1
۱۔ اِئیاں باتاں خاں بعد یسوع بݪے آپ رے آپ تبریاس ری جھیل رے کندھے چیلاں تے ظاہر کیو آن ائیاں ظاہر کیو۔
2
۲۔شمون پطرس اَن توما جکو توام خُݨیجتو اَن نتن ایل جکو قانایِ گلیل رو ہَتو اَن زبدی رے ݙیکرے آن اُوئے رے چیلاں میں خاں ٻے ٻجا وی بھیݪاہَتا۔
3
۳۔شمون پطرس اُوئاں نا کہیو ہوں مچھی رے شکار تے جاویں اُوئاں اُوئے نا کہیو کہ مھاں وی تیں بھیݪا حالیں۔ پچھے اُو نکݪ اَن بیڑی تے چڑھیا پݨ اُوئے رات اُوئاں کئی نی جھالیو۔
4
۴۔آن جݙے خاکݪو ہوئی تو یسوع کندھے تے آ رو ابھیجیو پݨ چیلاں کونی اُوݪکھیو کہ ایہ یسوع ہے۔
5
۵۔ پچھے یسوع اُوئاں نا کہیو اے نوجوانا تھاں نی کہینک کھاوݨ رے خارو ہے۔ اُئاوں بݪتی ݙنی کہ کونی۔
6
۶۔اُوئے اُوئاں نا کہیو بیڑی رے خاجڑی پاخے جاݪ ناکھخو تو لابھخے۔ اُوئاں جاݪ ناکھیو اَن مچھیاں رے گھݨے ہووݨ رے کرے اُو جاݪ کھچ نی خگیا۔
7
۷۔ پچھے اُوئاں چیلاں جکے خاں یسوع مسیح پیار کرتو پطرس نا کہیو کہ ایئے تو ایشور ہے۔ جݙے شمعون پطرس اے خُݨیو کہ ایشور ہے اُوئے آپرو چوݪو کڑیاں نا ٻاندھیو (کیانکہ اُگھاڑو ہَتو) اَن جھیل میں ٹپو ماریو۔
8
۸۔اَن ٻجوڑا چیلا مچھی رو جاݪ کھچتا ٻیڑی تے آیا۔ (کیانکہ او کندھے خاں گھݨا آݪگا کونی ہَتا بلکہ ٻے خو ہاتھ اݪگا ہَتا)۔
9
۹۔جاں جی اُو کندھے تے اُتریا تو اُوئاں کوئلاں ری باخݙے اَن اُوئے تے مَچھی راکھیوڑی جوئی اَن ٻاٹی وی۔
10
۱۰۔یسوع اُوئاں نا کہیو کہ اُوئاں مچھیاں میں خاں لے آؤ جکو تھاں ہݨڑے جھالیئے ہے۔
11
۱۱۔شمعون پطرس جاݪ نا کندھے تے کھچیو۔ ایہ ہیک خو ترونجا موٹے موٹے مَچھیاں خاں بھریوڑو ہَتو۔ اترے گھݨے مَچھے ہوتے وی جاݪ کونی پھاٹو۔
12
۱۲۔ یسوع اُوئاں نا کہیو۔ آؤ ناشتو کر لو چیلاں میں خاں کئی نا وی جُرت کونی ہوئی کہ اُوئے خاں پوچھے کہ تو کُݨ ہے۔
13
۱۳۔یسوع آیو اَن ٻاٹی لے تے اُوئاں نا ݙنی۔ ائیاں جی مچھی وی ݙنی۔
14
۱۴۔ایہ تیجی دفعہ ہَتی کہ یسوع مَریوڑاں میں خاں جی اُٹھݨ خاں بعد چیلاں نا ݙکھاݪو ݙنو۔
15
۱۵۔ اَن جݙے اُوئاں ناشتو کر لیو۔ تو یسوع شمعون پطرس نا کہیو اے شمعون یوحنا را ݙیکرا کی تو ائیاں میں خاں گھݨو مھناں پیار کرئی۔ اُوئے اُوئے نا کہیو ہاوئے اے پرمیشور تناں تو ٹھاہ ہے کہ ہوں تے خاں پریم راکھئی اُوئے کہیو تو تُوں مھارا گھیٹا چرا۔
16
۱۶۔اُوئے بݪے اُوئے خاں پوچھیو اے شمعون یوحنا را ݙیکرا کی تو مھناں پیار کرئی۔ اُوئے اُوئے نا کہیو ہاوئے اے پرمیشور تناں تو ٹھاہ ہے کہ ہوں تے خاں پریم راکھئی اُوئے اُوئے نا کہیو تو تُوں مھارے رڈھا چرا۔
17
۱۷۔ اُوئے تیجی بار اُوئے نا کہیو اے شمعون یوحنا را ݙیکرا کی تو میں خاں پریم راکھئی۔ پچھے پطرس پریشان ہویو ایئے خارو کہ اُوئے تیجی بار اُوئے نا کہیو۔ کہ کی تُوں میں خاں پریم راکھئی۔ اَن اُوئے کہیو ہاوئے اے پرمیشور تناں تو خاروئی ٹھاہ ہے تو جاݨئیکہ ہوں تے خاں پریم راکھئی۔یسوع اُوئے نا کہیو تو تُو مھارے بھیݙاں چرا۔
18
۱۸۔ہوں تھاناں خچی خچی کہئی کہ جتری تک تو جوان ہَتو تو آپ جی آپرے کڑے ٻاندھتو۔ آن جیتھ من کرتو جاوتو ہَتو۔ پݨ جݙے تو بوڈھو ہوئخ تو تُو آپرا ہاتھ اُونچا کرئیخ اَن ٻیجا تھارے کڑے ٻاندھخے اَن اُتھ لے جاخے جیتھ تو نی جاوݨو چاہوئیں۔
19
۱۹۔ اُوئے ایئاں باتاں خاں اشارو کریو کہ اُو کئی طرح ری موت خاں ایشور رو پرتاب ظاہر کرخے۔ اَن ایہ کہیں تے اُوئے نا کہیو مھارے لارے آ۔
20
۲۰۔ پطرس پاچھل پھور تے اُوئاں چیلاں نا لارے آتا جویا۔ جکاں نا یسوع پیار کرتو ہَتو۔ اَن جکے آتھݨ ری ٻاٹی آݪی بݪہ وی اُوئے ری چھاتی تک جھک تے اُوئے خاں پوچھیو ہَتو۔ اے پرمیشور تھارو جھلاوݨ آݪو کُݨ ہے؟
21
۲۱۔پطرس اُوئے نا جو اَن یسوع نا کہیو۔ اے پرمیشور ایئے رو کی ہوخئی؟
22
۲۲۔یسوع اُوئے نا کہیو جے ہو چاہونت کہ جیتری تاݨی ہوں نی آواں ایہ ابھو جی رے تو تناں کی تُو مھارے لارے آ۔
23
۲۳۔ آݨ بھائیاں میں ایہ بات مشہور تھی گی کہ اُو چیلو کونی مَرے۔ پݨ یسوع اُوئاں نا ایہ کونی کہیو کہ اُو چیلو کونی مَرے۔پݨ میں ایہ کہیو کہ جتری تاݨی ہوں نی آواں ایہ ابھو جی رے تو تناں کی؟
24
۲۴۔ ایہ او جی چیلو ہے جکو ائیاں باتاں ری گواہی ݙتو اَن جکے ایہ لکھیو ہے اَن مھاں جاݨئی کہ اُوئے ری گواہی خچی ہے۔
25
۲۵۔پݨ ٻجاں وی گھݨاں کام ہے جکو یسوع کیا اَن جے اُو جدا جدا لِکھیے جاونت تو مھارے اندازے میں کتاباں جکو لکھِے جاونت او دنیا میں ماں کونی خگنت۔