¹ اے گپّا بزان، که آهری زمانگان گْرانێن وهدَ کاینت۔ ² مردم وتی جندا دۆستَ دارنت، زردۆست، بَٹاکی، گروناک، زاه ءُ بد کنۆک، پت ءُ ماتئے ناپرمان، ناشُگر، ناپاک۔ ‏ ³ بێمِهر، پَهِلّ نکنۆک، بُهتام جنۆک، بێداشْت، زالِم، شرّیئے نپرت کنۆک۔ ⁴ درۆهۆک، بێپرواه ءُ پُرکِبرَ بنت ءُ هُدائے بدلا ائیش ءُ نۆشا دۆستَ دارنت۔ ⁵ زاهرا هُداتُرسَ بنت بلے هما زۆر ءُ واکا نمنّنت که آیان په راستی هُداتُرسَ کنت، ترا گۆن چُشێن مردمان هچّ کار مبیت۔ ⁶ اِشانی نیاما اَنچێن مردم هست که لۆگانی تها پُترنت ءُ هما جنێنان وتی داما دورَ دئینت که نِزۆر اَنت ءُ گناها بار اَنت ءُ هر پئیمێن رَدێن واهگانی گُلام اَنت۔ ⁷ چُشێن جنێن مُدام نۆکێن تالیمانی رَندا کپ اَنت، بلے هچبر راستیا سرپدَ نبنت۔ ⁸ انچۆ که یَنّیس ءُ یَمبْریس موسّائے هلاپ اَت اَنت، همے ڈولا اے رَدێن تالیم دئیۆک هم راستیئے هلاپ اَنت، سلّێن پگر ءُ هیال ءُ دْرۆگێن ایمانئے واهُند اَنت۔ ⁹ بله اے مردم باز دێما شُتَ نکن اَنت، چێا که هرکَس اِشانی اَهمکیا گندیت، انچۆ که یَنّیس ءُ یَمبْریسئے اَهمکی گِندگ بوت۔ ¹⁰ بلے تو منی باروا زانئے، منی سجّهێن تالیم، منی زندئے وڑ ءُ پیم، منی مکسد، ایمان، سَبر، مِهر ءُ سگّ ءُ برداشتئے باروا ۔ ¹¹ هما آزار ءُ سکّی ءُ سۆریانی باروا هم زانئے که اَنتاکیَه ءُ اِکۆنیَه و لِستْرَهئے شهران منی سرا کپت اَنت، من اے آزار سَگّت اَنت ءُ هُداوندا منا چه اے سجّهێنان نِجات دات۔ ¹² هرکس که یسوع مَسیهئے راها هُدایی زندے گوازێنگَ لۆٹیت، آزار دئیگَ بیت۔ ¹³ ءُ بدێن مردم ءُ رد دئیۆک دگران ردَ دئینت ءُ وت ردَ کپنت ءُ رۆچ په رۆچ گَنترَ بنت. ¹⁴ بلے هما چیزّ که تو در بُرتگ‌اَنت ءُ ترا آیانی سرا یَکین اِنت، آیان برجاه بدار چێا که تو زانئے که اے چیزّ تو چه کُجام مردمان در بُرتگ‌اَنت۔ ¹⁵ ترا سرجمێن پاکێن کتابئے زانت چه گْوانزگا گۆن اِنت. اے کتاب ترا سرپد کرتَ کنت که چۆن ترا یسوع مَسیهئے سرا ایمانئے برکتا نجاتَ رسیت۔ ¹⁶ پاکێن کتابئے سجّهێن هبر هُدائیگ اَنت که الهامئے شکلا دێمی داتگ‌اَنت، پاکێن کتاب په تالیم دئیگا، په رَدیانی سرپد کنگ ءُ راست کنگا ءُ په پهرێزکاریئے هێل دئیگا پائِدَگمند اِنت۔ ¹⁷ تانکه هر هُدادۆست په هر پیمێن شَرّێن کارا کابِل ءُ تیار بہ بنت۔