1 Shatara wat una Pharisi zhe Phiki moc Yaroshelum aini Yasu e tada ito tasa kai amaan ki. 2 Tai shaget akhabiran riwaj ko ne manin dai ki au zuikwew baza ne negin? 3 Se jawab una tasi kai amaaw ki Abi ta ko khodayas hokum ne maniaw dai? 4 Koki Khoday mai au ki tu tan dadaw zha tan ayaw izaat kari zha kura dadas yao ayas kai kia shum pe amaw pe haw se nashiw. 5 Magam tu o mas dai ki kura dadas yao ayas kai amaaw po ki kas ishnayari as pe tai mai pe phaida pe zhaliu se khodayas hiw. 6 To se tan dadas izaat mo kariw aria. Phato abi tan riwajan thara khodayas mondr tan pe desha arili. 7 Ay mocan Yasaya mimi bati kia prust mondr dai ais ki. 8 Shemi moc ashas thara ta mai izaat Karin dai Magam isi hardi o mai pe desha shian. 9 Zhe emi micmi mai hatya sual Karin dai. Koki insanan hokuman sabak den dai. 10 Phato se moc tan tada khundiayo tasi kai amaaw ki ko~n kara zha c`ic`a. 11 Kia ishnayari ashai pariw se moc na pak ne kariw magam kia ki ashaw nehiw shasemi moc napak kariw dai. 12 Shesa thara shagetan tasa tada ita tasa kai amaan tu jonis dai ki Pharisi shemi mondr sangayo shuruini? 13 Se jawab una amaaw kia mut ki mai dada e ne pe s`atai ais po to isnos aini nehen. 14 Emi lasa. Emi s`ea phond pashen zhe s`eas pe s`ea phond pashaw pw haw to awdu shuruan. 15 Patras jawab una tasa kai amaaw shama ac`oik homa c`ec`ai. 16 Se amaaw kia tu asta shonja zha ne jonis dai e? 17 Kia ne jonis dai e ki kia ki ashai pariw se kuc` una pariw zha phato bian nehiw. 18 Magam kia mondr ki ashaw nehin dai te hardi aini nehin dai zhe temi moc napak Karin dai. 19 Koki shum kheyal, Nashek, Shumi kari, Lawek , phan dek, Kas pistaw mondr dek hardi aini nehin dai. 20 Shemi mi shate mondr kia ki moc na pak Karin dai magam baza ne negi au zhuk moc na pak ne kariw. 21 Phato Yasu talela nehi Soor zhe Saida wa~nuna paraw. 22 Zha jaga ek Kinani istrizha abayo diman amaw Ay khodai Dawood e putr mai thara Rehem kari. Ek shum arwaah mai c`u bo shum kariw dai. 23 Magam se tasa jawab ne praw zhe tasa shagetan tasa s`oi ita tasa kai aman ki ama hutik e ea homa pistaw iw dai. 24 Se jawab una amaaw ki a Israil as dum hul`a ame~on sargairo warek kas tada ne hutila am. 25 Magam se o ita tasa ruaw tasa sual araw zha amaw ki Ay khoday mai madad kari. 26 Se jawab una amaw sudon au gri shohon dek prust ne. 27 Se amaaw Aa khoday koki shoa asta talela paluman mocaw zhun dai kurai ki tasa malikas pe palan dai. 28 Yasu jawab una tasa kai amaw Ay istrizha tai Bhawar bo ziad. Kia ki tu c`itis dai tai hatya shehen` mi hiw zha tasa c`ulas tara mi prust hawaw. 29 Phato Yasu talela nehi Galilas uk tada aw zha dhen~ta una usti tara mi nesaw. 30 Zhe bo mocbi khuta, s`heaa Karutu zhe bo lahaz tan som gri tasa tada on se te taza araw. 31 To moc apashan ki te moc mondr dek bhan dai. Lahaz prust hin dai zha khuta kasin dai zhe s`ea pashin dai to Israilas khodayas hatya sual aran. 32 Yasu tan shaget s`oi khundiayo tasi kai amaaw ki mai shemi mocbi pashi wal` del dai koki emi moc tre bas sati mai som an zha isi som zuikas bati kia ne shian a emi anora ne hutik bham. Shehen` mo hiw aria ki phondai agrayo thaw hin. 33 Shagetan tasa kai aman aya beyaban una abi shohon au kawela onik ki emi saw tac`eran? 34 Yasu tasi kai amaaw mimi som kimon au shian? Te aman sat au zha tic`ak c`utak masi. 35 Se mocan kai hokum praw ki c`omuna nesaw. 36 Te sat au zha masi gri shukur araw zha te c`ini shagetan praw shaget o mocan pron. 37 Saw zui tac`erini thaw hula sat sawew upran. 38 Zuaw istrizha zhe sudayak ne kai c`aw hazar moc aini. 39 Phato te mocbi huti o Yasu kishti una nesi Magdan hatya aw.