1
١۔جکو مالک ہے، او آپرے غُلاماں خاں بھَلو اَن نیک سلُوک کرے کیان٘کے تھاں نا ٹھاء ہے کہ تھان٘رو وی ہیک مالک ہے جکو اَکاش تے ہے۔
2
۲۔ہر وقت پراتھنا کرتا رہو اَن جَݙے پراتھنا کرو تو خُجاگ رہو اَن اِیشوَر رو شُکر کرتا رہو۔
3
۳۔مھان٘رے خارُو وی پراتھنا کرتا رہو کہ اِیشوَر مھان٘رے خارُو خَنݙیخو خُݨاوݨ رو دروازو کھولے اَن مھے مسیح رے اُوئے بھید نا خُݨا خَگاں جکے نا خُݨاوݨ ری وجہ خاں ہُوں ڈھَکیجوڑو ہاں۔
4
۴۔پراتھنا کرو کہ ہُوں اِیئے خَنݙیخے رو پرچار ایَہڑے طریقے خاں کر خَگاں جکو مِنکھاں ری خَمجھ میں آوے۔
5
۵۔جکو وشواسی کونی، اُوئاں بھیݪا خَمجھ خاں رہو اَن پرچار کرݨ رے ہر موقعے خاں فائدو اُکھݨو۔
6
۶۔تھے اُوئاں خاں ہر گھڑی بھَلے اَن فائدے آݪے باتاں کرو کہ جَݙے کوئی تھاں خاں مسیح رے بارے میں کئیں پُوچھے، تو اُوئے نا بھَلی بَݪتی ݙے خَگو۔
7
۷۔اَپݨو پریمی بھائی تُخِکُس جکو مھیں بھیݪو پربھُو ری شیوا رو کام وفاداری خاں کرئی، او مھارو خارو حال تھاں نا خُݨا ݙیخے۔
8
۸۔ہُوں اُوئے نا تھاں کَڈھے اِیئے خارُو میلئیں وو کہ تھاں نا مھان٘رے حال ری ٹھاء لاگ جاوے اَن تھان٘رے مَن نا تسلی لابھے۔
9
۹۔ہُوں اُوئے بھیݪو پریمی بھائی اُنِیسمُس نا وی میلئیں وو جکو تھان٘ری وشواسی منݙݪی مئیں خاں ہے اَن وفاداری خاں شیوا رو کام کرئی وو۔ ایہ ٻِنہے ایتھ رو خارو حال تھاں نا خُݨا ݙیخے۔
10
۱۰۔ارِسترخُس جکو مھیں بھیݪو ڈھَکیجوڑو ہے، تھاں نا سلام کَہی۔ مرقس وی تھاں نا سلام کَہی جکو برنباس رو رشتے دار ہے۔ [مرقس رے بارے میں تھاں نا خُݨایو ہَتو کہ جے او تھاں کَڈھے آوے، تو اُوئے نا جِی آیو کریا۔]
11
۱۱۔یسوع جکے نا یُوستُس وی کَہی، او وی تھاں نا سلام کَہی۔ مسیح تے وشواس لے آوݨ آݪے یہُودیاں مئیں خاں چھَڑا ایہ تِین جِݨا ہے جکو مھیں بھیݪا بِچڑ را اِیشوَر ری بادشاہی رے خارُو شیوا رو کام کرئی وا اَن مھناں گھݨی تسلی ݙئی وا۔
12
۱۲۔اِپَفراس جکو تھان٘ری وشواسی منݙݪی خاں ہے اَن مسیح یسوع رو ٻانھو ہے، او تھاں نا سلام کَہی۔ او تھان٘رے خارُو ہمیشہ پراتھنا کرتو رہئی کہ تھے وشواس میں پَکا ہووتا جاؤ اَن ہر بات میں اِیشوَر ری مرضی رے مطابق زندگی گُزارو۔
13
۱۳۔ہُوں اِیئے بات رو گواہ ہاں کہ او تھان٘رے خارُو، لَودِیکیہ اَن ہِیراپُلس شہر رے وشواسیاں رے خارُو پراتھنا کرتو رہئی۔
14
۱۴۔ پریمی حکیم لُوقا اَن دیماس تھاں نا سلام کَہی۔
15
۱۵۔لَودِیکیہ شہر ری وشواسی منݙݪی نا اَن اُوئے وشواسی منݙݪی نا جکو نُمفاس رے گھر میں بھیݪی ہووئی، مھارو سلام کَہیا۔
16
۱۶۔جَݙے ایہ خَط تھے آپری وشواسی منݙݪی میں پڑھ لو، تو اِیئے نا لَودِیکیہ شہر ری وشواسی منݙݪی میں پڑھیا۔ اِیئان٘ج لَودِیکیہ شہر ری وشواسی منݙݪی نا لِکھیوڑو خَط وی تھان٘ری وشواسی منݙݪی میں پڑھیا۔
17
۱۷۔اَرخِپُس نا کَہیا کہ اِیئے نا شیوا رو جکو کام پربھُو ݙِنو ہے، اُوئے نا پُورو کرے۔
18
١٨۔ ہُوں پولُس آپرے ہاتھ خاں سلام لِکھئیں وو۔ یاد راکھو کہ ہُوں مسیح رو پرچار کرݨ ری وجہ خاں ڈھَکیجوڑو ہاں۔اِیشوَر ری کِرپا تھاں تے ہووتی رہ۔