¹ چیاکہ ما زانیں وھدے مے گِدان ءِ لوگ کہ زمین ءِ سرا اِنت کروجگ بیت گڑا مارا ھدائے نیمگ ءَ آزمان ءَ یک انچیں ماڑی ئے رس ایت کہ آ انسانی دستاں اڈّ نہ کتگ ءُ آ ابدمانینیں۔ ² ما ایشی تہ ءَ کِتَّگ ءُ نالگ ءَ این، آرزو کنیں کہ وتی آزمانی لوگ ءَ برویں۔ ³ تانکہ اُودے رسگ ءِ وجہ ءَ لوچ مہ بیں۔ ⁴ چیاکہ ما اے گِدان ءِ تہ ءَ گرانیں بار ءِ وجہ ءَ کِتَّگ ءُ نالگ ءَ ایں، پمیشکا نا اے پُچّاں درکنگ لوٹیں بلکیں ایشانی سرا دگا گورا کنگ لوٹیں تانکہ ھلاس بوھوک زندمان ءِ تہ ءَ گار بہ باں۔ ⁵ او ھمائی کہ مارا اے گپّے واستا جوڑ کتگ آ ھدا اِنت کہ وتی وادایانی زمانت ءَ مارا پاکیں روہ ءِ داتگ۔ ⁶ بس ما زانیں تانکہ ما وتی زمینی بدن ءَ ایں چہ ھداوند ءَ گِستا ایں۔ ⁷ چیاکہ ما ایمان ءِ سرا زند گوازینگ ءَ ایں ناکہ چمانی زاھری دیستگیں چیزانی سرا۔ ⁸ مارا وشتر بیت چہ وتی بدن ءِ وتن ءَ جتا بہ باں ءُ ھداوند ءِ وتن ءَ بہ باں۔ ⁹ پمیشکا مارا اے اوپار ھست اِنت کہ وتی بدن ءَ بہ بیں یا ڈنّ ءَ آئرا وشّان بکینیں۔ ¹⁰ چیاکہ الّم ما مسیھے ادالت ءَ پیش کنگ بیں تانکہ ھرکس ءَ وتی بدن ءِ وسیلہ ءَ کتگیں کارانی مز بہ رس ایت شریں بہ بنت یا ھرابیں۔ ¹¹ ما ھدا ترسی ءَ زانیں پمیشکا مردماں سرپد کنیں ھدا مے ھال ءَ شری ءِ زانت ءُ منا امیت اِنت کہ شمے زمیر ھم مارا شری ءَ زانت۔ ¹² ما شمے کرّا وتارا نہ گلائیں ما شمارا موکا دیئیں کہ مے وجہ ءَ پھر بہ بندے تانکہ شما ھمایان ءَ پسّہ دات بکنے کہ زاھر ءِ سرا پھر بہ بنداں باتن ءِ سرا اناں۔ ¹³ اگاں ما گنوکیں ھدائے واستا گنوکیں، اگاں ما سار ایں پہ شما سار ایں۔ ¹⁴ چیاکہ مسیھے مِھر مارا مجبور کنت، پمیشکا ما زانیں یکے کہ پہ تیوگینانی ھاترا مُرت بزاں تیوگین مُرت اَنت۔ ¹⁵ آ پمیشکا تیوگینانی واستا مُرت ھرکس زندگیں چہ اِد ءُ پد پہ وت زندگ مہ بیت پہ ھمائی زندگ بہ بیت کہ پہ آیاں مُرت ءُ پدا زندگ بوت۔ ¹⁶ نوں ما کسّارا دُگنیائی نِزَرا نہ چاریں ما یک وھدے مسیہ دُگنیائی نِزرا چارت بلے نوں چُش نہ کنیں۔ ¹⁷ پمیشکا ھرکس مسیھے راہ ءَ اِنت آ نوکیں مردمے، آئی ءِ کوھنیں چیز ھلاس ءُ نوک بوت اَنت۔ ¹⁸ آ تیوگیں چیز ھدائے نیمگ ءَ اَنت آئی ءَ مسیھے ءِ وسیلہ ءَ مارا گوں وت وشّان کت ءُ سُھل ءُ وشّانی ءِ ھزمتکاری مارا دات۔ ¹⁹ متلب ھدا مسیھے باتن ءَ اَت ءُ دُگنیایی گوں وت وشّان کت، آئی ءَ مردمانی گناہ آیانی جندے سرا نہ دات اَنت، سُھل ءُ وشّان ءِ کلوھے شِنگ کنگے کارے مارا دات۔ ²⁰ ما مسیھے کلوہ بروکیں گُشے مے وسیلہ ءَ ھدا التماس کنگ ءَ اِنت ما چہ مسیھے نیمگ ءَ دزبندی کنیں گوں ھدایا وشّان بہ بیت۔ ²¹ ھما کہ بیگناھے اَت ھدایا پہ مئیگی گناہ آئی ءِ سرا دات اَنت تانکہ آئی ءِ برکتا ھُدائے کرّا راست باز بہ بیں۔