¹ پچھے بنی حجی نبی اَن زکریا بِن عِدو اُوئاں یہودیاں رے خامھݨے جکو یہوداہ اَن یروشلیم میں ہَتا۔ پرچار کرݨ لاگا اُوئاں اِسرائیل رے ایشور رے ناں خاں اُوئاں رے خامھݨے پرچار کریو۔ ² پچھے زرُبابُل بِن سِالتی ایل اَن یشوع بِن یوصدق اُٹھیا اَن ایشور رے گھر نا جکو یروشلیم میں ہے بݨاوݨ لاگا اَن ایشور را اُو نبی اُوئاں بھیݪا تھی را اُوئاں ری مدد کرتا ہَتا۔ ³ اُوئاں جی ݙناں میں دریا پار رو حاکم تتنی اَن شتربوزنی اَن اُوئے را خنگتی اُوئے کڈھے آ اَن اُوئاں نا کہݨ لاگا کہ کے رے حکم خاں تھاں اِئیے گھر نا بݨاوی اَن ایئے کام نا پورو کرئی وا؟ ⁴ پچھے مھاں اُوئاں نا اِیئاں بݪتی ݙنی کہ اُوئاں منکھاں رو کی ناں ہے جکو ایئے نا بݨاوی وا؟ ⁵ پݨ یہودیاں رے بوڈھیا تے اُوئاں رے ایشور ری کرپا ہَتی۔ ایئاں اُوئاں نا نی روکیو اِتری تک کہ ایہ بات دارا تک نی پُگی اَن پچھے ایئے رے بارے میں خط خاں کوئی بݪتی نی آئی۔ ⁶ ایئے خط ری نقل نا جکو دریا پار رے حاکم تتنی اَن شتربوزنی اَن اُوئے رے بھیݪے خنگتیاں نا جکو دریا پار ہَتا دارا بادشاہ نا میلیو۔ ⁷ اوئاں اُوئے نی ہیک خط میلیو جکے میں ایئاں لِکھیوڑو ہَتو۔ دارا بادشاہ ری سلامتی ہووے۔ ⁸ بادشاہ نا ٹھاہ ہووے کہ مھاں یہوداہ رے صوبے میں پرمیشور رے گھر نی گیا۔ او موٹے موٹے پتھراں خاں بݨئی وو اَن بھینتاں ماتھے کڑے راکھئی وا اَن کام وݙی کوشش خاں ہووئی وو اَن اُوئاں رے ہاتھاں خاں کام بھلو ہووی وو۔ ⁹ پچھے مھاں اُوئاں رے بوڈھیا خاں پوچھیو اَن اُوئاں نا ایئاں کہیو تھاں کے رے حکم خاں گھر بݨاوی وا۔ اَن ایئے بھینت نا پوری کرئی وا۔ ¹⁰ اَن مھاں اُوئاں را ناں وی پوچھیا ایئے رے کرے کہ مھاں اُوئاں را ناں لِکھ تے بادشاہ نا خبر ݙاں کہ اُوئاں را سردار کُݨ ہے۔ ¹¹ اَن اُوئاں مھاناں ایئاں بݪتی ݙنی کہ مھاں دھرتی اَن آسمان رے ایشور را منکھ ہا اَن اُو جی ایہ گھر بݨاوی وو جکے نا بݨے کھاخا برخ تھیا را اَن جکے نا اسرائیل رے ہیک موٹے بادشاہ بݨا اَن تیار کیو ہَتو۔ ¹² پݨ جݙے مھارے ٻاپ ݙاݙے آسمان رے ایشور نا ریئخ ݙیوائی تو اُوئے اُوئاں نا شاہِ بابل بنوکدنضر کسدی رے ہاتھاں میں ݙے ݙنا جکے ایئے گھر نا اُجاڑ ݙنو اَن منکھاں نا بابل نی لے گیو۔ ¹³ پݨ شاہِ بابل خورس رے پہلکے سال خورس بادشاہ حکم ݙنو کہ ایشور رو ایہ گھر بݨایو جاوے۔ ¹⁴ اَن ایشور رے گھر رے خونے چاندی رے ٹھیکراں نا وی جکاں نا نبوکدنضر یروشلیم رے بھگتی گھر خاں کاڈھ اَن بابل رے مندر میں لے گیو ہَتو اُوئاں نا خورس بادشاہ بابل رے مندر خاں کاڈھ اَن شیسبضر ناں رے ہیکے منکھ نا ݙنو جکے نا اُوئے حاکم بݨایو ہَتو۔ ¹⁵ اَن اُوئے نا کہیو کہ ائیاں ٹھیکراں نا لے جا اَن یروشلیم میں بھگتی گھر میں راکھ اَن ایشور رے گھر نا آپری جگہ بݨایو جاوے۔ ¹⁶ پچھے اُوئے شیسبضر آ تے ایشور رے گھر ری جکو یروشلیم میں ہے بنیاد گھاتی اَن اُوئے ݙن خاں ہݨے تک ایہ بݨیو رہیو پݨ ہالی تک ایہ پورو کونی ہویو۔ ¹⁷ تو ہمے بادشاہ بھلو خمجھے تو بادشاہ رے خزانے میں جکو بابل میں چھاݨ پُݨ کر تے خورس بادشاہ رے ایشور رے ایئے گھر نا یروشلیم میں بݨاووݨ رو حکم ݙنو ہَتو جاں کونی ایہ بات رے خارو بادشاہ آپری مرضی مھاں نا خُݨاوے۔