1
۱۔تھاں مئیں بِڑھݨ اَن کھخیجݨ کیتھ خاں آ گیو رو؟ تھے آپرے ݙِیل ری بُری مرضی نا پُوری کرݨ چاہوئی، جکے رے خارُو تھے آپت میں بِڑھتا رہئی۔
2
۲۔جَݙے تھاں نا کَئی چیز رو لوڑ ہووے پݨ او تھاں نا نی لابھے، تو تھے حِدخو راکھئی اَن قتل کرئی پݨ پَچھے وی تھاں نا کئیں کونی لابھتو۔ تھاں نا اِیئے خارُو کونی لابھتو کیان٘کے تھے اِیشوَر خاں کونی مان٘گتا اَن آپت میں بِڑھئی اَن کھخیجئی۔
3
۳۔جَݙے تھے اِیشوَر خاں مان٘گئی پݨ او تھاں نا لابھتو کونی کیان٘کے تھے آپرے ݙِیل ری مرضی نا پُوری کرݨ رے خارُو بُری نیت خاں مان٘گئی۔
4
۴۔اَے اِیشوَر خاں بےوفائی کرݨ آݪاں، کی تھاں نا ٹھاء کونی کہ دُنیا خاں خن٘گت راکھݨ اِیشوَر خاں دُشمنی راکھݨ ہے؟ جکو وی دُنیا خاں خن٘گت راکھݨ چاہوئی، او آپرے آپ نا اِیشوَر رو دُشمن بݨاوئی۔
5
۵۔تھے کی خَمجھئی کہ جکو کُجھ شاستر میں لِکھیوڑو ہے اُوئے رو کوئی فائدو کونی؟ اِیشوَر آپاں نا جکو آتما ݙِنی ہے کی اُوئے ری مرضی ایَہڑی ہے کہ جکے ری وجہ خاں آپت میں حِدخو ہووے؟
6
۶۔پݨ اِیشوَر آپاں تے گھݨی کِرپا کرئی اِیئے خارُو شاستر میں لِکھیوڑو ہے کہ،”اِیشوَر اہن٘کار کرݨ آݪاں رے خِلاف ہے پݨ نِوڑت راکھݨ آݪاں تے کِرپا کرئی۔“
7
۷۔اِیئے خارُو اِیشوَر رو کَہیو منو اَن شیطان رو مُقابلو کرو، تو او تھاں خاں ناخ جاخے رو۔
8
۸۔اِیشوَر ݙِخا آؤ، تو او تھاں کَڈھے آخے۔ اَے پاپیاں، تھے بُرا کام کرݨ چھوڑ ݙو اَن بھَلا کام کرو۔ تھے جکو ٻے ٻیڑیاں را سوار ہو، آپرا مَن صاف کرو۔
9
۹۔آپرے پاپاں ماتھے افسوس کرو، ماتم کرو اَن روؤ۔ تھان٘رو ہاخݨ، ماتم میں اَن راضی ہووݨ، افسوس میں بدل جاوے۔
10
۱۰۔پرمیشوَر رے آگے نِوڑت خاں زندگی گُزارو، تو او تھان٘رو ماݨ بَدھاخے۔
11
۱۱۔اَے بھائیاں، تھے ہیکے ٻِجے رے خِلاف باتاں نی کرو۔ جکو آپرے وشواسی بھائی رے خِلاف بات کرئی جاں اُوئے تے اِلزام لگاوئی، او دھَرمی قانُون رے خِلاف بات کرئی اَن اُوئے تے اِلزام لگاوئی اَن جکو دھَرمی قانُون رے خِلاف بات کرئی جاں اُوئے تے اِلزام لگاوئی، او دھَرمی قانُون تے بہوتو کونی پݨ اُوئے رو انصاف کرݨ آݪو بݨ جاوئی۔
12
۱۲۔دھَرمی قانُون ݙیوݨ آݪو اَن اُوئے رو انصاف کرݨ آݪو چھَڑو اِیشوَر جِی ہے۔ اوج آپاں نا بَچا وی خَگئی اَن مار وی خَگئی۔ اِیئے خارُو آپرے پاڑے آݪے تے اِلزام لگاوݨ آݪا تھے کُݨ ہووئیں؟
13
۱۳۔مھاری بات غور خاں خُݨو، تھے جکو ایہ کَہی کہ، ”آج جاں خاکݪے مھے کَئی شہر میں جا را ہیک سال رہخاں اَن بپار کر رو پئیخا کماخاں۔“
14
۱۴۔جووو، تھاں نا تو ایہ وی ٹھاء کونی کہ خاکݪے کی ہوخے کیان٘کے تھان٘ری زندگی دھُون٘ور آݪِیکار ہے جکو ݙِخیجتے اِی ختم ہو جاوئی۔
15
۱۵۔اِیئے ری جگہا تھاں نا ایہ کَہوݨو چاہیجے کہ، ”جے پرمیشوَر آپاں نا زندگی ݙِنی، تو ایہ جاں او کام کرخاں۔“
16
۱۶۔تھے پھُوت مارئی اَن اِیئے تے ماݨ وی کرئی۔ ایَہڑے باتاں کرݨ بھَلی بات کونی۔
17
۱۷۔یاد راکھو، جکے نا ٹھاء ہے کہ کی کرݨ بھَلو ہے پݨ پَچھے وی او کونی کرتو، تو او پاپ کرئی۔