1
۱۔اِیئے خارُو جے تھے مسیح بھیݪا جیوتا ہویا ہو، تو اُوئاں چیزاں نا لابھو جکو اَکاش میں ہے اَن جیتھ مسیح اِیشوَر رے خاجڑی پاخے عزت اَن اختیار خاں ٻیٹھو ہے۔
2
۲۔تھے اِیئاں چیزاں رے بارے میں نی خوچو جکو دھرتی ماتھے ہے پݨ اُوئاں چیزاں رے بارے میں خوچو جکو اَکاش میں ہے۔
3
۳۔کیان٘کے تھان٘ری پُراݨی زندگی ختم ہو گی ری اَن تھان٘ری حقیقی زندگی اِیشوَر میں مسیح رے وسیلے خاں ہے۔
4
۴۔ہمے مسیح تھان٘ری زندگی ہے اِیئے خارُو جَݙے او بھَݪے آخے، تو تھے اُوئے ری شان میں بھیݪا ہوخو۔
5
۵۔اِیئے خارُو تھے آپری پُراݨی فِطرت نا چھوڑ ݙو یعنی زنا کرݨ، بُرو کام کرݨ، عیش کرݨ، بُری مرضی تے بہوݨ اَن لالچ راکھݨ۔ لالچ راکھݨ تو مُورتے پُوجݨ رے برابر ہے۔
6
۶۔ایَہڑا پاپ کرݨ آݪاں تے اِیشوَر رو قہر ہووئی۔
7
۷۔پہل تھاں مئیں وی ایَہڑے باتاں ہَتے اَن تھے وی اِیئاں باتاں رے مطابق زندگی گُزارتا۔
8
۸۔پݨ ہمے تھے ایہ خارے باتاں چھوڑ ݙو یعنی رِیخ کرݨ، قہر کرݨ، دُشمنی راکھݨ، گِلیا کرݨ اَن گاݪھے کاڈھݨ۔
9
۹۔ہیکے ٻِجے خاں کُوڑ نی ٻولو کیان٘کے تھاں آپری پُراݨی اِنسانی فِطرت نا اُوئے رے کاماں خُدھی پُراݨے گابھاں آݪِیکار اُتار ݙِنی ری۔
10
۱۰۔ہمے آپاں نَویں اِنسانی فِطرت لے لِنی ری اَن ایہ فِطرت اَپݨے پیدا کرݨ آݪے اِیشوَر رے گُݨاں رے مطابق نَویں ہووتی جاوئی کہ آپاں اِیشوَر ری اوݪکھاݨ میں بَدھتا جاواں۔
11
۱۱۔اِیئے نَویں زندگی میں اِیئے بات خاں کوئی فرق کونی پڑتو کہ کوئی یہُودی ہووے جاں غیر قوم، ختنو کرایوڑو ہووے جاں بِنا ختنے آݪو، جن٘گلی ہووے جاں ظُلمی، غُلام ہووے جاں اَزاد۔ چھَڑو مسیح جِی خارو کُجھ اَن خاراں مئیں ہے۔
12
۱۲۔اِیشوَر تھاں خاں پریم راکھئی اَن اُوئے تھاں نا آپرا نیک مِنکھ ہووݨ رے خارُو چُگ لِنا را اِیئے خارُو ہمے تھے دَیا، مہربانی، نِوڑت اَن صبر خاں زندگی گُزارو۔
13
۱۳۔تھے ہیکے ٻِجے ری برداشت کرو اَن جے کَئی خاں شکایت ہووے، تو اُوئے نا معاف کرو کیان٘کے پربھُو وی تھان٘را پاپ معاف کریا ہے۔
14
۱۴۔خاراں خاں بَدھیک ایہ کرو کہ آپت میں پریم راکھو کیان٘کے اِیئاں کرݨ خاں خارا ٻَدھی میں رہئی۔
15
۱۵۔مسیح ری خُلح تھان٘رے مَن ماتھے راج کرے کیان٘کے اِیشوَر تھاں نا آپت میں خُلح خاں رہوݨ رے خارُو ہیلو کریو ہے اَن تھے ہمیشہ اِیشوَر رو شُکر کرتا رہو۔
16
۱۶۔مسیح رے باتاں پُورے طریقے خاں تھان٘رے مَن میں رہ۔ اِیشوَر ری ݙِنوڑی خَمجھ خاں ہیکے ٻِجے نا خِکھاوتا اَن خَمجھاوتا رہو اَن آپت میں بھَجن، گیت اَن آتما آݪا بھَجن گا را مَن خاں اِیشوَر رو شُکر کرتا رہو۔
17
۱۷۔تھے جکو کُجھ وی کَہو جاں کرو، او خارو کُجھ پربھُو یسوع رے ناں خاں کرو اَن اُوئے رے وسیلے اِیشوَر ٻاپ رو شُکر کرتا رہو۔
18
۱۸۔تھاں مئیں جکو پرݨایوڑے لُگائے ہے، جاں او پربھُو رو کَہیو منئی اِیئان٘ج آپرے آپرے دھݨی رے کَہیے میں رہے۔
19
۱۹۔اَن جکو دھݨی ہے، او آپری آپری لُگائی خاں پریم راکھے اَن اُوئے تے رِیخ نی کرے۔
20
۲۰۔جکو ٻاݪ ہے، او ہر بات میں آپرے ماں ٻاپ رو کَہیو منے کیان٘کے اِیئے خاں پرمیشوَر راضی ہووئی۔
21
۲۱۔جکو اُوݪاد آݪا ہے، او آپری اُوݪاد خاں ایَہڑو سلُوک نی کرے کہ اُوئاں نا رِیخ آ جاوے اَن او بے دل ہو جاوے۔
22
۲۲۔جکو غُلام ہے، او ہر بات میں آپرے دُنیا رے مالکاں رو حُکم منے۔ تھے مِنکھاں نا راضی کرݨ آݪاں آݪِیکار بتاوݨ رے خارُو نی پݨ پُورے مَن اَن اِیشوَر رے ٻِیہی خاں شیوا کرو۔
23
۲۳۔جکو وی کام کرو مَن خاں کرو اَن ایہ خوچ کرو کہ پربھُو رے خارُو کرئیں وا نی کہ مِنکھاں رے خارُو۔
24
۲۴۔تھاں نا ٹھاء ہے کہ پرمیشوَر تھاں نا اِیئے شیوا رے بدلے میں میراث ݙیخے۔ تھے جکے مالک ری شیوا کرئی وا، او مسیح ہے۔
25
۲۵۔پݨ جے کوئی قصُور کرخے، تو اُوئے نا اِیئے رے بدلے میں سزا لابھخے کیان٘کے اِیشوَر کَئی رے پاخے کونی ہووتو۔