¹ ارتخششتا بادشاہ ری بادشاہی رے دور میں جکو منکھ میں بھیݪا بابل خاں نخریا اُوئے رے بوڈھیا را سردار ایہ ہے ۔ اَن اُوئاں ری پوتھی ایہ ہے۔ ² بنی فیخاس میں خاں جیرسوم۔ بنی اِتمر میں خاں دانی ایل۔ بنی داؤد میں خاں حُطوش۔ ³ بنی سِکنیاہ آݪا میں خاں بنی پرعُوص میں خاں ذکریاہ اَن اُوئے بھیلا ݙوڈھ خو مَرد پیڑھی رے حخاب خاں گݨیا گیا ہَتا۔ ⁴ بنی پخت موآب میں خاں اِلیہوعینی بِن زراخیاہ اَن اُوئے بھیݪا ٻے خو مَرد۔ ⁵ اَن بنی سِکنیاہ میں خاں یحزی ایل رو ݙیکرو اَن اُوئے بھیݪا تین خو مَرد۔ ⁶ اَن بنی عدِین میں خاں عبد بِن یُونتن اَن اُوئے بھیݪا پچاخ مَرد۔ ⁷ اَن بنی عیلام میں خاں یسعیاہ بِن عتلیاہ اَن اُوئے بھیݪا ختر مَرد۔ ⁸ اَن بنی سفطیاہ میں خاں زبدیاہ بِن مِیکاایل اَن اُوئے بھیݪا اخی مَرد۔ ⁹ اَن بنی یوآب میں خاں عبدیاہ بِن یحی ایل اَن اُوئے بھیݪا ٻے خو اٹھارے مَرد۔ ¹⁰ اَن بنی سلُومِیت میں خاں یُوسُفیاہ رو ݙیکرو اَن اُوئے بھیݪا ہیک خو خاٹھ مَرد۔ ¹¹ اَن بنی ببی میں خاں زکریاہ بن ببی اَن اُوئے بھیݪا اٹھائیخ مَرد۔ ¹² اَن بنی عزجاد میں خاں یُوحنان بِن ہقاطان اَن اُوئے بھیݪا ہیک خو دخ مَرد ¹³ اَن بنی ادُونقام میں خاں جکو خارا خاں لارے گیا اُوئاں را ناں ایہ ہے الیفاط اَن یعی ایل اَن سمعیاہ اَن اُوئاں بھیݪا خاٹھ مَرد ¹⁴ اَن بنی بِگوی میں خاں عُوطی اَن زبود اَن اُوئاں بھیݪا ختر مَرد۔ ¹⁵ پچھے میں اُوئاں نا اُوئے دریا کڈھے جکو اہاوا نی بہی بھیݪا کریا اَن اُوتھ مھاں تین ݙن خیماں میں رہیا اَن میں منکھاں اَن میں ایشور رے پُجاریاں نا جویو تو بنی لاویاں میں کوئی کونی ہَتو۔ ¹⁶ پچھے میں الیعزر اَن ارِیئیل اَن سمعیاہ اَن اِلناتن اَن یریب اَن اِلناتن اَن ناتن اَن زکریاہ اَن مسلام جکو امیر ہَتا ہیلو کرایو۔ ¹⁷ اَن میں اُوئاں نا کسیفیا ناں ری ہیک جگہ تے اِدو اَن اُوئے رے بھائیاں نتنیم(ایہ وی ایشور ری بھگتی میں پوجاریاں آݪی کار خدمت کرتا جکاں نا ایشور را موٹا پوجاری چُگتا ہَتا) نا کسیفیا میں کہووݨو ہَتو او مھاں نی مھارے ایشور رے گھر میں خدمت کرݨ آݪاں نا لے آوے۔ ¹⁸ اَن کیانکے مھارے ایشور ری دیا رو ہاتھ مھاں ماتھے ہَتو ایئے رے خارو او محلی بِن لاوی بن اسرائیل ری اولاد میں خاں ہیک خیاݨے منکھ نا اَن سربیاہ نا اَن اُوئے رے ݙیکراں اَن بھائیاں میں خاں اٹھاراں منکھاں نا۔ ¹⁹ اَن حسبیاہ نا اَن اُوئے بھیݪا بنی مراری میں خاں یسعیاہ نا اَن اُوئے رے بھائیاں اَن اُوئے رے ݙیکراں ایئاں بیخ منکھاں نا۔ ²⁰ اَن نتنیم(ایہ وی ایشور ری بھگتی میں پوجاریاں آݪی کار خدمت کرتا جکاں نا ایشور را موٹا پوجاری چُگتا ہَتا) میں خاں جکاں نا داؤد اَن امیراں اَن لاویاں ری خدمت رے خارو چُگیا ہَتا بے خو بیخ نتنیماں نا لے آیا ایئاں خارا را ناں خُݨایا گیا را۔ ²¹ پچھے میں اہاوا رے دریا تے روزے رو پرچار کریو ایئے رے خارو کہ مھاں آپرے ایشور رے آگے آپرے اَن آپرے ٻاݪاں اَن آپرے مال رے خارو خِدھے مارگ نا لاں اَن نرمل بݨاں۔ ²² کیانکے میں شرم خاں بادشاہ خاں سپاہیاں رے جتھے اَن سواراں رے خارو درخواست کونی ݙنی ہَتی۔ ایئے رے خارو کہ او مارگ میں مھارے دشمن خاں مھاناں بچاوݨ خارو مھاری مدد کرے۔ کیانکے مھاں بادشاہ نا کہیو ہَتو کہ مھارے ایشور رو ہاتھ بھلائی رے خارو اُوئاں خارا بھیلو ہے جکو اُوئے نے منئی اَن اُوے رو زور اَن کاݪ اُوئاں خاراں رے خلاف ہے جکو اُوئے نا چھوڑ ݙئی۔ ²³ ایئے خارو مھاں روزو راکھ اَن آپرے ایشور ری منت کی اَن اُوئے مھاری خُݨ لی ۔ ²⁴ پچھے میں ایشور رے پوجاریاں میں خاں ٻارہے نا سربیاہ اَن حسبیاہ اَن اُوئے رے بھیݪا اَن اُوئے رے بھائیاں میں خاں ݙخاں نا الگ کریا۔ ²⁵ اَن اُوئاں نا او چاندی خونو اَن او ٹھیکر او ہدیہ جکو مھارے ایشور رے گھر خارو بادشاہ اَن اُوئے رے وزیراں اَن امیراں اَن خاری بنی اسرائیل جکو اُوتھ ہتَا جویو اَن تول ݙنو۔ ²⁶ میں جی اُوئاں رے ہاتھ میں خاڈھا چھے خو قنطار (فی قنطار 35 جاں 36 کلو گرام) چاندی اَن خو قنطار چاندی را ٹھیکر اَن خو قنطار خونو۔ ²⁷ اَن خونے را بیخ پیالا جکو ہزار دِرہم را ہَتا اَن گھݨا چمکتا پیتݪ را ٻے ٹھیکر جکو خونے آݪی کار گھݨا قیمتی ہَتا تول ݙینا۔ ²⁸ اَن میں اُوئاں نا کہیو کہ تھاں پرمیشور رے خارو پویتر ہو اَن ایہ ٹھیکر وی پویتر ہے اَن ایہ چاندی اَن خونو پرمیشور تھارے ٻاپ ݙاݙے رے ایشور رے خارو اُوئے رے مرضی رو بلیدان ہے ²⁹ خوجاگ رہیا جتری تک کہ یروشلیم میں پرمیشور رے گھر رے کوٹھیاں میں ایشور رے موٹے پوجاریاں اَن لاویاں اَن اسرائیل رے پُراݨا بوڈھیا اَن امیراں رے خامھݨے اُوئاں نا تول نی ݙو ایئے ری خنبھاݪ راکھیا۔ ³⁰ اَن ایشور رے پوجاریاں اَن لاویاں خونے اَن چاندی اَن ٹھیکراں نا تول اَن لیا ایئے رے خارو کہ اُوئاں نا یروشلیم میں مھارے ایشور رے گھر میں پُگاوے۔ ³¹ پچھے مھاں پہلے مہیݨے ری ٻارھوی تاریخ نا اہاوا رے دریا خاں بوہا کہ یروشلیم نی جاواں اَن مھارے ایشور رو ہاتھ مھاں ماتھے ہَتو اَن اُوئے مھارے دشمناں خاں جکو مارگ میں لُکیوڑا ہَتا اُوئے رے ہاتھ خاں مھاناں بچایا۔ ³² اَن مھاں یروشلیم میں پُگ تے تین ݙن تک اُوتھ جی رہیا۔ ³³ اَن چوتھے ݙن او چاندی او خونو اَن ٹھیکر مھارے ایشور رے گھر میں تول اَن ایشور رے پوجاری مِریموت بن اُوریاہ رے ہاتھ میں ݙے ݙینااَن اُوئے بھیݪو الیعزر بن فینحاس ہَتو اَن اُوئے بھیݪا ایہ لاوی ہَتا یوزاباد بن یشوع اَن نوعیدیاہ بن بنوی۔ ³⁴ خارے چیزاں نا گِݨ اَن تول تے پورو وزن لِکھ لینھو۔ ³⁵ اَن غلامی میں خاں اُوئاں منکھاں نا جکو ݙیخ نکالے خاں پاچھا آیا ہَتا۔اسرائیل رے ایشور رے خارو ٻاݪݨ آݪا بلیدان چڑھایا۔ خارے اسرائیل رے خارو بارھے ڈھگا اَن پچانوے گھیٹا اَن ختتر ٻکرا اَن پاپ رے بلیدان رے خارو ٻارھے ٻکرا ایہ خارو کچھ پرمیشور رے خارو ٻاݪݨ آݪو بلیدان ہَتو۔ ³⁶ اَن اُوئاں بادشاہ رے فرماناں نا بادشاہ رے نائباں اَن دریا رے پار رے حاکمان رے حوالے کیو اَن اُوئاں منکھاں ری اَن ایشور رے گھر حمایت کی۔