¹ جݙے خاتوں مہیݨو آیو اَن بنی اسرائیل آپرے آپرے شہر میں جا بخیا تو منکھ ہیک من ہو رو یروشلیم میں بھیݪاہوا۔ ² اُوئے گھڑی یشوع بِن یوصدق اَن اُوئے را بھائی جکو ایشور را پوجاری ہَتا اَن زرُبابُل بِن سِالتی ایل اَن اُوئے را بھائی اُٹھی اٻھیجا اَن اُوئاں اسرائیل رے ایشور رے خارو بلیدان ری جگہ بݨائی۔ تاکہ اُوئے تے ٻاݪݨ آݪا بلیدان چڑھاوے۔ جاں کہ ایشور رے منکھ موسیٰ رے شاستر میں لکھیوڑو ہے۔ ³ اَن اُوئاں بلیدان آݪی جگہ نا آپرے جگہ تے راکھیو۔ کیانکے آخے پاخے رے قوماں اُوئے خاں ٻہیتے اَن اُو اُوئے ماتھے پرمیشور رے خارو ٻاݪݨ آݪو بلیدان آتھ خاکݪو، ٻاݪݨ آݪو بلیدان چڑھاوݨ لاگا۔ ⁴ اَن اُوئاں لکھیوڑے رے مطابق خیماں ری عید منائی اَن روز ری ٻاݪݨ آݪے بلیدان نا گِݨ گِݨ تے جاں جکے ݙن رو کہیوڑو ہَتو دستُور رے مطابق چڑھاوتا۔ ⁵ اَن اُوئے خاں پچھے خدا ٻݪݨ آݪا بلیدان اَن نوئے چاند ری اَن پرمیشور رے اُوئے خارے عیداں تے جکو شٻد میں پویتر منئے جاوتے اَن ہر منکھ ایئاں جی بلیدان ݙیوتا ہَتا جکو مرضی خاں خوشی خاں پرمیشور رے خارو بلیدان ݙیتا ہَتا۔ ⁶ خاتوے مہیݨے ری پہلی تریق خاں پرمیشور رے خارو ٻالݨ آݪو بلیدان چڑھاوݨ لاگا پݨ ہجے تک پرمیشور رے بھگتی گھر ری بنیاد اجݨ کونی رکھیجی ہَتی۔ ⁷ اَن اُوئاں مستریاں اَن درکھاݨاں نا پیخا ݙنا اَن صَیدانیاں اَن صُوریاں نا کھاوݨ پیئݨ اَن تیل ݙنو ایئے رے خارو کہ او دیودار رے لٹھاں لُبناں خاں اَن یافا خاں سمندر رے مارگ خاں لے آوے جاں اُوئاں نا شاہِ فارِس خورس خاں حکم ملیوڑو ہَتو۔ ⁸ پچھے اُوئاں رے ایشور رے گھر میں جکو یروشلیم میں ہے آ پُگݨ خاں پچھے ٻجے برخ رے ٻجے مہیݨے میں زرُبابُل بن سِالتی ایل اَن یشوع بِن یُوصدق اَن اُوئے رے ٻجے بھائیاں ایشور رے پوجاریاں اَن لاویاں اَن خارے جکو غلامی خاں نکݪ تے یروشلیم میں آیا ہَتا کام شروع کریواَن لاویاں نا جکو بیخ برخ را اَن اُوئاں خاں موٹا ہَتا اُوئاں نا چُگیا کہ او پرمیشور رے گھر رے کام ری خنبھاݪ کرے۔ ⁹ پچھے یشوع اَن اُوئے را ݙیکرا اَن بھائی اَن قدمی ایل اَن اُوئے را ڈیکرا جکو یہوداہ ری نسل خاں ہَتا بچڑ اَن اُٹھیا کہ ایشور رے گھر میں کام کرݨ آݪا کاریگراں ری خنبھاݪ کرے۔ اَن بنی حنداد وی اَن اُوئے را ݙیکرا اَن بھائی جکو لاوی ہَتا اُوئے رے بھیݪا ہَتا۔ ¹⁰ تو جݙے مستری پرمیشور رے گھر ری بنیاد راکھتا وا تو اُوئاں ایشور رے پوجاریاں نا آپرے آپرے پویتر لباس میں اَن اُو نرسِنگا لیوڑا اَن آسف ری نسل را لاویاں نا جھانجھ لیوڑا ابھجاݨیا کہ شاہِ اِسرائیل داؤد ری ترتیب آݪی کار پرمیشور ری بݙائی کرے۔ ¹¹ تو او بچڑ اَن باری باری پرمیشور ری بݙائی اَن شُکرگزاری میں گا گا اَن کہݨ لاگا کہ ۔ او بھلو ہے کیانکے اُوئے ری کرپا خدائی اِسرائیل تے ہے۔جݙے اُو پرمیشور ری بݙائی کرتا وا تو خارے منکھاں زور خاں نعرو ماریو ایئے رے خارو کہ پرمیشور رے گھر ری بنیاد رکھیجتی وی۔ ¹² پݨ ایشور رے پوجاریاں اَن لاویاں اَن اُوئے علاقے رے سرداراں میں خاں جکو گھݨا بوڈھیا منکھ اَن اُو جکو بھگتی گھر نا آپرے آنکھیاں خاں ݙیٹھو۔جݙے بھگتی گھر ری بنیاد اُوئے رے آنکھیاں رے خامھݨے پڑتی وی تو موٹے رَڑے کر رووݨ لاگا۔اَن گھݨاں خوشی رے کرے راجی ہو اَن رَڑے کرتا وا۔ ¹³ تو منکھ خوشی رے رَڑیاں اَن رووݨ رے رَڑیاں میں فرق کونی کر خگیا۔ کیانکے منکھ موٹے رَڑے کر اَن نعرا مارتا وا۔ اَن اُوئاں رے رَڑے گھݨآ آݪگے تک خُݨیجتے وے۔