1 Khabardar tan ujak krom mocan pashaikas bati mo kara. Ne pe o mimi dada kura ki D`i una au tasa som mimi hatya dikas bati kia ne shian. 2 Abi pe kas kia pral`i po to tan ruaw kia ishpoi mo banjawa khe~n ki pashawaw moc khodayas dura zhe dur durai Karin dai ki moc tasi hatya prust gho~i man. A mimi kai sahi mam dai ki te tan prusti agrian. 3 Kai pe tu kia kas pra po to shehen` kai de ki tai dracui baza kia kariu dai to tai khawi baza mo joniw aria. 4 Ki tai deta ishnayari lawan pariw aria. To tai dada kura ki lui jagel dai tai tasa badila del. 5 Abi sual pe arili koki te khodayas dura zhe bazarai cisti suaal karik khoshan dai ki moc te pashin aria. A mimi kai sahi mam dai ki te tan to badila agrian. 6 Tu pe suaal (dua) kariman ai po tan kamras udreman pari zhe darwaza band kayo tan dada ruaw suaal kara. To phato dada kura ki lui jagel dai mimi badila del. 7 Zhe sual kariwew warek mocan raw tol` awazuna mo kara koki te citin dai ki homa bo mondr dikas thara homa mondr ko~ Karin. 8 Phato tasi raw mo hal`I koki mimi dada mimi gatikas pi sumber joniw dai ki mimi kia kia ishnayari ajat. 9 Abi shehen` kai sual kara ki Ay homa dada kia ki tu D`i una as Tai nom pak kai grin aria 10 Tai badshahi hiw aria Khe~n ki tai marzi D`i una pura hiw dai Com una asta hiw aria 11 Homa har aduaw au onja homa de 12 Zhe khen~ ki abi tan dec griau muaf karik dai Tu asta homa te dec muah kari 13 Zhe homa azmaish una mo histi. Har shumian pe desha kari (Koki badshahi qudrat hamesha tai mi hiw aria. Ameen). 14 Abi pe mocan te shumi muaf pe aril`i po to homa dada kura ki D`i una aw mimi muah kariw. 15 Abi pe mocan te krom muah ne arili pe haw to dada asta mimi muah ne kariw. 16 Zhe abi pe roci athali pe haw to pashawawan raw tan ru mo lapa koki te shehen` gho~i Karin dai ki moc jonin aria ki te roci thai an. A mimi kai sahi mam dai ki te tan to badila agrian. 17 Tu pe roci athai po tan sis una tew khasi zhe tan ru negi. 18 Ki moc ne mimi dada kura ki lui jegel dai se pashiw aria. To mimi dada kura ki lui jage dai mimi badila del. 19 Tan bati com una mal jama mo kara kawa ki goik phawatik zhe zang to kharb kriu zhe kawa ki lawalali asta to lawen. 20 Shehen`as bati o D`i una maal jama kara kawa ki ne ta kia goik phawatik kharab kariw ne o zang ne tara kura lawlali to l`awen. 21 Koki kawa mimi mal hiw tara mimi hardi asta satiw. 22 Jisam as phreylik ec`. Mimi ec pe sahi ashes po to saw jisam sai krom kariw. 23 Zha mimi ec` pe kharab ashes po to saw jisam tramasung hiw. Phato shase phreylik kia ki mimi som shiau tramasung pe hawaw pe haw se tramasung kimon ghona hiw! 24 Kura moc du malik an som krom karik ne bhaw koki se ya ta egis som shum hiw egis som o muhabat kariw. Yao egis som hiu to eg o kia ne josiw. Abi khodayas zhe Dawlat auduin khidmat ne karik bha. 25 To a mimi kai mam dai ki tan zhanas phikar mo kara ki abi kia zhuk yao kia pik ? zhe ne o tan jisamas ki kia sambik? Kia zhan zubaruman pe zhe jisam o piranan pe bo ne e? 26 Upul`iau pac`iak jaga ne ta kia ben dai neo kia cinin dai. Neo durai jama Karin dai wadi asta mimi dada kura ki D`i una au te zuel` dai. 27 Mimi mocaw kura she`he`n au ki phikar kai tam umbaras mocaw ek ganta asta ziad karik bhaw? 28 Zhe piranan bati ko phikar kara dai? Jangalau mut jaga ki te khen~ thi badan dai. Te ne ta mehnat Karin dai neo cinin dai. 29 To asta amimi kai mam dai ki Sulaiman e shohon kia bo hikas som kia ne asheni. 30 Khoday com aini khas kia ki onja shiau zhe copo to thandur ai dai jhunkiu shehen` peran sambiel to Ay nejonawan mimi ko ne sambiel. 31 Shatalako fikar kai she`he`n mo ma ki abi kia zhuk yao kia pik yao kia sambik? 32 Koki shemi saw ishnayari warek mulkaw moc khojin zha mimi dadaw o joniu dai ki mimi emi saw ishnayari ajat. 33 Abi sumber tasa badshahi zhe tasa ujak phond khoja to shemi saw ishnayari mimi milaw hin. 34 Bas c`opas hatya phikar mo kara koki c`opaw adua tan bati tan fikar kariw onjas bati onjaw mi bo gham.