¹ جݙے ایہ خارا کام تھی گیا تو سرداراں میں کڈھے آ اَن کہݨ لاگا کہ اسرائیل را منکھ اَن ایشور را پوجاری اَن لاوی اَن آخے پاخے رے قوماں خاں دھار کونی رہیا۔ کیانکےکنعانیاں اَن حتیاں اَن فرزیاں اَن یبُوسیاں اَن عمانیاں اَن موآبیاں اَن مصریاں اَن اموریاں جیہڑا گندا کام کرتا رئی۔ ² اُوئاں آپرے اَن آپرے ݙیکراں خارو اُوئاں رے ݙیکرے لیے ایئاں پویتر نسل ایئاں آخے پاخے ری قوماں خاں بچڑ گی۔ اَن سرداراں اَن حاکماں رو ہاتھ ایئے برائی میں خارا خاں بدھیوڑو ہے۔ ³ جݙے میں ایہ بات خُݨی تو آپرا گابھا اَن آپری چادر پھاڑی اَن ماتھے اَن ݙاڑھی را باݪ پٹیا اَن پریشان تھی ٻیٹھو۔ ⁴ پچھے او خارا جکو اسرائیل رے ایشور ری باتاں خاں کانپتا ہَتا غلامی رے ایئے گندے کام رے کرے میں کڈھے بھیݪا ہوا اَن ہوں آتھݨ رے بلیدان تک پریشان ٻیٹھو رہیو۔ ⁵ اَن آتھݨ رے بلیدان ری گھڑی آپرا پھاٹوڑا گابھا پہر اَن پھاٹوڑی چادر اوڈھیوڑی آپری شرمندگی ری حالت خاں اُٹھیو اَن آپرے گوݙا تک کھر رو پرمیشور آپرے ایشور نی آپرا ہاتھ اُکھݨیا۔ ⁶ اَن کہیو اے مھارا ایشور ہوں شرمندہ ہاں اَن تے نی اَے مھارا ایشور آپرو مھانݙو اُکھݨتے لاج آئی وی کیانکے مھارا گناہ بدھتا بدھتا مھارے ماتھے خاں اُونچا ہو گیا را اَن مھارا پاپ آسمان تک پُگ گیا را۔ ⁷ آپرے ٻاپ ݙاݙے خاں آج تک گھݨا پاپی رہیا اَن آپری بُرائی ری وجہ خاں مھاں اَن مھارا بادشاہ اَن مھارا ایشور را پوجاری اَن مُلکھ را بادشاہ اَن تلوار اَن غلامی اَن شرمندگی رے حوالے ہوئے رے جاں آج رے ݙن ہے۔ ⁸ ہمے تھوڑے ݙناں خاں پرمیشور مھارے ایشور ری دیا مھاں تے ہوئی ہے۔ ایئے رے خارو کہ مھاں کہینک بچ جاواں اَن اُوئے رے پویتر گھر میں مھاناں ہیک کھونٹی ملے اَن مھارو ایشور مھارے آنکھے کھولے اَن مھاری غلامی میں مھاناں کہینک تازگی ݙیوے۔ ⁹ کیانکے مھاں تو غلام ہاں پݨ مھارے ایشور مھاری غلامی میں مھاناں چھوڑیا کونی بلکہ مھاناں تازگی ݙنی اَن آپرے ایشور رے گھر بݨاوݨ میں اَن اُوئے رے بھاگوڑے گھر نا بݨاوݨ اَن یہوداہ اَن یروشلیم میں مھاناں رہݨ خارو شہرݙیوݨ رے خارو فارس رے بادشاہ رے خامھݨے مھاں تے دیا کی۔ ¹⁰ اَن ہمے اَے مھارا ایشور مھاں ایئے خاں بعد کی کہا؟ کیانکے مھاں تھارے اُوئاں حکماں نا چھوڑ ݙنا را۔ ¹¹ جکو تئے آپرے بھگتاں نبیاں رے وسیلے خاں کہیا او ملک جکے نا تھاں مھارے خارو لیوݨ نا جاوے اَن مُلکھاں رے قوماں رے گندے کاماں رے کرے اپپویتر ملک ہے کیانکے اُوئاں آپرے پاپ خاں ایئے پاخے خاں اُوئے پاخے تک بھر ݙنو رو۔ ¹² تو آپرے ݙیکرے اُوئے رے ݙیکرا نا نی ݙیوے اَن اُوئاں رے ݙیکرے آپرے ݙیکراں خارو نی لیوے اَن کݙے وی اُوئاں ری خیر نی مانگے بلکہ تھاں پکا رہیا اَن اُوئے ملکھ رے بھلے بھلے چیزاں کھاؤ اَن آپری اولاد رے خارو اُوئاں نا چھوڑ جایا۔ ¹³ اَن مھارے گندے کاماں اَن موٹے پاپ رے کرے جکو کچھ مھاں خاں ہویو اُوئے خاں پچھے اَے مھارا ایشور جویو جاوے تو مھارے پاپاں رے حخاب خاں مھاناں گھٹ سزا ݙنی ہے اَن مھاناں تئے چھوڑ ݙنا۔ ¹⁴ کی مھاں بݪے وی تھارے حکماں نا توڑاں اَن اُوئے قوماں خاں تاتو جوڑا جکو ایئے گندے کاماں نا کرئی کی توں مھاں خاں ایئاں ریئخ کونی کریں مھاناں تباہ اَن برباد کر ݙے اِترے تک کہ مھاں میں کوئی باقی نی بچے اَن نی جی کوئی ٻاݪ۔ ¹⁵ اَے پرمیشور اسرائیل رے ایشور تُوں خچو ہے کیانکہ مھاں بچیوڑا ہا جکو بچ نخریا جاں آج رے ݙن جو کہ مھاں پاپ میں وی تھارے خامھݨے ہا کیانکے ایئاں کوئی وی تھارے خامھݨے کونی ابھیج خگتو۔