1
۱۔ پچھے پیلاطس یسوع نا لے تے کوڑا لگوایا۔
2
۲۔اَن خیپائیاں کانٹاں رو تاج بݨا تے اُوئے رے ماتھے تے راکھیو۔اَن اُوئے نا بادشاہی گابھا پہرائی۔
3
۳۔اَن اُوئے رے کڈھے آ آ تے کہتا رہیا اے یہودیاں را بادشاہ سلام اَن اُوئاں اُوئے نا چماٹاں مارئیں ۔
4
۴۔پچھے پیلاطس ٻاہر جا تے اُوئاں نا کہیو کہ جووو ہوں اُوئے نا تھاں کڈھے ٻاہر لے آیا ہا۔ تاکہ تھاناں ٹھا لگے کہ ہوں ایئے میں کوئی قخور کونی جوتو۔
5
۵۔پچھے یسوع کانٹاں رو تاج رکھے اَن بادشاہی گابھا پہرے ٻاہر آیو۔ اَن پیلاطس اُوئاں نا کہیو کہ جووو ایہ منکھ ۔
6
۶۔جݙے سردار کاہن اَن اُوئے رے حواریاں اُوئے نا جویو تو رَڑ کر اَن کہیو خُوݪی دے خُوݪی دے پیلاطس اُوئاں نا کہیو کہ تھاں جی ایئے نا لے جاؤ اَن خُوݪی ݙو۔ کیانکہ ہوں ایئے میں کوئی قخور کونی جوتو۔
7
۷۔ یہودیاں اُوئے نا بݪتی ڈنی کہ مھارو ہیک اصول ہے اَن اُوئے اصول رے مطابق ایہ قتل رے لائق ہے۔ کیانکہ ایئے آپرے آپ نا ایشور رو ݙیکرو بݨایو ہے۔
8
۸۔جݙے پیلاطس ایہ بات خُݨی تو ٻجو وی ٻہی گیو۔
9
۹۔قلعے میں پاچھو آ تے یسوع نا کہیو کہ تو کیتھ رو ہے۔ پݨ یسوع اُوئے نا کوئِی بݪتی کونی ݙنی۔
10
۱۰۔ پچھے پیلاطس اُوئے نا کہیو تُو میں خاں کونی ٻولتو۔ کی تناں ٹھا کونی کہ مھنے ایہ حق ہے کہ تناں چھوڑ ݙا۔ اَن ایہ وی حق ہے کہ تناں خوݪی ݙے ݙا۔
11
۱۱۔یسوع اُوئے نا بݪتی ݙنی کہ جے تناں اُونچا خاں نی ݙنی جاونت تو تھارو میں تے کوئی اختیار کونی ہونت۔ ائیے خارو جکے مھناں تھارے حوالے کریو ہے اُو گھݨو قخور آݪو ہے۔
12
۱۲۔ ایئے تے پیلاطس کوشش کرݨ لاگو کہ اُوئے نا چھوڑ ݙے پݨ یہودی ایئاں کہہ کہہ تے رڑئے کرݨ لاگا کہ جکے تو ایئے منکھ نا چھوڑ ݙئی تو تُوں قیصر رو خجݨ کونی۔ جکو کوئی آپرے آپ نا بادشاہ بݨاوئی او قیصر رو دخمی ہے۔
13
۱۳۔پیلاطس ایہ باتاں خُݨ تے یسوع نا ٻاہر لے آیو اَن اُوئے جگہ تے جکو چبوترہ اَن عبرانی میں گبتا خُݨجتی تختِ عدالت تے ٻیٹھو۔
14
۱۴۔ ایہ فسح ری تیاری رو ݙن اَن چھوئے گھنٹے رے نیڑو ہَتو۔ اَن اُوئے یہودیاں نا کہیو کہ جووو تھارو بادشاہ۔
15
۱۵۔پݨ اُو رڑے کرݨ لگا کہ لے جا لے جا ایئے نا خوݪی ݙے پیلاطس اُوئاں نا کہیو کہ کی ہوں تھارے بادشاہ نا خوݪی ݙیوا؟ سردار کاہناں بݪتی ݙنی کہ قیصر خاں ٹاݪ مھارو کوئی بادشاہ کونی۔
16
۱۶۔پچھے اُوئے اُوئاں رے حوالے کر ݙنو تاکہ اُوئے نا خوݪی ݙنی جاوئی۔ پچھے اُو یسوع نا لے گیا۔
17
۱۷۔ اَن او آپری خوݪی آپ اُکھݨے اُوے جگہ ٻاہر گیو جکو کھوپڑی رے ناں خاں خُݨیجتی جکے رو عبرانی میں ترجمو گُلگُتا ہے۔
18
۱۸۔اَن اُوتھ اوے نا خوݪی ݙنی اَن اوے رے بھیݪا ٻے ٻجا نا وی ہیک خاجڑی پاخے اَن ٻجو کھاٻڑی پاخے اَن یسوع نا بچ میں۔
19
۱۹۔اَن پیلاطس ہیک تختی خوݪی رے ماتھے لگوائی جکے رے ماتھے لکھیوڑو ہَتو یسوع ناصری یہودیاں رو بادشاہ۔
20
۲۰۔اوے تختی نا گھݨے یہودیاں پڑھیو کیانکہ او جگہ جیتھ یسوع نا خوݪی ݙنی گی ہَتی او شہر رے نیڑی ہَتی اَن او عبرانی اَب لاطینی اَن یونانی میں لکھیوڑو ہَتو۔
21
۲۱۔اَن یہودیاں رے سردار کاہناں پیلاطس نا کہیو کہ یہودیاں رو بادشاہ نی لِکھ بلکہ ایے کہیو ہَتو کہ ہوں یہودیاں رو بادشاہ ہا
22
۲۲۔پیلاطس بݪتی میں کہیو کہ جکو میں لِکھیو او لِکھیو۔
23
۲۳۔ جݙے خپاہیاں یسو ع نا خوݪی ݙنی تو اُوئاں اُوے را گابھا لیا اَن چار حخا کریا ہیکوکے خیپائی رے خارو ہیک حخو اَن اُوئے رو چوݪو وی لیو ایہ چوݪو بِن سِلا سَراسَر بݨیوڑو ہَتو۔
24
۲۴۔ایے خارو اُواں آپت میں کہیو کہ آپاں ایے نا نی پھاڑاں بلکہ ایے تے پرچی گھاتاں کہ ایہ کے رو ہوخے ایہ ایے خارو ہویو کہ او بات پوری ہووے جکے میں کہیو گیو ہَتو اُوئاں مھارا گابھا بنڈ لیا اَن مھارے چوݪے تے پرچی گھاتی۔ کیانکہ خیپائیاں ایے جی کریو ہَتو۔
25
۲۵۔ اَن یسوع رے خوݪی رے کڈھے اُوے رے ماں اَن اُوے ری ماں ری ٻہن مریم کلوپاس ری لُگائی اَن مریم مگدلینی ابھے ہَتے۔
26
۲۶۔یسوع آپری ماں نا اَن اُوے چیلے نا جکے خاں اوے رو پریم ہَتو کڈھے ابھوڑا جویا۔ اَن آپری ماں نا کہیو اے لُگائی جو تھارو ݙیکرو۔
27
۲۷۔اَن پچھے چیلے نا کہیو کہ جو تھاری ماں اَن اُوے جی گھڑی اُوئے چیلے اُوئے نا آپرے رے بھیݪو لے لنھو۔
28
۲۸۔ ایے خاں پچھے یسوع ایہ خمجھ تے کہ خارے باتاں پورے ہوئے تاکہ جاں لِکھیوڑو ہَتو پورو ہووئے۔ اَن کہیو کہ ہوں ترخیو ہا۔
29
۲۹۔ اُوتھ سرکے خاں بھریوڑو ہیک ٹھاں پیو ہَتو۔ اُوئاں ہیک سپنج نا سرکے میں بھیگو تے زوفے ری لکڑی تے راکھیو اَن اُوئے رے مھانݙے خاں لگایو۔
30
۳۰۔اَن پچھے یسوع سرکو پیو تو کہیو تمام ہویو۔ اَن اُوئے ماتھو نیچا کر تے جان ݙے ݙنی۔
31
۳۱۔ کیانکہ تیاری را ݙن ہَتا یہودیاں پیلاطس نا کہیو کہ اُوئے رے ٹانگیں توڑ ݙنی جاوئے اَن لاش نا اُتار لی جاوئے تاکہ سبت آݪے ݙن خوݪی تے نی رہے۔ کیانکہ سبت رو اُو ݙن خاص ہَتو۔
32
۳۲۔ایئے رے خارو خیپائیاں پہل اُوئے رے ٹانگیں توڑیں اَن پچھے ٻجوڑے رے جکو اُوئے بھیݪا خُوݪی تے ہَتا۔
33
۳۳۔پݨ جݙے اُو یسوع کڈھے نیڑا آ اَن جویو کہ یسوع تو مَریو رو تو اُوئے رے ٹانگیں نی توڑیئے۔
34
۳۴۔ پݨ خیپائیاں میں خاں ہیکے اُوئے ری پاخݪی میں بھالو ماریو اَن لوہی اُوی جی گھڑی بہہ آیو۔
35
۳۵۔اَن جکے ایے جویو اُوئے گواہی ݙنی اَن اُوئے ری گواہی خچی ہے۔ اَن اُوئے نا ٹھا ہے کہ خچی کہیو وو کیاں کہ تھاں وی ایمان لے آؤ۔
36
۳۶۔ ایئے باتاں ایئے رے خارو ہوئیں کہ جو لِکھیوڑو ہَتو اُو پورو ہووئے کہ اُوئے ری ہیک ہاݙکھی وی توڑی کونی جاوئے۔
37
۳۷۔اَن پچھے ہیک ٻجی لِکھت کہیئی کہ اُو اُوئاں نا جوخے جکے اُوئے نا برباد کیو ہے۔
38
۳۸۔ائیاں باتاں خاں پچھے ارمتیہ رے رہݨ آݪے یوسف جکو یسوع رو چیلو ہَتو (پݨ یہودیاں رے ٻہی خاں لُک میں) پیلاطس خاں موکل مانگی کہ یسوع ری لاش نا لے جاوئے اَن پیلاطس وی موکل ݙے ݙنی۔ اَن اُو آ تے لاش نا لے گیو۔
39
۳۹۔اَن نیکدیمس وی آیو جکو پہل یسوع نی رات رو گیو ہَتو اَن پچاخ خیر مُر اَن عود بچڑا اَن لے آیو۔
40
۴۰۔ پچھے اُوئاں یسوع ری لاش نا لے تے خوتی گابھاں میں خوشبوواں لگا اَن دفنایو جاں یہودیاں رو رواج ہَتو۔
41
۴۱۔اَن اُوئے جگہ جتھ اُوئے نا خوݪی ݙنی گی ہَتی۔ ہیک باغ ہَتو اَن اُوئے باغ میں ہیک نوئی قبر ہَتی۔ جکے میں کݙے کئی نا راکھیو کونی گیو ہَتو۔
42
۴۲۔کیانکہ ایہ قبر نیڑی ہَتی اُوئاں یہودیاں ری تیاری رے ݙن ری وجہ خاں یسوع نا اُتھ جی راکھ ݙنو۔