1
۱۔ہُوں تھاں نا ایہ وی کَہوݨ چاہوئیں کہ ہُوں تھان٘رے خارُو، لَودِیکیہ شہر ری وشواسی منݙݪی اَن اُوئاں خارے وشواسیاں رے خارُو جکاں مھناں ݙِٹھو وی کونی، تمام گھݨی محنت کرئیں وو۔
2
۲۔ہُوں چاہوئیں کہ اُوئاں ری ہمت بَدھے اَن او پریم خاں آپت میں ٻَدھی خاں رہ۔ اُوئاں نا پُوری خَمجھ خاں پَکو یقین ہووے اَن او اِیشوَر رے بھید یعنی مسیح نا اوݪکھے۔
3
۳۔ جکے میں خَمجھ اَن گیان را خارا خزانا لُکیوڑا ہے۔
4
۴۔ہُوں ایہ اِیئے خارُو کَہیں وو کہ کوئی وی تھاں نا کُوڑے باتاں خُݨا رے خَچے مارگ خاں بھَٹکا نی ݙے۔
5
۵۔بھَلائیں ہُوں آپ اوتھ کونی پݨ مھاری مرضی تھاں بھیݪی ہے۔ ہُوں راضی ہاں کیان٘کے مھناں ٹھاء ہے کہ تھے اِیشوَر ری مرضی رے مطابق زندگی گُزارئی وا اَن مسیح تے پَکو وشواس راکھئی۔
6
۶۔ہمے جاں تھاں مسیح یسوع نا آپرو پربھُو مَن لِنو رو، اِیئان٘ج اُوئے میں زندگی گُزارتا رہو۔
7
۷۔تھان٘رے جَڑاں اُوئے میں پَکے ہووتے جاوے اَن تھان٘رے زندگے اُوئے ماتھے گھر آݪِیکار بݨتے جاوے۔ تھے اُوئے وشواس تے پَکا رہو جکے رے بارے میں تھاں نا خِکھایو گیو ہے اَن ہر ٹائیم اِیشوَر رو شُکر کرتا رہو۔
8
۸۔خبردار، کیتھ اِیئاں نی ہووے کہ کوئی تھاں نا فضول اَن کُوڑے باتاں خُݨا رے آپرے جاݪ میں پھَخا ݙے۔ ایَہڑے باتاں مسیح ری طرف خاں کونی پݨ ٻاپ ݙاݙے رے رِیتاں اَن دُنیا رے شرُوعات رے باتاں رے بارے میں ہے۔
9
۹۔مسیح رے اِنسانی رُوپ میں اِیشوَر را خارا گُݨ ہے۔
10
۱۰۔اَن تھاں نا وی پربھُو یسوع میں او خارا گُݨ لابھا ہے کیان٘کے اُوئے نا ہر حاکم اَن اختیار آݪے ماتھے اختیار ہے۔
11
۱۱۔ مسیح میں تھان٘رو ایَہڑو ختنو ہویو ہے جکو ݙِیل رو کونی پݨ مسیح رے وسیلے ہویو یعنی اُوئے تھاں مئیں خاں پاپی فِطرت نا ختم کر ݙِنو رو۔
12
۱۲۔ جَݙے تھاں پویتر شِنان لِنو، تو تھے مسیح بھیݪا ٻُوریجا کیان٘کے تھے اِیشوَر ری قُدرت تے وشواس لے آیا جکے اُوئے نا مَریوڑاں مئیں خاں جیوتو کریو اَن تھاں نا وی اُوئے رے بھیݪی نَویں زندگی لابھی۔
13
۱۳۔پہل تھے آپرے پاپاں اَن اِنسانی فِطرت ری وجہ خاں مَریوڑا یعنی اِیشوَر خاں اݪگا ہَتا پݨ ہمے اِیشوَر تھاں نا نَویں زندگی ݙے ری مسیح بھیݪا جیوتا کریا ہے اَن اَپݨا خارا پاپ معاف کر ݙِنا را۔
14
۱۴۔اُوئے اَپݨے قصُوراں نا مِٹا ݙِنا اَن اُوئاں ری سزا نا خُوݪی تے کوکا کھو را اَپݨے آگے خاں اݪگا کر ݙِنا را۔
15
۱۵۔اِیئاں اُوئے حاکماں اَن اختیار آݪاں نا ہَرا ݙِنو اَن خُوݪی تے آپری جِت رے وسیلے خاں اِیئاں نا مِنکھاں رے آگے کھیچرا کر ݙِنا۔
16
۱۶۔اِیئے خارُو کوئی وی تھاں تے کھاوݨ پِیئݨ، عیداں مناوݨ جاں نَویں چان٘د اَن پویتر ݙن رے رِیتاں ری وجہ خاں اِلزام نی لگاوے۔
17
۱۷۔جاں کَئی چیز ری چھاں اصل میں او چیز کونی، اِیئان٘ج ایہ رِیتاں وی اصل میں مُگتی رو مارگ کونی۔ پہلکے زمانے میں ایہ رِیتاں اِیئے بات رے خارُو نِشان ہَتے کہ اصل میں مسیح مُگتی رو مارگ ہے۔
18
۱۸۔کوئی مِنکھ نِوڑت بتا را جاں فرشتاں ری پُوجا کر ری تھاں نا بھَٹکا نی ݙے کیان٘کے ایَہڑا مِنکھ خِپناں رے باتاں بَدھا رے خُݨاوئی اَن آپری اِنسانی خوچ ری وجہ خاں ماݨ کرئی۔
19
۱۹۔ایَہڑے مِنکھاں رو واسطو ماتھے یعنی مسیح خاں کونی رہتو جکے نا ݙِیل یعنی وشواسی منݙݪی ماتھے اختیار ہے اَن جکو ݙِیل رے عُضباں نا جوڑے راکھئی اَن پَچھے پُورو ݙِیل اِیشوَر ری مدد خاں بَدھئی۔
20
۲۰۔جَݙے تھے دُنیا رے شرُوعات رے باتاں رے لِحاظ خاں مسیح بھیݪا مَر گیا را، تو اُوئاں اصُولاں اَن خِکھایوڑے باتاں رے مطابق زندگی کِیاں گُزارئی جکاں رو واسطو دُنیا خاں ہے۔
21
۲۱۔جاں ایہ نی لو، اِیئے نا نی چاکھو، اِیئے نا ہاتھ وی نی لگاؤ۔
22
۲۲۔ایہ اصُول اَن خِکھایوڑے باتاں ختم ہو جاوݨ آݪے چیزاں ہے کیان٘کے ایہ خارا اِنسان را بݨایوڑا اصُول ہے۔
23
۲۳۔ایہ اصُول ٹھیک تو لاگئی کیان٘کے ایہ آپری مرضی ری بھَگتی کرݨ، آپرے ضرُورتاں نا چھوڑݨ اَن ݙِیل نا قاٻُو میں راکھݨ رو کَہی پݨ ݙِیل ری مرضی نا روکݨ رے خارُو اِیئاں اصُولاں رو کوئی فائدو کونی۔