1 Yasu shemi mondr khulaw e to shehen` hawaw ki Galil aini pai Yardanas alelaw Yahudas jaiga una aw. 2 Tara bo mocbi tasa pistaw on zha se te tara prust araw. 3 Phato Pharisi to jeahika tasa tada on zha maikas pron ki kia har ek ishnayarias wajen dai tan ja histik prust e? 4 Se jawab una amaaw ki kia tu ne mai as e kura ki te sawzai aw se te shuruk aini s`ati moc zhe istrizha sawzayo amaw ki. 5 Shehen` as wajen dai moc dadas zhe ayas pi desha thi tan jas som apaw del` zhe te awdu ek hin. 6 Phato te du ne ek jisam hin. Shehen`as bati kas ki khoday ek kai au te moc desha mo Karin aria. 7 Te tasa kai aman dho~yo Musa ko hokum dai aw ki thalak dai histik bha? 8 Se tasi kai amaaw ki Musaa mimi dang hardias wajen dai mimi tan ja histikas ijazat praw magam shurug aini sati o shehen` ne ashes. 9 A mimi kai sahi mam dai ki kura pe tan ja shum kormas sar gairo warek kia wajen dai histi o warek ja aran pe haw se shumi kariw dai zha kura pe ek histila istrizha ja araw po se asta shumi kariw. 10 Shagetan tasa kai aman ki moc istrizhas som shehen` mi pe araw pe haw to ja me karik prust ne. 11 Se tasi kai amaaw ki saw shama mondr ne manin magam khali shatemi kas ki shehen` qudrat dai shiaw se me karik bhaw. 12 Koki ade shehen` moc an kura ki ayasi kuc`aw mi shehen` thi ubuji an zha ade o shehen` an kura ki D`ias bac`aias wajwn dai tan shehen` sawzai an. Kura manik pe bha dai o maniaw. 13 Shatara wat una moc sudayak tasa tada alon ki se tasa thara baza thai tasi hatya sual kariw magam shagetan o te atukan. 14 Magam Yasu o amaaw suadayak mai tada lasa zhe te desha mo kara koki D`ias bac`ai shesi mi shiaw. 15 To se tasi thara baza thai talela paraw. 16 Jagaa ek moc tasa tada ita tasa kai amaaw ki Ay bandawaw A kia shehen` prust krom karim ki hameshas umbur zhe majar grim? 17 Se tasa kai amaw tum ai pe prust kormas barauna ko phuchis dai? Prust krom ta ek mi magam tu umbur zhe majar una pe atik khojis dai o to hokuman thara amal kari. 18 Se tasa kai amaaw kurai hokuman thara? Yasu amaw shia ki kas mo nashai, Kia mo lawai, galat guwahi mo de. 19 Tan ayaw zha tan dadaw izat kari zha tan tada apaw diawan mocan som asta muhabat tha. 20 Se juwan tasa kai amaw ki a isi sawin thara amal kai am. Ajo mai som kia mondras kami shiaw. 21 Yasu tasa kai amaw tu pura pe sahi hik khojis dai o tan saw kia berki gariban de. Tai D`iuna Khazana milaw hiw. To ita mai pistaw ie. 22 Magam se juwan te mondr sangaio pareshan thio paraw koki bo maldar ais. 23 Zhe Yasu tan shagetan kai amaw a mimi kai sahi mam dai ki dawlatmandas D`ias bac`ai una atik bo geran. 24 Gheri mimi kai maam dai ki utas suzikas gang una dai nehik shesa pe asan ki dawlatmandas khodayas bac`ai una atik. 25 Shagetan shehen` sangaio bo hairan hawan zha maikas pron ki dhoyo kura nijat grek bhaw. 26 Yasu tasi gehen` jagayo amaw ki se mocan muzar ta ne hiw magam khodayas pe saw kia hiw. 27 Phato Patras jawab una tasa kai amaaw jagai abi ta saw kia histi tai pistaw ita aik. Dhoyo homa kia milaw hiw? 28 Yasu tasi kai amaaw ki a mimi kai sahi mam dai ki Adamas putr pe no~a thi ubujio pe tan takht una nesaw pe haw to abi asta kura ki mai pistaw ita dash zhe dua takht una nesi Israilas dash zhe dua qabilan insaph kara. 29 Zha kura pe duran yao bayasi yao babasi yao dadasi yao ayas yao sudayakan yao chet pe mai nomas thara histi an tasa shoran pe ziad milaw hiw zha hameshas umber zha majar asta tasa hiw. 30 Magam bo ziad awelo hiaw akheri hin zhe akeri o awelo.