¹ پرمیشور آپری ریخ میں ݙیکری صیون نا جھُڑ میں کیکر لُکا لیو ہے۔اُوئے اسرائیل رے پھُوٹراپ نا آسمان خاں۔ دھرتی تے کیکر ناکھیو۔ اَن آپرے کاݪ آݪے ݙن آپرے پَگ راکھݨ آݪی چوکی نا بھُلا ݙنو۔ ² پرمیشور یعقوب را خارا گاں مٹا ݙنا۔ اَن اُوئے تے ترس کونی کھادھو۔ اُوئے آپرے کاݪ خاں ݙیکری یہوداہ رے قلعاں نا ناکھ ݙنا۔ اَن مٹی میں بچاڑ ݙنا۔ ³ اُوئے آپرے کاݪ ری ریخ میں اسرائیل رے پورے خینگ نا باڈھ ناکھیو۔ اُوئے دشمن رے آتے گھڑی آپرو دیا آݪو ہاتھ پاچھو کر لیو۔ اَن اُوئے یقعوب میں باخݙے مچا چھوڑی۔ جکو چارے پاخے ٻاݪ پدھر کرئی۔ ⁴ اُوئے دشمن آݪی کار کمان اُکھݨیوڑی ہے اَن آپرو کرپا آݪو ہاتھ نا قاٻو کیو ہے۔ اُوئے بیری آݪی کار جکو کچھ آنکھیاں نا بھلو لاگتو ہَتو اُوئے نا مار ناکھیو۔ اُوئے صیون ݙیکری رے گھر میں باخݙے آݪی کار آپری ریخ پَٹکی۔ ⁵ پرمیشور دشمن آݪی کار بݨ گیو۔ او اسرائیل نا کھا گیو۔ او اُوئے رے خارے پاڑے نا کھا گیو۔ اَن اُوئے رے قلعاں نا تباہ کر ݙنا۔ رووا پِٹکو بدھا ݙنو۔ ⁶ اُوئے باغ آݪی کار آپرے بھگتی گھر نا خالی کر ݙنو اُوئے آپرے ٻیخݨ آݪی جگہ نا وی برباد کر ݙنو۔ پرمیشور صیون میں عید اَن پویتر ݙن نا ختم کر ݙنو۔ اَن اُوئے آپرے کاݪ رے کرے بادشاہ اَن پوجاری نا ذلیل کریو۔ ⁷ پرمیشور آپری قربانی آݪی جگہ ختم کر ݙنی۔ اَن آپرے پویتر استھان نا غیر پویتر کر ݙنو اُوئے اُوئاں رے مہل رے دیواراں نا دشمناں رے ہاتھ میں دے ݙنے ۔ اَن پرمیشور رے گھر میں عید رے ݙن آݪی کار شور کیو گیو۔ ⁸ پرمیشور اِرادو کیو۔ کہ صیون ری دیوار نا برباد کر ݙے۔ اُوئے ݙور کچھیچی ہے۔ اَن اُوئے ری تباہی رے کام خاں آپرو ہاتھ لارے کونی کریو ۔ اُوئے چودیواری میں رووا پِٹکو لگا ݙنو۔ اَن ٻہی بھݪے مَر جاوئی۔ ⁹ اُوئے را پھاٹک دھرتی میں دٻیج گیا۔ اُوئے اُوئاں رے قید خانہ نا توڑ برباد کر ݙنا ہے۔ اُوئے را بادشاہ اَن اُوئے را سردار غیر قوماں رے بچ میں ہے۔ شرط ختم ہو گی۔ پرمیشور ری طرف خاں اُوئاں را نبی وی کوئی آگکتھی کونی جوتا۔ ¹⁰ ݙیکری صیون را بوڈھیا چک کر تے دھرتی تے ٻیٹھا ہے۔ اُوئاں آپرے ماتھاں میں راکھ گھاتی اَن کڑیا نا رَلکے ٻاندھے۔ یروشلیم رے کنوارے زمین تک شیش نوایوڑا ہے۔ ¹¹ مانجے آنکھے رو رو تے اندھے ہوئے رے۔ مانجو من جوش مارئی۔ مانجی قوم ری ڈیکری رے دَھک رے کرے مانجو جگر دھَرتی تے ڈھوݪ گیو رو۔ جݙے کہ ٻاݪ اَن نخوم ٻاݪیو گاں رے گھراں میں غش کھاوئی۔ ¹² او آپرے ماواں خاں پوچھتا رہا۔ کہ دھان اَن پاݨی کیتھ ہے۔ او شہر رے گھراں میں زخمیاں آݪی کار کھریا پیا ہے۔ جݙے اُوئاں رے ماواں رے کھوݪے میں۔ اُوئاں رو خاخ نخرئے۔ ¹³ کے رے برابر تناں جوواں۔ اَن کے آݪی کار تناں خمجھاں۔ اَے یروشلیم ری ڈیکری ہوں تناں رے برابر کہاں۔ تاکہ تناں تسلی ݙیواں۔ اَے کنواری صیون کیانکے تنجو دھَک سمندر آݪی کار موٹو ہے۔ تنجو علاج کُݨ کرخے۔ ¹⁴ تنجاں سنتاں تاجے خارو۔ کُوڑ اَن کالھے آݪے باتاں جووے۔ اُوئاں تھاری بُرائی نا ظاہر کونی کیو۔ ایئے خارو کہ تھاری قسمت بدلے۔ بلکہ اُوئاں تھارے کرے کُوڑا اَن ٹھگی آݪے باتاں کئے۔ ¹⁵ مارگ را خارا تئے تے تاڑے بجاوئی۔ او ڈیکری یروشلیم تے۔ پھُوکینج اَن ماتھا ہلاوئی۔ کی ایہ او جی شہر ہے جکے نا لوک وݙو پھُوٹرو اَن سکون آݪی جگہ کہتا ہَتا۔ ¹⁶ تھارا خارا دشمن حیران تھی گیا را او ریخ میں ݙانت پیخئی۔ اَن کہی کہ مھاں اُوئاں نا گیٹ گیا را۔ ایہ او جی ݙن ہے جکے رو مھاناں انتظار ہَتو۔ مھاں اُوئے نا لابھو اَن جویو۔ ¹⁷ پرمیشور جکو خوچیو اُوئے اُوئاں جی کرو اَن آپرے وچن نا پورو کریو۔ جکے رے بارے میں اُوئے پہل خاں کہیو ہَتو۔ اُوئے ناکھیو اَن ترس کونی کیو۔ اُوئے دشمن نا تے ماتھے راجی کریو۔ اَن تھارے بیریاں نا اُونچا کر ݙنا۔ ¹⁸ اَے کنواری ݙیکری صیون پرمیشور رے آگیا رات ݙن رو تھارا آنسو دریا آݪی کار بہتا رہوے، تو آرام نی کر۔ تانجی دید نی ہَٹے۔ ¹⁹ اُٹھی رات رو۔ ݙن اُگݨ خاں پہل پراتھنا کر۔آپرو من پرمیشور رے خامھݨے پاݨی آݪی کار ڈھوݪ ݙے۔ آپری ٻاݪاں ری حیاتی رے کرے۔ اُوئے خاں پراتھنا کر۔ ²⁰ اَے پرمیشور جو اَن دھیان ݙے جو کہ تئے کے خاں کی کیو ہے کی لُگائے آپرے پھَݪاں یعنی کہ آپرے پیٹ رے ٻاݪاں نا کھا جاوئے؟ کی پرمیشور رے پویتر میں ایشور را پُجاری اَن سنت ماریا جاوئے؟ ²¹ گھراں میں دھرتی تے چھوکرا اَن بوڈھیا پئیا ہے منجے کنوارے اَن نوجوان تلوار رے ہَتھے چڑھ گیا، اَن تئے آپرے کاݪ رے ݙناں میں اُوئاں نا مَر ناکھیا۔ تئے اُوئاں نا باڈھ ناکھیا اَن ترس کونی کریو۔ ²² تئے جاں کو عید رے ݙن رے خارو ہر پاخے خاں مھاری خارو ٻہئی نا ہیلو کریو۔ اَن پرمیشور رے کاݪ رے ݙن نی تو کوئی بچیو اَن نی جی کوئی رہ گیو۔ جکے نا میں آپرے کھوݪے میں کھوایو اَن پاݪیو۔ اُوئاں نا مھارے دشمناں تباہ کر ناکھیا۔