¹ ھما کار پہ مُکدساں بیت منا نبشتہ کنگ ءِ زلورت نہ اِنت۔ ² چیاکہ من سرپداں کہ شما شوک دار اِت پہ اِے کارا پمیشکا من مکدونیہ ءِ مردمانی شمے سرا پھر بستگ کہ اکیہ ءِ مردم پاریگیں آمادہ اَنت گُڑا شمے آمادگی ءَ بازیں مردم ءِ ھب ءُ واھگ پاد آتک۔ ³ من براتان ءَ پمیشکا شمے گور ءَ دیم دات تانکہ ھما پھر کہ من پہ شما بستگ انچائینے مہ بیت شما پکا تیار بہ بیت۔ ⁴ چو مہ بیت کہ مکدونیہ ءِ مردم گوں من بیا اَنت ءُ بِگند اَنت کہ شما آمادہ نہ اِت گڑا مے ءُ شمے ھر دوکینانی سر جھل بیت۔ ⁵ پمیشکا من براتان ءَ ساری ءَ شمے گور ءَ راہ دات ھما سوگات ءَ زودتر امادہ بکن اِت کہ وادا کتگ اَت تانکہ اِے سوگات دلکشیں سوگاتے بہ بیت نادلکشینے مہ بیت۔ ⁶ بلے گپ ایش اِنت ھرکس کم کِش ایت کم رُنت ھرکس باز کِش ایت باز رُنت۔ ⁷ ھرکسی دل چینکس گُشیت ھمینکس بہ دنت، پہ نادلکشی ءُ مجبوری نہ، چیاکہ ھُدایا ھما کس دوست بیت کہ پہ رزا ءُ دلکشی دنت۔ ⁸ ھدا شمے سرا ھر وڑیں پزل کت کنت تانکہ شمے گور ءَ مدام ھر چیز بہ بیت ءُ ھر نیکیں کارے واستا دیما بہ بیت۔ ⁹ انچوکہ نبشتہ اِنت آئی ریتکگ، نیزگارانا داتگ، آئی ءِ راست بازی آبدمان اِنت۔ ¹⁰ ھما ھدا کہ دھکان ءَ پہ کِشگ ءَ توم دنت پہ ورگ ءَ نان دنت، شمارا گیشتر توانا کنت ءُ شمارا راست بازی ءِ شریں مُزّے دنت۔ ¹¹ ھدا شمارا باز برکت دنت تانکہ شما ھر پیما دسپچ بہ بے ءُ مے وسیلہ ءَ ھدائے شگر گزاری بہ بیت۔ ¹² مے اِے ھزمت نہ تنھا ایماندارانی زلورتاں پورہ کنت بلکیں بازینے شگر گزاری ءِ سبب جوڑ بیت۔ ¹³ شمے اِے ھزمت ءِ وجہ ءَ مردم ھدائے ستا ءُ سنایا کن اَنت، کہ شما مسیہ ءِ پرمانبردارے پہ آیان ءُ تیوگیں مردمانی کمک ءَ دسپچ اِت۔ ¹⁴ آ شمے واستا دوا کن اَنت ءُ شمارا لوٹ اَنت چیاکہ شمے سرا ھدائے پزل اِنت۔ ¹⁵ شگر اِنت ھُدائے پہ اِے گران بھائیں سوگات ءَ کہ چہ توسیپ ءَ ڈنّ اَنت۔