1 Shatara mi adua Isaa duraw nehi babayuk tada pai nesaw. 2 Tasa tada shohon bo mocbi sarini ki se kishti una ustaw zha saw mocbi o awat una ac`istan. 3 Se tasi kai bo mondr ac`oikan raw kai amaw ki jagaa ek phalik jehaw phalik baika paraw. 4 Bi histikwew ade phalik awatikai apalan zha pac`iak ita te azhuan. 5 Te ade o bat tadai apalan tara o prust phaw ne hikas wajen dai ghas ubujon. 6 Phato suri nehi te aduan zha isnos ne hikas wajen dai as`usan. 7 Ade o c`er mocai atan zhe te o tasi no~ai paron. 8 Zhe ade prust phaw una atan tara o te ubujon zha te ade ta shor ade o tre beshi adeo beshi zhe das ziad thi ubujon. 9 Kas ki ko~n shian te ko~n kara. 10 Shaget s`oi ita tasa kai amaaw tu achuikan raw kai ko mondr des dai? 11 Se jawab una tasa kai amaaw ki shehen` gho`i ki abi D`ias te mondr jhona dai eli o te ne jonin. 12 koki kas som ki hin tasa den zhe tasa som o ade asta ziad hin zhe kas som ki ne hin tasa pi o te asta gheri grin. 13 A tasi som achoik una shehen` gho~i mondr dem dai ki te jagai asta ne jagen dai zhe ko~ kai asta ne ko~n Karin dai. 14 Zha tasi thara Yasaya se mail`a mondr pura hiw ki Abi ko~n as thara sanga magam to ne jhona Zha ecas thara jagaa magam jhona o ne. 15 Koki isi mocan hardi thara m`eh bo thi shiaw Zha te ko~nas thara hosha kai sangan dai Zha te tan ech band kai an Ki shehen mo hiw aria ki ecas thara jonin Zha ko~nas thara sangaan Zha hardias thara jonin Zha mondr joni Zha a te prust karim. 16 Magam Mubarak mimi ec shehen` gho~i ki te pashen dai zha mimi ko~n shehen` gho~i ki te sangan dai. 17 Koki a mimi kai sahi mam dai ki bo paygumber zhe ujak phonduna kasau c`itiman aini ki kia ki tu jages dai te asta jagen magam ne jagan zhe kia mondr ki tu ko~n karis dai ko~n Karin magam ne aran. 18 Phato bahawas ac`oik ko~ kara. 19 Kura pe gaderakias mondr pe ko~n araw zha ajonaw pe haw kia ki tasa hardi una ubujai an to shaithan ita hariw shea shase kurai ki phondas tada histi ashes. 20 Kurai ki bat tadai pali ashes emi shate kura ki khodayas mondr ko~n Karin dai zhe to khoshanias thara manin asta dai. 21 Magam tan udreman tasa isnos ne then dai khal`i ade watas bati shian zhe kia musibat aw pe haw to bo tez shuruaw. 22 Zhe kurai ki c`er mocai ubuji shian emi o shate kura ki khodayas mondr ko~n Karin dai magam dunias phikar zhe dawlatas wajen dai to tan no~ Karin dai zha se o mewa o ne oniw. 23 Kurai ki prust coman una ubujon emi shate kura ki khodayas mondr ko~n Karin dai zhe jonin dai zhe mewa asta onin dai. Kura ta shor mewa kura o tre besi kura o beshi zhe dash. 24 Se ek warek ac`oik tasi kai jaio amaw ki Di`as bacai shatasa mocas raw kura ki tan c`et una prust phal`ik praw. 25 Magam moc adudan e tasa dushman ita tara c`istaka phalik ahistaw. 26 Phato po~ nehon e te c`istaka phal`ik pashun paron. 27 Krom karaw ita duras gaderakas kai amaaw Ay khoday kia tu tan c`etuna prust phal`ik ne histi ai e? tara c`istaka phal`ik kawel`a on? 28 Se tasi kai amaaw ea kas dusmanas krom. Krom karaw tasa kai amaan kia dhoyo abi tara pai te jama karik e? 29 Se amaaw ne te jama karik dai ghoi abi sai asta upac`a. 30 Laikuna zha awdu ek thi badan aria zha laikwew laowan kai mam ki awel c`istaka phalik jama kaio te angar sata phato sahi lai la. 31 Se ek warek ac`oik tasi kai jayo amaaw D`ias bacai shatasa phalikas rau kurai ki ek moc gre tan c`etai abaw. 32 Se saw phalikas pe ta c`utak magam ubujaw po shohon ghona hiw dai ki pac`iak asta ita tara tan mo~ sawzen. 33 Se ek warek ac`oik tasi kai prau ki D`ias bacai shatasa mayakas raw kurai ki ek istrizha adek gre at ai praw zha se o ade ade the sau c`ruka araw. 34 Shemi saw mondr Yasu mocbian kai ac`oik una praw zha ac`oik as sargairo se kia mondr ne diman ais. 35 Kia ki paygumberan gehenaw dai mai ashes se pura hawaw A shate mondr dem kia ki moc ne jonin. 36 Phato se te mocbi histi dura hatya parau zhe tasa shagetan tasa tada ita tasa kai amaan ki cet aini c`istaka phal`ik as ac`oikas matlab homa c`ec`ai. 37 Se jawab una amaaw ki prust phal`ik bau Adamas putr. 38 Zhe c`et o dunia. Zhe prust phal`ik bacaias putr zha c`istaka phal`ik o shaithanas putr hin. 39 Kura dushman ki te abaw se o shaithan zha te lek o dunias akher hia zha lahaw o pharishta hin. 40 Phato khen~ ki te c`istaka phal`ik sarien zha angaria jhai jhunkin shehen` mi dunias akher una hiw. 41 Adamas putr tan pharishta hutiw zhe te saw shuruawaw ishnayari zhe shum moc jama karn. 42 Te phato te angaria jhen tara o troik hiw. 43 Tara wat uno ujak phond una kasaw moc o tan dadas bacai una surias raw upuan. Kas ki ko~n shian te ko~n kara. 44 D`ias bacai c`etaw Khazanas raw kura moc ki saprai o to alaw khoshan the kia ki tasa asheni saw abrekaw zha to c`et o tan hatya agreaw. 45 Phato D`ias bacai shatasa griaw mocas raw kura ki qimati maik khojiman ais. 46 Tasa ek qimati maik milaw hawaw e se tan saw ishnayari to grekas bati abrekau. 47 Phato D`ias bacai shatasa ghona jal as raw kia ki babayuk una ahistan e se har ruyan maci agreaw. 48 Se puri hawaw e to awatika oni o talela mocaw prust prust lai gearumai pron zhe kurai o ki kharab asheni te ahistan. 49 Dunias akher uno shehen` mi hiw. Pharishta nehin zha shaithan moc ujak mocan pi gezi karan phato te o angaria jhen. 50 Te tara o troin. 51 Kia abi shemi saw mondr ajonil`i e? Te tasa kai amaan ki Aan. 52 Se tasi kai amaaw shehen`as bati har Phiki kura ki D`ias bacai as shaget thi aw shatasa duras malikas raw kura ki tan khazanas mocaw no~a zhe paranu ishnayari nehel dai. 53 Yasu shemi ac`oik jhai khulaw e to talela se paraw. 54 Phato tan mulkuna ita tara sual karikainai shehen` sabak dikas praw ki te hairan thi maikas pron ki isa udreman shohon akal zha hairan karikas bas` krom kawel`a on? 55 Kia ea barhaias putr ne e? zha isa ayas nom Mariam zha isa bayas nom o Yakup zha Yusup zha Shamoon zha Yahuda ne e? 56 Kia isa saw babasi homa aya ne an e? dhoyo emi saw isa udreman kawel`a on? 57 To te saw tasa gehenaw dai shuruini magam Isaa tasi kai amaw ki Paygumber tan mulkas zha tan duras sargairo kawai asta Izaat ne griw. 58 Se tasi shesi mondran wajen dai tara hairan hikas bas` krom ne pashaw.