¹ ما آئی ءِ ھمکارانی ھساب ءَ گوں شما دزبندی کنیں کہ ھدائے پزل کہ شمے سرا بیتگ آئی زوال مکن اِت۔ ² چیاکہ آ گُش ایت: من کبول کنگ ءِ وھد ءَ تئی گوش داشت ءُ نجات ءِ روچ ءَ تئی کمک کت بچار نوں کبولیت ءِ وھد اِنت ءُ نجات ءِ روچ اِنت۔ ³ ما اِچّ گپ ءِ سرا مان گیشَّگے موہ ندیں تانکہ مے ھزمت ءِ بارہ ءَ کسے بدین گپے مجنت۔ ⁴ چو ھدائے ھزمتکارے پیم ءَ ما ھر کار ءَ وتی اوپار، سکی ءُ سوری ءِ سگگ ءَ پیش داریں ۔ ⁵ اُو لَٹّ ءُ کُٹ، کید ءُ بند ءُ شورشاں، گوں ھزمت ءُ شپ پاسیءُ گُژن ءَ۔ ⁶ گوں پاکیزگی ءُ زانت، گوں سبر ءُ اوپار، گوں مِھربانی ءُ پاکیں روہ ءَ کہ مے دل ءَ اِنت ءُ گوں مِھرا ۔ ⁷ گوں کلامِ ھک ءُ ھدائے زور، گوں راست بازی ءِ سلاھاں کہ مے راستین ءُ چپِّیں دست ءَ اَنت۔ ⁸ اِزت ءُ بے اِزتی ءِ وسیلہ ءَ ءُ وشنامی ءُ بدنامی ءِ وسیلہ ءَ مردم مارا گمراہ گُش اَنت بلے راست اں۔ ⁹ گُم نامانی پیم ءَ ایں بلے نامداریں، مُرتگینانی پیمایں بلے زندگ ایں، لٹ ورکانی پیمایں بلے کُشگ نہ بوتگیں۔ ¹⁰ گمانی دیمپانیں بلے ھر وھد شادانیں، گریب ءُ نیزگاریں بلے بازینے سیر ءُ آباد کنیں، نیزگاریں بلے ھر چیزے واھندیں۔ ¹¹ او کُرنتیاں! ما گوں شما تچک ھبر کتگ ءُ مے دل ساپ اَنت پہ شما۔ ¹² مے دل پہ شما ساپ اَنت بلے شمے دل پہ ما گُگّ اَنت۔ ¹³ شمارا وتی چک لیکین ءُ پہ شما مے دل ساپ اِنت ءُ گوں ما ھما وڑ بکن اِت چوں کہ ما گوں شما کتگ۔ ¹⁴ گوں بے ایمان ءَ یکِّیں جُگ ءِ چیرا مہ بیت، راست بازی ءُ بے دینی یکجاہ بوت نہ کن اَنت، رُژن گوں تھاری ءَ یکجاہ بوت نہ کنت۔ ¹⁵ مسیہ ءُ شیتان ءِ نیام ءَ ھچ ھمشوری نیست یا ایمان دارءَ گوں بے ایمان ءَ چے کار؟ ¹⁶ ھُدائے لوگ ءُ بت یکجاہ نہ بنت چیاکہ ما نمیرانیں ھدائے لوگ ایں انچو کہ ھدایا گوشتگ من ھمایانی نیام ءَ جھمنند ءُ ھمراہ باں، ھمایانی من ھدایاں ءُ آ منی امت۔ ¹⁷ پمیشکا ھداوند گُش ایت : چہ ایشانی نیاما در آیت ءُ جِتا بہ بیت ءُ ناپاکیں چیزاں کار مدار اِت، گُڑا من شمارا کبول کن آں۔ ¹⁸ اُو شمے پت بان ءُ شما منی بچّ ءُ جنگ بیت اِے زورمندیں ھداوند ءِ گُشتانک اَنت۔