1
۱۔اَے دولت آݪاں، مھاری بات غور خاں خُݨو، اُوئاں مُصیبتاں رے خارُو روؤ اَن ماتم کرو جکو تھاں تے آوݨ آݪے ہے۔
2
۲۔تھان٘ری دولت کَئی کام ری کونی رہ اَن تھان٘رے گابھاں نا تیݙے کھا جاخے رے۔
3
۳۔تھان٘رے خونے اَن چان٘دی نا زن٘گ لاگ جاخے اَن ایَج زن٘گ تھان٘رے خِلاف گواہی ݙیخے اَن باخݙے آݪِیکار تھان٘رے ݙِیل نا کھا جاخے۔ کی تھاں نا ٹھاء کونی کہ ایہ دُنیا ختم ہووݨ آݪی ہے اَن تھے حالی تک دولت بھیݪی کرݨ میں لاگوڑا ہو؟
4
۴۔جووو، جکو مزدُوری تھاں آپری لالچ ری وجہ خاں مزدُوراں نا کونی ݙِنی اوج تھان٘رے خِلاف گواہی ݙئی وی اَن مزدُوراں ری فریاد پرمیشوَر تک پُگی ری۔
5
۵۔تھاں جَگت میں عیش اَن مزے ری زندگی گُزار ری آپ نا اِیئاں تیار کریو رو جاں کَئی جِناور نا پاݪ رو قُربانی رے خارُو تیار کریو جاوئی۔
6
۶۔تھاں ایَہڑے نیک مِنکھاں تے اِلزام لگا رو قتل کریو جکو تھان٘رو مُقابلو کونی کر خَگتا ہَتا۔
7
۷۔اَے بھائیاں، تھے صبر خاں پربھُو یسوع رے آوݨ رو اِنتظار کرو جاں کوئی زمین باوݨ آݪو خِیاݪے اَن اُنہاݪے رے میہہ رو صبر خاں اِنتظار کرئی کہ او ٹائیم تے فصل باوے اَن بھَلی فصل باڈھ خَگے۔
8
۸۔اِیئان٘ج تھے وی صبر کرو اَن حوصلو راکھو کیان٘کے پربھُو یسوع رے آوݨ رو ٹائیم نیڑو ہے۔
9
۹۔اَے بھائیاں، ہیکے ٻِجے تے اِلزام نی لگاؤ کہ تھے سزا خاں بَچ جاؤ۔ جووو، انصاف کرݨ آݪو بیگو آوݨ آݪو ہے۔
10
۱۰۔اَے بھائیاں، اُوئاں نبیاں آݪِیکار زندگی گُزارو جکاں پرمیشوَر رے ناں رو پرچار کریو اَن صبر خاں ݙُکھ برداشت کریا۔
11
۱۱۔جووو، صبر خاں ݙُکھ برداشت کرݨ آݪاں نا مھے دھَنکار کَہیں۔ تھاں ایوب رے صبر رے بارے میں خُݨیو ہے اَن ایہ وی ٹھاء ہے کہ پرمیشوَر اُوئے خارُو کی کُجھ کونی کریو۔ اِیئے بات خاں ایہ ٹھاء لاگئی کہ پرمیشوَر دَیا اَن مہربانی کرݨ آݪو ہے۔
12
۱۲۔ اَے وشواسیاں، خاص بات ایہ ہے کہ خان٘خ نی اُکھݨو، نی اَکاش رو، نی دھرتی رو اَن نی کَئی ٻِجی چیز رو پݨ ہاں ری جگہا ہاں اَن کونی ری جگہا کونی کَہوݨ چاہیجے، پَچھے تھے سزا خاں بَچ جاخو۔
13
۱۳۔جے تھاں مئیں خاں کوئی مُصیبت میں ہے، تو او پراتھنا کرے۔ جے کوئی راضی ہے، تو او اِیشوَر ری بَݙائی را گیت گاوے۔
14
۱۴۔ جے تھاں مئیں خاں کوئی بِیمار ہے، تو او وشواسی منݙݪی رے راہنُماواں نا ہیلو کرے کہ او پربھُو رے ناں خاں بِیمار نا تیل لگا رو اُوئے خارُو پراتھنا کرے۔
15
۱۵۔جکو پراتھنا وشواس خاں کرخو، اُوئے ری وجہ خاں بِیمار بَچ جاخے اَن پرمیشوَر اُوئے نا بالکل ٹھیک کر ݙیخے اَن جے اُوئے کوئی پاپ کریا ہوخے، تو او وی معاف ہو جاخے را۔
16
۱۶۔اِیئے خارُو ہیکے ٻِجے رے رُوبرُو آپرے پاپاں نا منو اَن ہیکے ٻِجے رے خارُو پراتھنا کرو کہ تھے ٹھیک ہو جاؤ۔ نیک مِنکھ ری پراتھنا خاں گھݨو کُجھ ہو خَگئی۔
17
۱۷۔ایلیاہ نبی وی آپاں آݪِیکار اِنسان ہَتو۔ جَݙے اُوئے وشواس خاں پراتھنا کی کہ میہہ نی بَرخے، تو خاڈھی تِین بَرخ تک دھرتی ماتھے میہہ کونی بَرخیو۔
18
۱۸۔پَچھے اُوئے بھَݪے پراتھنا کی کہ میہہ بَرخے، تو اِیشوَر اَکاش خاں میہہ بَرخایو اَن دھرتی ماتھے فصلاں اُگیے۔
19
۱۹۔ اَے وشواسیاں، جے تھاں مئیں خاں کوئی خَچائی رے مارگ خاں بھَٹک جاوے پݨ کوئی ٻِجو اُوئے نا پاچھو اِیئے مارگ تے لے آوے،
20
۲۰۔تو یاد راکھو، جکو کَئی پاپی نا اُوئے رے غلط مارگ خاں پاچھو لے آوئی، او اُوئے نا ہمیشہ ری موت خاں بَچاخے اَن اُوئے رے گھݨے پاپاں نا لُکاخے۔