¹ جݙے یہوداہ اَن بنیمین رے دشمن خُݨیو کہ او جکو غلام ہَتا پرمیشور اسرائیل رے ایشور رے خارو بھگتی گھر بݨائی وا۔ ² تو او زرُبابُل اَن آبائی خانداناں رے سرداراں رے کڈھے آ تے اُوئاں نا کہݨ لگا کہ مھاناں نا آپ بھیݪا بݨاوݨ ݙو۔کیانکے مھاں وی تھارے ایشور نا منئی۔ جاں تھاں ہو اَن مھاں شاہِ اسُور اسرحدون رے ݙناں خاں جکو مھاناں ایتھ لے آیو اُوئے رے خارو بلیدان چڑھاوتا رئی۔ ³ پݨ زرُبابُل اَن یشُوع اَن اسرائیل رے بوڈھیا بݙیراں رے باقی سرداراں اُوئاں نا کہیو کہ تھارو کام کونی کہ تھاں مھاں بھیݪا مھارے ایشور رے خارو گھر بݨاؤ بلکہ مھاں آپ جی بچڑ تے پرمیشور اسرائیل رے ایشور رے خارو بݨاواں جاں شاہِ فارِس خورس مھاناں حکم ݙنو ہے۔ ⁴ پچھے ملکھ را منکھ یہوداہ رے منکھاں ری مخالفت کرݨ لاگا اَن اُوئاں رے کام میں مشکلاتاں ݙیوݨ لاگا۔ ⁵ اَن شاہِ فارِس خورس رے جیتے جی بلکہ شاہِ فارِس دارا ری بادشاہی تک اُوئاں رے کام نا کھوٹو راکھݨ کرݨ رے خارو اُوئاں رے خلاف مُشیراں نا تنخواہ ݙیتا رہیا۔ ⁶ اَن اخسویرس ری بادشاہی یعنی اُوئے ری بادشاہی رے شروع میں اُوئاں یہوداہ اَن یروشلیم رے منکھاں ری شکایت لِکھ میلی۔ ⁷ پچھے ارتخششتا رے ݙناں میں بشلام اَن متردات اَن طابئیل اَن اُوئے رے باقی خنگتیاں شاہِ فارِس ارتخششتا نا لکھیو۔ اُوئاں ری چٹھی ارامی آکھراں اَن ارامی ٻوݪی میں لِکھیوڑو ہَتو۔ ⁸ رحوم دیوان اَن شمسی منُشی ارتخششتا بادشاہ نا یروشلیم رے خلاف ایئاں چٹھی لِکھی۔ ⁹ تو رحوم دیوان اَن شمسی منُشی اَن اُوئاں را باقی خنگتی جکو دِینہ اَن افارستکہ اَن طرفیِلہ اَن فارس اَن ارک اَن بابل اَن سوسن اَن دِہ اَن عیلام را ہَتا۔ ¹⁰ اَن باقی اُوئاں قوماں نا جکے نا اُوئے بوڈھیے اَن شریف اسنفر پار لے آ تے شہر سامریہ اَن دریا رے ایئے پار رے باقی علاقے میں بخایا ہَتا جاں لِکھیوڑو ہَتو اِیئے نا لِکھیو۔ ¹¹ اِیئے خط ری نقل جکو اُوئاں ارتخششتا بادشاہ نی میلی ایہ ہے۔ تھارا ٻانھا جکو دریا رے پار رہے وا۔ جاں لِکھیوڑو ہَتو۔ ¹² بادشاہ نا ٹھا لاگی کہ یہودی منکھ جکو اُوئے کڈھے خاں مھاں کڈھے یروشلیم میں آیا ہے وہ اُوئے باغی اَن فسادی شہر نا بݨائی وا او بھینتاں نا مُکا اَن بنیاداں نا بݨا گیا را۔ ¹³ تو بادشاہ نے ایہ ٹھاہ لاگ جاوے کہ جے ایہ شہر بݨ گیو روتو او چُنگی جاں ٹیکس کونی ݙیوے۔ اَن اِیئاں بادشاہواں رو نقصان تھی جاخے رو۔ ¹⁴ تو کیانکے مھاں بادشاہ ری راجائی میں کھاوئی اَن ایہ بھلو کونی کہ مھارے خامھݨے بادشاہ ری گلیا ہووے ایئے رے خارو مھاں لِکھ اَن بادشاہ نا ایہ کہیو ہاں۔ ¹⁵ ایئے رے خارو کہ بادشاہ رے ٻاپ ݙاݙے رے دفتر میں کتاب خاں جویو جاوے تو اُوئے کتاب خاں بادشاہ نا ٹھاہ لگے کہ ایہ شہر جھگڑا کرݨ آݪو شہر ہے جکو بادشاہواں اَن صُوباں نا نقصان ݙیوتا رہیا ہے۔ اَن کئی برخاں خاں ایئے میں پھݙا پھخاد کرتا رہیا ہے۔ ایئے رے کرے جی ایہ شہر اجاڑ ݙنو گیو ہے۔ ¹⁶ اَن مھاں بادشاہ نا چیتاوئی وا کہ جے کݙے ایہ شہر بݨ گیو تو ایئے میں بادشاہ رو حصو دریا پار کئی کونی رہے۔ ¹⁷ پچھے بادشاہ رحُوم دیوان اَن شمسی منُشی اَن اُوئاں رے باقی خنگتیاں نا جکو سامریہ اَن دریا پار رے باقی مُلک میں رہئی ایہ بݪتی ݙنی کہ سلام۔ جاں لِکھیوڑو ہَتو۔ ¹⁸ جکو خط تھاں مھاں نی میلیو او مھاں صاف صاف پڑھیو ہاں۔ ¹⁹ اَن میں حکم ݙنو ہاں، اَن چھاݨ بین کی اَن ٹھاہ لاگی کہ ائیے شہر رے منکھاں شروع خاں جی بادشاہواں ری کونی منئی۔ پھݙا پھخاد کرتا رہیا ہے۔ ²⁰ اَن یروشلیم میں دھڑلے را بادشاہ وی ہَتا جکاں دریا پار رے علاقاں میں راجائی کی اَن اُوئاں خاں چُنگی جاں ٹیکس وی لیوتو رہیا۔ ²¹ تو ایئے رے خارو حکم ݙیوو کہ ایہ منکھ کام بند کرے۔ اَن ایہ شہر نی بݨے جتری تک کہ مھاری طرف خاں فرمان نی ݙنو جاوے۔ ²² ہوشیاری کریا ایئے میں ڈھیلا نی تھیا بادشاہواں رے کام میں نقصان جاں کھراٻی نی ہو وے۔ ²³ تو جݙے ارتخششتا بادشاہ رے خط ری نقل رحُوم اَن شمسی منُشی اَن اُوئاں رے خنگتیاں رے خامھݨے پڑھی گی تو او بیگا یہودیاں نی گیا اَن زوری زور اُوئاں نا روک ݙنا۔ ²⁴ پچھے ایشور رے گھر رو جکو یروشلیم میں ہے کام بند ہویو۔ اَن شاہِ فارِس دارا ری راجائی میں ٻیجے برخ تک بند رہیو۔