¹ اَے پرمیشور جکو کچھ مھاں تے ہویو اُوئے نا یاد راکھ۔ دید کر اَن جو مھاری شرمندگی نا۔ ² مھارےمݙے پردیسیاں نا اَن مھارا گھر اوپراں ݙنا گیا ہے۔ ³ مھاں یتیم اَن بنا ٻاپ رے ہوا را مھارے ماواں رانݙٻیر آݪی کار ہے۔ ⁴ مھاں نقد چاندی ݙے اَن پاݨی پیوتا۔ اَن پیخا ݙے اَن لکڑے لیتا ہَتا۔ ⁵ مھاں خاں گھݨو کام لیوتا ۔ مھاں تھک گیا را پݨ مھاناں آرام کونی ملتو ہَتو۔ ⁶ مھاں مصر اَن اسور ݙیخا آپرو ہاتھ کرئیں ایئے رے خارو کہ مھاں دھاپ جاواں۔ ⁷ مھارے ٻاپ ݙاݙے پاپ کریو۔ پݨ ہمے او دھرتی تے کونی اَن مھاں اُوئاں رے پاپ ری سزا اُکھݨئی وا۔ ⁸ نوکر مھاں تے حکومت کرئی۔ اَن ٻجو کوئی کونی جکو مھاناں اُوئاں رے ہاتھ خاں چُھڑاوے۔ ⁹ مھاں جنگݪ میں شکار کر اَن کھاوݨ رے خارو لے آواتا رئے۔ ¹⁰ کاݪ رے زہر رے کرے مھارا مھانݙا تندور آݪی کار خَڑ گیا را۔ ¹¹ صیون میں لُگایاں نا اَن یہوداہ رے شہراں میں کنواریاں رے بے عزتی کی گی۔ ¹² سرداراں نا اُوئاں رے ہاتھ خاں لٹکایا گیا۔ بوڈھیا رے مھانݙے رو وی لحاظ کونی کریو گیو۔ ¹³ نوجوان چکی رو پاٹ اُکھݨیو۔ اَن چھوکراں کوئلے خاں نیچا تھوݙو کھادھو۔ ¹⁴ مارگاں میں کوئی بوڈھیا باقی کونی بچیا۔ اَن نوجوانوں رو گاوݨ بجاوݨ ختم ہو گیو۔ ¹⁵ مھارے من خاں خوشی گئی ری۔ مھارو جھومراں رومݨ ماتم میں بدل گیو رو۔ ¹⁶ تاج مھارے ماتھے خاں کھِر گیو رو مھارو رووَݨ پِٹݨ مھاں پاپ کریو ہاں۔ ¹⁷ ایئے رے کرے مھارا من ݙکھی ہو گیو ہے۔ ایئے باتاں رے کرے مھاری آنکھیے اندھے ہوݨ لاگے رے۔ ¹⁸ صیون رے پہاڑ ری وجہ خاں جکو خنیو ہے اَن جکے تے گیدڑ پھرئی ٹُرئی۔ ¹⁹ پݨ اَے پرمیشور تُو خَدا تائی تخت تے ہووئیخ۔ اَن تائی راجائی پیڑی در پیڑی قائم ہے۔ ²⁰ تو مھاناں خَدا تائی کیکر بھول جائیخ؟ تو مھاناں گھݨی دیر تک کیاں چھوڑ ݙئیج؟ ²¹ اَے پرمیشور مھاناں آپرے پاخے پھیر تو مھاں پھیر جاخاں مھارے ݙناں نا اُوئاں جی کر جا پہل ہَتا۔ ²² کی تُو مھاناں خَدا رے خارو چھوڑ ݙئیخ؟ کی تو مھاں ماتھے اِترو ناراض ہے؟