¹ پچھے دارا بادشاہ حکم ݙنو کہ بابل رے پُراݨے کتاب گھر میں جیتھ خزاناں راکھیوڑا ہَتا تلاشی کی۔ ² اَن اخمتا رے محل میں جکو مادے رے صوبے میں ہے ہیک چامٻڑے ری کتاب لابھی جکے میں ایہ حکم لِکھیوڑو ہَتو۔ ³ خورس بادشاہ رے پہلے برخ خورس بادشاہ ایشور رے گھر رے بارے میں جکو یروشلیم میں ہے حکم ݙنو کہ او گھر جاں او جگھا جیتھ بلیدان کرتا ہَتا بݨایو جاوے۔ اَن ایئے رے بنیادیاں مضبوطی خاں بݨایے جاوے ایئے ری اُونچائی خاٹھ ہاتھ اَن ایئے رو بر خاٹھ ہاتھ ہووے۔ ⁴ تین بار بھاری پتھراں خاں اَن ہیک بار نئی لکڑی رو ہووے اَن ایئے رو خرچ بادشاہ رے محل خاں ݙنو جاوے۔ ⁵ اَن ایشور رے گھر رے خونے اَن چاندی را ٹھیکر جکو نبوکدنضر بھگتی گھر خاں جکو یروشلیم میں ہے کاڈھ تے بابل میں لے آیو پاچھا ݙنا جاوے اَن یروشلیم رے بھگتی گھر میں آپری آپری جگہ راکھیا جاوے اَن تھاں ایئاں نا ایشور رے گھر میں راکھیا۔ ⁶ اَن تھاں اے دریا پار رے حاکم تتنی اَن شتربوزنی اَن تھارا افارسکی خنگتی جکو دریا پار ہے تھاں اُوتھ خاں اݪگا رہیا۔ ⁷ ایشور رے ایئے گھر میں ہاتھ نی گھاتیا یہودیاں رو حاکم اَن یہودیاں رے بوڈھیا ایشور رے گھر نا اُوئے ری جگھا تے بݨایا۔ ⁸ ایئے خاں ٹاݪ ایشور رے گھر بݨاوݨ میں یہودیاں رے بوڈھیاں خاں تھاں کی کرخو تو اُوئاں رے بارے میں مھارو حکم ہے کہ شاہی مال میں خاں جکو دریا پار خزانے میں خاں منکھاں نا بے روک خرچ ݙیوݨوں ہے ایئے رے خارو کہ اُوئاں نا روکݨو نی پڑے۔ ⁹ اَن آسمان رے ایشور ری ٻاݪݨ آݪے بلیدان رے خارو جکے جکے شے ری اُوئاں نا لوڑھ ہووے۔ جاں ڈھگا اَن ٻکرا اَن حلوان اَن جترا ݙاݨا اَن لوݨ اَن انگوراں رو رخ اَن تیل او ایشور رے پوجاری جکو یروشلیم میں ہے خُݨاوے او خارو کچھ ہر روز اُوئاں نا ݙنو جاوے۔ ¹⁰ ایئے رے خارو کہ او آسمان رے ایشور آگے سکون خاں بلیدان ݙے اَن بادشاہ اَن شہزاداں ری لمٻی عمر ری پراتھنا کرے۔ ¹¹ میں ایہ حکم وی ݙنو ہا جکو وی ایئے فرمان نا بدلے اُوئے رے گھر میں خاں شتیری کاڈھ اَن اُوئے ماتھے اُوئے نا خوݪی ݙنی جاوے۔ ایئے بات رے کرے اُوئے رے گھر نا بھانگ ݙنو جاوے۔ ¹² اَن او ایشور جکے رو ناں اُوتھ ہے خارے بادشاہواں اَن منکھاں نا جکو ایشور رے اُوئے گھر نا جکو یروشلیم میں ہے ناکھݨ رے کرے ایئے حکم نا بدلے رے خارو آپرو ہاتھ آگھو کرے اوئے نا غارت کرے مناں دارا حکم ݙنو رو ایئے ماتھے زور خاں عمل کریو جاوے۔ ¹³ پچھے دریا پار رے حاکم تتنی اَن شتربوزنی اَن اُوئاں را خنگتیاں دارا بادشاہ رے حکم ݙیوݨ رے کرے اُوئے رے مطابق کام کرݨ لاگا۔ ¹⁴ ایئاں یہودیاں رے بوڈھیاں حجی نبی اَن زکریاہ بِن عِدو رے پرچار رے کرے بݨاوتا گیا اَن کامیاب ہوتا گیا اُوئاں اسرائیل رے ایشور رے حکم اَن خورس اَن دارا اَن شاہِ فارِس ارتخششتا رے حکم رے مطابق اُوئے نا پورو بݨایو۔ ¹⁵ اَن ایہ جگھا اگیاروے مہیݨے ری تیجی تاریخ میں دارا بادشاہ ری بادشاہی رے چھیوے برخ میں پوری ہوی۔ ¹⁶ اَن بنی اسرائیل اَن ایشور رے پوجاریاں لاویاں اَن غلاماں رے ٻجے منکھاں وݙی خوشی خاں ایشور رے گھر نا پویتر کریو۔ ¹⁷ اَن اُوئاں ایشور رے ایئے گھر نا پویتر کرݨ آݪے ݙن خو ڈھگا اَن ٻے خو گھیٹا اَن چار خو بکرا اَن خارے اسرائیل رے پاپاں رے بلیدان رے خارو اسرائیل رے ٻارھے قبیلاں رے کرے ٻارھے بکرا بلیدان کریا۔ ¹⁸ اَن جاں موسٰی رے شاستر میں لِکھیوڑو ہَتو اُوئاں ایشور رے پوجاریاں نا ایئے ری بنڈ اَن لاویاں نا اُوئے رے دھوڑے رے مطابق ایشور ری بھگتی رے خارو جکو یروشلیم میں ہووئی مقرر کریو۔ ¹⁹ اَن پہلکے مہیݨے ری چوݙوئی تاریخ نا اُوئاں منکھاں نا جکو غلامی خاں آیا ہَتا فسح ری عید منائی۔ ²⁰ کیانکے ایشور رے پوجاریاں اَن لاویاں ہیک تن تھی را آپرے آپ نا پویتر کریو۔ او خارا را خارا پویتر ہَتا اَن اُوئاں اُوئے خارے منکھاں رے خاں جکو غلامی خاں آیا ہَتا اَن آپرے بھائی ایشور رے پوجاریاں رے خارو اَن آپرے خارو فسح نا باڈھی۔ ²¹ اَن بنی اسرائیل جکو غلامی خاں آیا ہَتا اَن اُوئاں خاراں جکو پرمیشور اسرائیل رے ایشور نا منݨ رے کرے اُوئے دھرتی تے اوپرے قوماں ری پلیتی خاں اݪگا ہویا ہَتافسح کھادھی۔ ²² اَن خوشی خاں خات ݙناں تک بے خمیری ٻاٹی ری عید منائی کیانکہ پرمیشور اُوئاں نا راجی کریا ہَتا۔ اَن شاہِ اسُور رے من نا اُوئے رے پاخے کریا ہَتا۔ ایئے رے خارو کہ او ایشور رے یعنی اسرائیل رے ایشور رے گھر بݨاوݨ میں اُوئاں ری مدد کرے۔