1 Shatara wat una shaget Yasu tada ita tasa kai aman D`ias bacai una gada kura? 2 Se ek sudayak tan tada khundiayo tasi mocuna c`istaw. 3 To amaw a mimi kai sahi mam dai ki abi pe thoba ne arili pe haw zha sudayakan raw pe ne hawaili pe haw to D`ias bacai una kai asta ne atik bha. 4 Kura pe tan soro shesa sudayakas raw tan c`utak araw pe haw semi D`ias bacai una gada hiw. 5 Zha kura pe shemi sudayak pe mai nomas thara maniaw pe haw to a qubul karim. 6 Magam kura pe shesi sudayakan mocaw pe mai thara Bhawar oni kas shuruaw pe haw tasa hatya prust hiw ki ghona zhontas bat tasa gahai lapayo to samundar una hista. 7 Shurawawan hatya dunia una bo aphsos koki shuruik ta zaroori magam shatasa mocas thara aphsos kas wajen dai ki shuruik hiw. 8 To mimi baza yao mimi khur pe mimi shuriaw pe haw to c`ini tan pe hista. Khuta thi umbur zhe majar una atik mimi hatya shehen` ghoi~i prust hiu ki du baza yao du khur pe mimi som ashes pe haw to mimi hameshas angaria histin. 9 Zhe mimi ech pe mimi shuruau po to nehai tan pi hista. Se~a thi umbur zhe majar una atik mimi hatya shehen` ghoi~i prust hiw ki du ech mimi som ashes pe haw mimi hameshas angaria histin. 10 Khabardar shesi c`utakan mocaw kas kam mo jos`iaw koki a mimi kai mam dai ki D`iuna tasi pharishta mai D`i aini khodayas ashe har tem jihen dai. 11 Koki Adamas putr dum hul`a khojika zha te gunahas pe pak karika itaw. 12 Abi kia c`ita dai? Kas mocas pe shor pai aini pe haw zha talela mocaw ek pe dum hawaw po to kia se te c`aw beshi zha das` zha noa pai histi zha dhe~nta una pai to dum hula pai ne khojiw e? 13 Shehen` pe hawaw pe haw ki to sapraw pe haw to a mimi kai sahi mam dai ki se tasi caw beshi zha das` zha noa mocaw kurai ki ne abatha thi an te ziad khosel. 14 Shehe` mi mimi D`i aini khoday shehen` ne c`itiw dai ki tasa c`utakan mocaw ek asta kura nashen. 15 Tai bayaw pe tai gunah araw pe haw pari pai prust kai mondr dia to c`ec`ai. Se tai ko~n araw pe haw tu tan to bayaw saprai. 16 Ne pe ko~n araw pe haw to ek du moc tan som nie ki har ek mondr du tre guwahan ashan thara subut hin. 17 Se tasi asta pe ko~n ne araw pe haw khodayas duraw mocan kai mas zha tasi asta pe ne ko~n araw pe haw to khoday ne maniaw mulkani moc zhe paisa greaw mocan barabar joshi. 18 A mimi kai sahi maam dai ki kia ki abi c`om una bona se D`i una asta bonin pariu zhe kia ki abi c`om una khlau kara se D`i una asta kholau hiu. 19 Phato a mimi kai maam dai ki mimi mocaw pe du kura moc c`om una kia mondras thara kia ki c`ita dai itefak pe arili pe haw se mai dada gehenaw dai kura ki D`i una aw tasi hatya se hiw. 20 Koki kawa pe kura du ya tre asta pe mai noams thara ek hawan po a tasi moc`ai him. 21 Shatara wat una Patras tasa tada ita tasa kai amaaw Ay khoday mai baya pe mai gunah araw pe haw to a kimon bar to muah karim? Kia sat tem e? 22 Yasu tasa kai amaaw a mimi kai shehen` ne mam dai ki sat tem sat hazar tem asta. 23 D`ias bacai shatasa s`as raw kura ki tan krom garawan pe hisab akhojaw. 24 Zha hisab karika akhojis e to tasa ruaw ek dec` grila alon kas ki tasa thara dash hazar bojai himan asheni. 25 Magam tasa som dikas bati kia ne asheni to tasa se gaderak hokum praw ki ea zha isa ja zha azheli zha kia ki isa shian saw bre~nki o dec` c`ena. 26 Phato nokar (krom karaw) pali to ishtikhaw zhe amaw ki Ay Khoday mai tem de. A tai saw dec` pura karim. 27 Tasa nokaras gaderak wal` joshi to lasaw zha tasa dec` muah araw. 28 Se nokar bian nihaw e to tasi mocaw ek tasa som milaw hawaw kas ki tasa thara shor paisa asheni. Se to gri tasa g`a pi tasa kai amaw kia ki mai shiaw to mai de. 29 To se moc tasa ruaw pali tasa ishkal`i araw zha amaw ki mai ade wat de. A tai dem. 30 Se ne maniaw to ni jel`ai praw ki kai zha ne des o jel`ai me apaw de. 31 Phato te moc to jagaio bo perishan hawan zha ita tan gaderakas kai saw kia aman 32 Tasa gaderak to tan tada khundiayo tasa kai amaw Ay shaithan nokar! A te saw dec` shehen` gho~i muah aris ki tu m ishkal`i ari. 33 Kia ki a tai som aris tai asta tan mocan som reham Kareli ne ashes e? 34 To tasa malik tasa pe khapha thi to sipahian hawala araw ki kai zhe tu dec` ne des jelai apaw de. 35 Mai D`i aini khodai asta mimi som shehen` mi kariw mimi mocaw ek asta pe tan baya hardias thara pe muah ne araw pe haw.