¹ ہوں اُو منکھ ہاں جکے اُوئے ݙکھ نا جویو۔ جکو اُوئے ری کاݪ ری گیݙی خاں ہویو۔ ² اُوئے مناں لے جا رو اندھارے میں پُگایو نی کہ اُجاݪے میں۔ ³ اُو خارو ݙن مھارے خلاف ہاتھ اُکھݨتو رہیو۔ ⁴ اُوئے مھارے مانخ اَن مھاری چاٻڑی نا خُکو ناکھیو۔ اَن مھارے ہاݙکھیاں نا بھانگ ناکھے۔ ⁵ اُوئے مھارے چارے پاخے ہیک بھینت بݨائی اَن نی خمجھ اَن گھݨی محنت خاں مھناں گھیر لیو۔ ⁶ اُوئے کئی ݙناں رے مَرداں آݪی کار مناں اندھارے ری جگہ میں بخایو۔ ⁷ اُوئے مھارے چارے پاخے بھینت بݨائی کہ ہوں اُوئے خاں ٻاہر نی نخر خگاں۔ اُوئے مھارے زنجیراں نا بھاری کر ݙنے۔ ⁸ جے ہوں رَڑے کر کر دُعا کرتو ایئے رے خارو کہ اُو مھاری دُعا خُݨݨ خاں مُکر نی جاوئے۔ ⁹ اُوئے ہاتھاں خاں بݨایوڑے مورتیاں خاں مھارو مارگ بند کیو۔ اُوئے مھارے مارگاں نا انٹا کر ݙنا۔ ¹⁰ او مھارے خارو ایئے ہے جاں کہ کوئی رینچھ ہوئے جو تاٹ میں ہوئے۔ اَن شیر آݪی کار ہے جکو لُکیوڑے جگھا میں ہے۔ ¹¹ اُوئے مھارےمارگاں نا ٹیڑھا کر ݙنا۔ اُوئے مناں چُور چُور کر ݙنو۔ اَن اُجاڑ ݙنو۔ ¹² اُوئے آپری کمان کھیچی، اَن تیر خاں مھارو نیشانو بݨایو۔ ¹³ اُوئے آپرے منکھاں خاں مھارے گُرداں نا پھاڑ ناکھیا۔ ¹⁴ ہوں خارے قوماں رے آگے تماشو اَن اُوئے رے ݙن خارے رو گاوݨ بجاوݨ آݪو بݨ گیو۔ اُوئے مناں کھارے ٻوڑیاں خاں دھپایو۔ ¹⁵ اَن مناں کھاراݨ خاں کالھو کر ݙنو۔ ¹⁶ اُوئے چھوٹے چھوٹے پتھراں خاں مانجا ݙانت توڑیا اَن راکھ میں خووݨ ݙنو۔ ¹⁷ تئے مانجی جان نا سلامتی خاں اݪگی راکھی۔ ہوں خوش حالی نا بھُل گیو۔ ¹⁸ اَن میں کہیو کہ مانجی طاقت اَن مانجی اُمید پرمیشور خاں ختم تھی گی۔ ¹⁹ تو مانجے ݙکھ اَن آوارگی اَن کڑواہٹ اَن بے سکونی نا یاد کر۔ ²⁰ مانجی جان ایئاں نا روز یاد کرئی۔ اَن ہوں کاݪ خاں بھریج جاوئی۔ ²¹ ہوں ایئے بات تے من خاں خوچیخ اَن ایئے بات خاں جی مناں آخرو ہے۔ ²² پرمیشور ری کرپا ختم کونی تھی اَن اُوئے ری دیا اݪگی کونی ہوی۔ ²³ او ہر روز تازہ ہووئی تھارو ساتھ گھݨو موٹو ہے۔ ²⁴ مانجو من کہی کہ پرمیشور مھارے من رو ٹکڑو ہے ایئے خارو ہوں اُوئے تے جی اُمید راکھئیخ۔ ²⁵ پرمیشور اُوئاں خارو بھلو ہے جو اُوئے رو انتظار کرتا رئی۔ اَن اُوئے جان رے خارو وی جکو اُوئے نا لابھئی وا۔ ²⁶ ایہ بھلو ہے کہ چُپ کر تے پرمیشور ری مگتی رو انتظار کریو جاوے۔ ²⁷ منکھ رے خارو ایہ بھلو ہے کہ او ٻاݪاپݨ میں جی خمجھ جاوے۔ ²⁸ او ہیکھلو ٻیخے اَن چپ رہے جݙے اُوئے خمجھ ݙنی ہے۔ ²⁹ او آپرو مھانݙو دھرتی نی نیچا راکھے متاں کوئی بھلائی ہوتی ہووے۔ ³⁰ آپرو گال تھارے تھپڑ مارݨ آݪے نی پھر ݙے او ملامت خاں دھاپ جاوے۔ ³¹ کیانکہ پرمیشور اُوئے نا خداں رے خارو چھوڑ کونی ݙیوے۔ ³² اَن جے ݙکھ ݙیوے تو وی آپری کرپا رے مطابق ترخ کرخے۔ ³³ کیانکے اُوئے رے من میں ایہ کونی کہ بنی نوع انسان نا ݙکھ اَن تکلیف دے۔ ³⁴ جے دھرتی را خارا قیدی پَگاں نیچا پخیج جاوے۔ ³⁵ جاں پرمیشور رے آگے منکھاں رو حق بدل ݙنو جاوے۔ ³⁶ یا انسان نا اُوئے رے مقدمے میں گھاتو جاوے تو کی پرمیشور کونی جووتو۔ ³⁷ جے پرمیشور نی کہے تو کُݨ ہے جکے رے کہے تے ایہ ہوخے۔ ³⁸ کی بُرائی اَن بھلائی ٻنہے پرمیشور رے مھانݙے خاں کونی نخرتے؟۔ ³⁹ پاپی ہوتو ہویا انسان کیا جیتݨ رے خارو رَڑے کرئی۔ ⁴⁰ آو آپاں آپرے مارگاں نا پرکھا اَن ازماواں۔ اَن پرمیشور رےپاخے آ جاواں۔ ⁴¹ مھاں پرمیشور نی جکو آسمان میں ہے۔ آپرو من اَن ہاتھ اُکھݨا۔ ⁴² مھاں پاپ اَن نافرمانی کی ہے اَن تئے معاف کونی کریو۔ ⁴³ آپرے قہر میں لُکا تے مھارو لارو کیو تے باڈھیا اَن ترس کونی کیو۔ ⁴⁴ تے آپرے من نا جھُڑ میں لُکا لیو ایئے رے خارو کہ مھارے پراتھناواں تے تک نی پُگے۔ ⁴⁵ تے مھاناں قوماں میں میل آݪی کار گندو بݨیو ہے۔ ⁴⁶ مھارا خارا دشمن مھاں تے پھُکیج تے مھانݙو بݨاوئی۔ ⁴⁷ ٻہی اَن گڑا اَن خونائی اَن تباہی تے آئے۔ ⁴⁸ مانجی ݙیکری آݪی کار قوم ری تباہی رے کرے مانجے آنکھیاں خاں پاݨی ندیاں آݪی کار بہی۔ ⁴⁹ مانجے آنکھیاں میں پاݨی ابھیجتو کونی اَن ایئاں نا سکون کونی۔ ⁵⁰ جتری تک کہ پرمیشور آسمان خاں مناں جو نی لےوے۔ ⁵¹ مانجے شہر رے خارے ݙیکریاں رے کرے مانجی آنکھ مناں ݙکھ ݙئی وی ۔ ⁵² جکو خامخواہ را مانجا دشمن ہَتا او پَکھیاں آݪی کار منجو شکار کرتا ہَتا۔ ⁵³ اُوئاں کھݙے میں مانجی زندگی نا مٹا ݙنو ہے۔ ⁵⁴ بلکے میں ماتھے پتھر وی ناکھیا ہے سیلاب مانجے ماتھے خاں بہتو رہیو میں خوچیو کہ ہوں مَر گیو۔ ⁵⁵ اَے پرمیشور میں کھݙے میں خاں تناں یاد کریو۔ ⁵⁶ تئے مانجی آواز خُݨی مانجے ݙکھ اَن فریاد خاں آپرو کان اݪگو کونی کریو۔ ⁵⁷ جکے ݙن میں تناں یاد کریو تو نیڑو آیو اَن کہیو ٻہی نی۔ ⁵⁸ اَے پرمیشور تو مھارے خارو بڑھتو رہیو تئے مھاری زندگی نا چھوڑایو ہے۔ ⁵⁹ اَے پرمیشور تئے مانجے ظلم نا جویو ہے۔ تو مھارو انصاف کر۔ ⁶⁰ تئے اُوئاں رے خارے کاماں نا جویو ہے اَن مانجے خلاف اُوئے رے منصوباں نا جویو ہے۔ ⁶¹ اَے پرمیشور تئے اُوئاں رے تاناں نا اَن مانجے خلاف اُوئے رے منصوباں نا خُݨیو ہے۔ ⁶² بلکے مانجے خامھݨے کریوڑے باتاں اَن مانجے خلاف خارے ݙن رے باتاں نا وی۔ ⁶³ تُوں اُوئاں رو اُٹھݨو اَن بیخݨو جو ہوں اُوئاں رے خارو تماشو بݨ گیو رو ⁶⁴ اَے پرمیشور اُوئاں رے ہاتھ رے کاماں رو اُوئاں نا بدلو ݙے۔ ⁶⁵ تُو اُوئاں رے من نا کاٹھا کر اَن تانجی لعنت اُوئاں تے میل۔ ⁶⁶ آپرے قہر خاں اُوئاں رے لارے لگ اَے پرمیشور آسمان رے نیچا خاں اُوئاں نا تباہ کر ݙے۔