¹ ایئاں باتاں خاں بعد شاہِ فارِس ارتخششتا رے دور میں عزار بِن سِرایاہ بِن عرزیاہ بِن خِلقیاہ۔ ² بِن سلوم بِن صدوق بِن اخیطوب۔ ³ بِن امریاہ بِن عرزیاہ بِن مِرایوت۔ ⁴ بِن زراخیاہ بِن عُزی بِن بُقی۔ ⁵ بن ابیسُوع بِن فیخاس بِن الیعزر بِن ہارُون ایشور رو موٹو پوجاری۔ ⁶ ایہ جی عزرا بابل خاں گیو اَن او موسٰی رے شاستر میں جاں پرمیشور اسرائیل رے ایشور ݙنو ہَتو ماہر فقِیہہ ہَتو اَن کیانکے پرمیشور اُوئے رے ایشور رو ہاتھ اُوئے ماتھے ہَتو بادشاہ اُوئے رے خارے باتاں منتو گیو۔ ⁷ اَن بنی اسرائیل اَن ایشور را پوجاری اَن لاویاں اَن گاوݨ آݪاں اَن درٻاری اَن نتنیم (ایہ وی ایشور ری بھگتی میں پوجاریاں آݪی کار خدمت کرتا جکاں نا ایشور را موٹا پوجاری چُگتا ہَتا) میں خاں کہینک منکھ ارتخششتا بادشاہ رے خاتوے برخ یروشلیم میں آیا۔ ⁸ اَن او بادشاہ ری راجائی رے خاتوے برخ رے پانچوے مہیݨے یروشلیم میں پُگا۔ ⁹ کیانکے پہلکے مہیݨے ری پہلکی تاریخ نا تو او بابل خاں بوہا اَن پانچوے مہیݨے ری پہلکی تاریخ نا یروشلیم میں آ پُگا کیانکے اُوئے رے ایشور رو دیا آݪو ہاتھ اُوئے تے ہَتو۔ ¹⁰ ایئے رے خارو کہ عزار راجی ہو گیو ہَتو۔ کہ پرمیشور رے شٻد رو منے اَن اُوئے تے بہے اَن اسرائیل میں اُوئے تعلیم رو پرچار کرے۔ ¹¹ اَن عزرا ایشور رو پوجاری اَن فقیہہ یعنی پرمیشور رے اسرائیل نا ݙنوڑے حُکماں رے باتاں جکو فقیہیا نا خط ارتخششتا بادشاہ ݙنو اُوئے ری نقل ایہ ہے ¹² ارتخششتا شاہنشاہ رے پاخے خاں عزرا ایشور رو پوجاری یعنی آسمان رے ایشور رے شٻد رو فقیِہہ کامل جاں لِکھیوڑو ہے۔ ¹³ ہوں ایہ حکم ݙئی وو کہ اسرائیل را جکو منکھ اَن ایشور را پوجاری اَن لاوی مانجے مُلک میں ہے۔ اُوئاں میں خاں جِترا وی آپری خوشی خاں یروشلیم نی جاوݨ چاہوی تئے بھیݪا جاوے۔ ¹⁴ کیانکے تو بادشاہ اَن اُوئاں رے خاتے مُشیراں ری طرف خاں میلیوڑو ہے ایئے رے خارو آپرے ایشور رے شٻد رے مطابق جکو تھارے ہاتھ میں ہے یہوداہ اَن یروشلیم رو حال وال ری ٹھاہ کرے۔ ¹⁵ اَن جکو چاندی اَن خونو بادشاہ اَن اُوئے رے مُشیراں اسرائیل رے ایشور نا جکے رو گھر یروشلیم میں ہے آپری خوشی خاں ݙنو ہے لے جا۔ ¹⁶ اَن جِتری چاندی اَن خونو بابل رے خارے صوبے خاں تناں ملخے اَن جکو خوشی خاں منکھ اَن ایشور را پوجاری آپرے ایشور رے گھر رے خارو جکو یروشلیم میں ہے آپری مرضی خاں تناں ݙیوے اُو لے جا۔ ¹⁷ ایئے رے خارو اُوئے پیخاں خاں ڈھگا اَن گھیٹا اَن مِیٹھائے اَن اُوئے رے بِلیدان اَن اُوئے رے پکاوݨ آݪے چیزاں تو مول رے لے لیوے اَن اُوئاں نا آپرے ایشور رے گھر میں بلیدان آݪی جگھا ماتھے یروشلیم میں ہے چڑھائے۔ ¹⁸ اَن تناں اَن تھارے بھائیاں نا باقی چاندی خونے خاں جکو کچھ کرݨ تھاناں بھلو لاگے او جی ایشور ری مرضی رے مطابق کریا۔ ¹⁹ اَن جکو ٹھیکر تھارے ایشور رے گھر ری بھگتی رے خاروݙنا جاخے اُوئاں نا یروشلیم رے ایشور رے آگے ݙے ݙیوے۔ ²⁰ اَن ٻجو جکو کچھ تناں ایشور رے گھر میں ݙیوݨ پڑے او تو شاہی خزانے خاں ݙیوے۔ ²¹ اَن ہوں ارتخششتا بادشاہ آپ دریا پار رے خارے خزانچیاں نا حکم ݙیوی کہ جکو کچھ عزار ایشور رو پوجاری آسمان رے ایشور رے شٻد رو فقیو تھاں خاں مانگے او اُوئے گھڑی ݙنو جاوے۔ ²² خو قنطار چاندی (فی قنطار 35 جاں 36 کلو گرام) اَن خو کُر ݙاݨاں(220 جاں 230 لیٹر فی کُر)اَن خو بَت مَے (22 لیٹر فی بَت) اَن خو بَت تیل لوݨ بے اندازہ۔ ²³ جکو کچھ آسمان رے ایشور حکم ݙنو ہے توں ٹھیک اُوئاں جی آسمان رے ایشور رے گھر خارو کرے کیانکے بادشاہ اَن شہزاداں رے مُلک تے کاݪ کیاں آوے۔ ²⁴ اَن تناں مھاں کہی وا کہ ایشور رے پوجاریاں اَن لاویاں اَن گاوݨ آݪاں اَن درٻاریاں اَن نتنیم (ایہ وی ایشور ری بھگتی میں پوجاریاں آݪی کار خدمت کرتا جکاں نا ایشور را موٹا پوجاری چُگتا ہَتا) اَن ایشور رے ایئے گھر رے شیواداریاں تے کئی قسم ری چُنگی جاں ٹیکس لگاوݨ ٹھیک کونی۔ ²⁵ اَن اَے عزرا تُوں آپرے ایشور ری اُوئے خمجھ رے مطابق جکو تناں ݙنی ہے حاکماں اَن قاضیاں نا چُگے تاکہ درپا پار رے خارے منکھاں رو جکو تھارے ایشور رے شٻد نا منئی انصاف کرے اَن تُوں اُوئاں نا جکو کونی جاݨتا اُوئاں نا خِکھا۔ ²⁶ اَن جکو کوئی تھارے ایشور رے شٻد نا اَن بادشاہ رے حکم نا نی منے اُوئے نا قانونی سزا ݙنی جاوے۔ پچھے بھلے مَوت جاں ملک نکاݪو جاں مال ری ضبطی جاں قید ری۔ ²⁷ پرمیشور مھارے ٻاپ ݙاݙے رو ایشور دھن ہے جکے ایہ بات بادشاہ رے من میں گھاتی کہ پرمیشور رے گھر نا جکو یروشلیم میں ہے بݨاوے۔ ²⁸ اَن بادشاہ اَن اُوئے را مُشیراں رے خامھݨے اَن بادشاہ رے خارے موتبر سرداراں رے آگے آپری ݙیا میں تے کی اَن مناں زور ملیو پرمیشور آپرے ایشور رے ہاتھ خاں جکو میں تے ہَتو۔ اَن میں اسرائیل میں خاں خاص منکھاں نا بھیلا کیا کہ او میں بھیݪا ہالے۔