1 Kas akhabir mocas Kai mond de baliki dada joshi nasihat Kari. 2 Juwan baya joshi zhe gada istrizha aya joshi zhe juwan istrizha sapha hardias thara baba joshi. 3 Shate istrizha kas ki sahi mi beruasi nashi an tasi izat kara. 4 Kas istrizhas put yao nawalasi an pe haw to se awel tan durai mocan som prust thi apaw del aria zhe aya dada hak pura karik ciciw aria koki ea Khodayas khosh. 5 Kas ki sahi beruasi ne an zhe warek asta kura ne an se Khodayas thara umeed kariw dai zhe rat adua Khodayas hatya sual kariw dai. 6 Magam kura ki ayashi kariw dai se zinda thi asta nasta. 7 Shesi mondran asta hokum kari ki tasa thara kura mond dek ne bhan. 8 Kura pe tan khas Kai tan durai mocan Khabar ne athan pe haw to se o bhawar karaw moc bhawar ne karawan pe asta badthar. 9 To shatasi mocan mocai neweshin kas ki beru ne an kas ki umbur o tre beshi kawas pe kam zhe tasa o ek mi beru hiw. 10 Se prust krom karikuna mashoor asta. Sudon asta nasihat karaw. Pardesi moc prust Kai mehnu kada. Onjas`ta mocan khur negala. Musibat una mocan madada kad zhe har prust krom karaw. 11 Magam juwan istrizhon kas ki beru nashi an tasi nom mo newesha koki te Masih e khilap una thi naphsas bati ja hik khojin. 12 Phato saza zhun koki te tan awelo bhawar histin dai. 13 Shesa som te dur durai pai kasik asta cicin dai khali micmi ne apaw den dai baliki mond diaw asta hin dai waregin mocai mond asta den dai zhe galat mond asta den dai. 14 Shatalako a shehen` citim dai ki juwan istrizha kas ki beru nashi an te ja hin aria. Tasi azheli hin aria. Duras intizam Karin aria zhe tan dushmanan mond dikas moka mo den aria. 15 Koki bazi o abatha thi shaithanas mond kõ karaw thi an. 16 Kas bhawar karaw istrizhas dura pe shehen istrizha ais pe haw to se tasi madad kariw aria Khodayas bandagan thara boj mo Karin aria ki te shatasi sahi kai madad karik bhan aria kas ki beruasi nashi an. 17 Kurai akhabiran ki prust Kai krom karin dai. Khas Kai ki shate kura ki Khodayas deta mond zhe sabak dikuna mehnat Karin dai shatasi izat kareli. 18 Koki Khodayas Kitab shehen` maw dai ki dracui kasi pai donas ashi mo bhoni zhe krom karaw muzdur moc o tan muzdurias hakdar. 19 Kia ishnarias bati dawa kas buzurgas khilap una aran pe haw tara du tre guah ne aini pe haw to kõ mo kari. 20 Gunah karaw mocas sawin ruaw saza de ki warek asta to pashi behin aria. 21 Khoday zhe Isaa Masih zhe pharishtagan guah kai a tai Kai mam dai ki shesi mondran thara yakeen Kari zhe kia krom kas gehen thi o mo kari. 22 Kas mocas thara ghas baza mo thai zhe waregin gunah una tasi som ek mo hali. Tan soro pak kara. 23 Gheri o khali uk mi o mo pia baliki tan maidas zhe kamzorias bati adek da asta pia. 24 Bazi mocan gunah pashik bas` te sumber mina adalat una zhalin dai bazian o pis`taw thaw hin dai. 25 Shehen`mi bazi prust krom asta pashin karin kurai ki shehen` ne hin dai te lawan asta ne parin.