1
۱۔اَے مھارے بھائیاں، تھاں مئیں خاں گھݨا جِݨا خِکھاوݨ آݪا نی بَݨے۔ تھاں نا ٹھاء ہے کہ آپاں خِکھاوݨ آݪاں رو فیصلو سختی خاں ہوخے۔
2
۲۔کیان٘کے آپاں خارا گھݨے باتاں میں غلطے کرتا رہئیں۔ جے کوئی بات کرݨ میں غلطی نی کرے، تو او کامل ہے اَن آپرے پُورے ݙِیل نا قاٻُو میں راکھ خَگئی۔
3
۳۔ایہ اِیئاں جِی ہے جاں کوئی گھوڑے نا قاٻُو میں کرݨ رے خارُو اُوئے رے ماہن٘ݙے میں لَگام ݙئی اَن پَچھے اُوئے رے پُورے ݙِیل نا آپری مرضی خاں موڑ خَگئی۔
4
۴۔جووو، ٻیَڑا کِترا موٹا ہووئی اَن تِکھے بائرے خاں چَلئی، تو وی ٻیَڑو چلاوݨ آݪو چھوٹی پَتوار خاں اُوئے ٻیَڑے نا آپری مرضی خاں موڑ خَگئی۔
5
۵۔اِیئان٘ج زبان وی ہیک چھوٹو عُضبو ہے پݨ پھُوت میں موٹے موٹے باتاں کرئی۔ جووو، موٹے جن٘گل نا باخݙے لگاوݨ رے خارُو، ہیک چھوٹی چِݨگ گھݨی ہے۔
6
۶۔اَپݨے ݙِیل میں زبان وی چِݨگ آݪِیکار ہے۔ پُوری دُنیا ری بُرائی اِیئے خاں نِخرئی اَن ایہ پُورے ݙِیل نا داغ لگا خَگئی۔ زبان خاں پُوری زندگی نا باخݙے لاگ خَگئی کیان٘کے ایہ نرگ رے باخݙے خاں ٻَݪتی رہئی۔
7
۷۔ ہر قسم را جِناور، پَکھی، کِیڑا مکوڑا اَن پاݨی را جِناور تو مِنکھ رے قاٻُو میں آ خَگئی اَن آیا وی ہے۔
8
۸۔پݨ زبان نا کوئی قاٻُو میں کونی کر خَگتو۔ ایہ ہیک ایَہڑی بَلا ہے جکو کَݙے رُکتی کونی اَن خطرناک زہر خاں بھریوڑی ہے۔
9
۹۔ اِیئے زبان خاں آپاں اَپݨے اَکاشی ٻاپ پرمیشوَر ری بَݙائی کرئیں اَن اِیئیَج زبان خاں آپاں اُوئاں تے لعنت کرئیں جکاں نا اِیشوَر آپرے رُوپ تے بݨایا ہے۔
10
۱۰۔اَے مھارے بھائیاں، اِیئاں نی ہووݨ چاہیجے کہ ہیکے ماہن٘ݙے خاں بَݙائی اَن لعنت نِخرے۔
11
۱۱۔کی ہیکے کھُوہ خاں میٹھو اَن کھارو پاݨی نِخر خَگئی؟
12
۱۲۔کی انجیر رے بݨ ماتھے زیتُون رو پھل جاں ان٘گُوراں ری بیل ماتھے انجیر رو پھل لاگ خَگئی؟ اَے مھارے بھائیاں، اِیئاں بالکل کونی ہو خَگتو۔ کھارے کھُوہ خاں میٹھو پاݨی کونی نِخر خَگتو۔
13
۱۳۔تھاں میں کُݨ خِیاݨا اَن خَمجھ آݪا ہے؟ جے کوئی ہے، تو بھَلے طریقے خاں زندگی گُزار ری اِیئے رو ثبوت ݙو اَن اِیشوَر ری ݙِنوڑی خَمجھ اَن نِوڑت خاں بھَلا کام کرو۔
14
۱۴۔خبردار، جے تھارے مَن مئیں حِدخو اَن آپری غرض راکھݨ ہووے، تو اِیئے تے ماݨ نی کرو اَن نِیج خَچائی رے خِلاف کُوڑ ٻولو۔
15
۱۵۔ ایَہڑو ماݨ اَکاش خاں کونی پݨ دُنیا ری طرف خاں، ݙِیل ری مرضی اَن شیطان ری طرف خاں ہے۔
16
۱۶۔اِیئے خارُو جیتھ حِدخو اَن آپری غرض راکھݨ ہووئی، اوتھ بِڑھان٘داں اَن ہر طرح را بُرا کام وی ہووئی۔
17
۱۷۔پݨ ایَہڑی خَمجھ جکو اِیشوَر ری طرف خاں ہے، پہلکی بات تو ایہ ہے کہ او پویتر ہووئی۔ اُوئے خاں پَچھے ایہ کہ اُوئے میں خُلح اَن نرم دل ہووݨ ہووئی۔ اُوئے میں کَہیو منَݨ اَن دَیا ہووئی۔ جاں کوئی بݨ بھَلے پھلاں خاں بھریج جاوئی اِیئان٘ج او مِنکھ وی بھَلا کام کرتو رہئی اَن نی او کَئی ہیکے رے پاخے ہووئی اَن نِیج کَئی خاں ٹھَگی کرئی۔
18
۱۸۔جے تھے خُلح کراخو، تو آپت میں نیکی خاں رہخو۔