوئاں رے گابھا نا وی ہاتھ کونی لگا خگتا ہَتا۔ ¹⁵ اُوئاں نا رَڑے کر اَن کہیو جاتو کہ اݪگا تھیو۔ پلیت ہو، اݪگا تھیو، اݪگا تھیو ۔ ہاتھ نی لگاو۔ جݙے او آواراں پھرتا وا تو ٻجے قوم آݪا کہتا ہَتا کہ ہمے ایہ اِیتھے کونی رہوئے۔ ¹⁶ پرمیشور رے کرود اُوئاں نا گندا کریا۔ اُو اُوئاں نا بݪے کونی جووئے ایشور رے پوجاریاں ری عزت کونی ہوتی ہَتی۔ اَن نی جی سنتاں تے ݙیا کی جاتی ہَتی۔ ¹⁷ کُوڑی مدد رے انتظار میں مھارے آنکھے اندھے تھی گے۔ مھاں آپرے آنکھیاں خاں اُوئے منکھاں نا جووتا رہیا جکو مھاناں بچا نی خگیا۔ ¹⁸ او مھارا پَگ جووتا پھرئی۔ اِتری تک کہ مھاں آپرے گھراں میں وی کونی پھر خگتا ہَتا۔ مھارا ݙن نیڑا آیا۔ مھارا ݙن مک گیا ہاوے۔ مھاری آخر تھی گی۔ ¹⁹ مھارو پیچھو کرݨ آݪا بیرے رے باز خاں وی تیز اُݙتا ہَتا۔ اُوئاں پہاڑاں تے وی مھارو پیچھو کریو۔ اُوئاں رݨ پٹ میں وی مھاناں ذلیل کریا۔ ²⁰ مھارے ناک میں خاخ پرمیشور رو ہے۔ اُوئاں رے کھݙا میں جھلیجا گیا۔ اُوئے رے بارے میں مھاں کہوتا ہَتا کہ اُوئے ری چھاں میں مھاں ٻے قوماں میں جیوتا رہوخا۔ ²¹ اَے ادُوم ری ݙیکری جکو عُوض ری دھرتی تے رہوتی۔ راجی ہو اَن خوشی کر تئے تک وی پیالو پُگ جاخے۔ تُو بے ہوش ہوئیخ اَن اُوگھاڑی کی جائیخ۔ ²² اَے صیون ݙیکری تھاری بُرائی ری سزا پوری تھی او بھݪے تناں کونی جھلواوے۔ اَے ادُوم ری ݙیکری او تھارے بُرائی ری سزا ݙیخے اَن تھارے پاپاں نا ظاہر کرخے۔