1
۱۔ہفتے رے پہلکے ݙن مریم مگدلینی خبیݪے باکھ پھوٹݨ ری بݪہ اُو قبر تے آئی اَن اُوئے قبر رے پتھر نا ہیکے پاخے ݙٹھو۔
2
۲۔پچھے اُو شمعون پطرس آن اُوئے ٻجے چیݪاں نی ہوڑی کڈھتی آئی جکاں خاں یسوع پریم کرتو ہَتو۔ اَن اُوئاں نا کہیو کہ ایشور نا قبر خاں کاڈھ لیو گیو ہے۔ اَن مھیں کونی جاݨتا کہ اُوئے نا کیتھ راکھیو ہے۔
3
۳۔پچھے پطرس اَن ٻجوڑا چیلا نکلیا اَن قبر ݙخا گیا۔
4
۴۔آن اُو ٻہیں بھیݪا ہوڑی کڈھی پݨ ٻجوڑو چیلو پطرس خاں آگے نکل گیو آن قبر تے پہلی پوگو۔
5
۵۔اُوئے نوگڑ تے کفن را گابھا جویا۔ پݨ اُو اُوئاں میں کونی ہَتو۔
6
۶۔ پچھے شمعون پطرس وی اُوئے رے لارے لارے آیو آن قبر رے مہیناں گیو اَن کفن را گابھا پیوڑا جویا۔
7
۷۔آن اُو رومال جکو اُوئے رے ماتھے تے بیڑھیوڑو ہَتو کفن رے گابھا میں کونی ہَتو۔ او ہیکے پاخے ٻیجی جگہ پئیو ہَتو۔
8
۸۔ پچھے ٻجوڑو چیلو جکو قبر تے پہلی پُوگو ہَتو قبر رے مہیناں گیو اَن جو تے یعقین کریو۔
9
۹۔کیانکہ او پُراݨی لِکھت نا کونی جاݨتا ہَتا کے او مَریوڑا میں خاں ضرور جیتو ہوخے۔
10
۱۰۔پچھے اُو چیلا پاچھا آپرے گھرے گیا۔
11
۱۱۔ پݨ مریم ٻاہر قبر تے ابھوڑی روتی رئی۔ اَن روتی روتی جݙے او نوگڑ تے قبر میں جویو۔
12
۱۲۔تو ٻے فرشتاں نا آچھا گابھا پہریوڑا ہیکے نا خرانتھیے اَن ٻجوڑے نا پگانتھیے جیتھ یسوع ری لاش پئی ہَتی ٻٹھوڑا جویا۔
13
۱۳۔اُوئاں اُوئے نا کہیو اے لُگائی تُو کیاں روئی وی۔ اُوئاں اُوئے نا کہیو ایئے رے خارو کہ مھارے ایشور نا اُکھݨ لے گیا ہے۔ اَن مھنے کونی ٹھاہ کہ اُوئے نا کیتھ راکھیو ہے۔
14
۱۴۔ ایہ کہہ تے اُو پاچھی بݪی اَن یسوع نا ابھوڑو جویو اَن اُوئے نا نی اُوݪکھیو کہ ایہ یسوع ہے۔
15
۱۵۔یسوع اُوئے نا کہیو کہ اَے لُگائی تو کیاں روئی وی۔ کے نا لابھئی وی۔ اُوئے مالی خمجھ تے اُوئے نا کہیو میاں جے تیں اُوئے نا ایتھ خاں اُکھݨیو ہے تو مھناں ݙخل رو کہ اُوئے نا کیتھ راکھیو ہے۔ تاکہ ہوں اُوئے نا لے جاواں۔
16
۱۶۔ یسوع اُوئے نا کہیو مریم اُوئے پاچھݪ پھور تے اُوئے نا عبرانی میں کہیو ربونی(اے اُستاد)۔
17
۱۷۔یسوع اُوئے نا کہیو مھناں ہاتھ نی لگا کیانکہ ہوں ہجے تک ٻاپ کڈھے اُونچا کونی گیو۔ پݨ توں مھارے بھائیاں کڈھے جا اَن اُوئاں نا کہے کہ ہوں آپ رے ٻاپ اَن تھارے ٻاپ اَن آپرے ایشور اَن تھارے ایشور کڈھے اُونچا جاویں وو۔
18
۱۸۔مریم مگدلینی آ تے چیلاں نا خبر ݙنی کہ میں یسوع نا ݙٹھو ہا اَن اُوئے میں خاں باتاں کیے ہے۔
19
۱۹۔ اَن اُوئے جی ݙن ہفتے رے پہلے ݙن آتھݨ ری بݪہ جݙے اُوئے را دروازہ جیتھ چیلا یہودیاں رے ٻہی خاں بھیݪا تھیوڑا ہَتا بند ہَتا۔ یسوع آ تے ادھ میں ابھیجو اَن اُوئاں نا کہیو تھاری سلامتی ہوئے۔
20
۲۰۔آن ایئے کہے تے آپ رے ہاتھاں اَن پاخݪی اُوئاں نا بتائی پݨ چیلا یسوع نا جوئے راجی ہویا۔
21
۲۱۔ اَن یسوع اُوئاں نا بھݪے کہیو تھاری سلامتی ہوئے جاں ٻاپ مھناں میلیو ہے ائیاں جی ہوں وی تھاناں میلئی۔
22
۲۲۔اُوئے ایہ کہ تے اُوئاں ماتھے پھونکیو اَن کہیو کہ پویتر آتماں لو۔
23
۲۳۔جکے را پاپ تھیں معاف کرخو اُوئے را پاپ معاف ہوخے جکے را پاپ تھیں قائم راکھخو اُوئے را قائم رہیخے۔
24
۲۴۔ اُوئاں ٻاراں میں خاں یعنی توماں جکے نا توام کہی یسوع رے آوݨ آݪی بݪہ اُوئاں بھیݪو کونی ہَتو۔
25
۲۵۔جݙے ٻجوڑا چیلاں اُوئے نا کہیو کہ مھاں یسوع نا ݙٹھو ہاں پݨ اُوئے اُوئاں نا کہیو کہ جیتری تک ہوں اُوئے رے ہاتھ پگ میں کوکاں را خوراخ نی جووا اَن خوراخاں ری جگہ انگݪی نی گھاتاں اَن آپرو ہاتھ اُوئے ری پاخݪی میں نی گھاتاں ہوں یقین کونی کراں۔
26
۲۶۔ آٹھ ݙن باد اُوئے را چیلا بݪے مہناں ہَتا اَن توماں اُوئاں بھیلو ہَتو۔ اَن در بند ہَتا تو وی یسوع آ تے بیچ میں ابھیج تے کہو تھاری سلامتی ہوئے۔
27
۲۷۔آن بݪے اُوئے توماں نا کہیو کہ آپ ری انگݪی کڈھے لے آ تے مھارے ہاتھاں نا جو اَن آپرو ہاتھ نیڑو لیا تے مھاری پاخݪی میں گھات اَن بے اعتبارو نی تھی اعتبار راکھ۔
28
۲۸۔ توماں جواب میں اُوئے نا کہیو تو مھارو ایشور مھارو پرمیشور ہے۔
29
۲۹۔یسوع اُوئے نا کہیو کہ تُوں تو مھناں جو تے ایمان لے آیو ہے دھن ہے او جکو ان ݙٹھے تے وشواش لے آوئی۔
30
۳۰۔ یسوع آپ چیلاں رے خامھاں گھݨائی آزموتا بتایا جکو ایئے کتاب میں کونی لکھیا گیا۔
31
۳۱۔پݨ ایہ ایئے رے خارو لکھیو گیو ہے کہ تھیں وشواس لے آؤ کہ یسوع جی ایشور رو ݙیکرو مسیح ہے اَن ایمان لے آ تے اُوئے رے ناں خاں زندگی پاؤ۔