¹ وھدے مے سرا انچیں رھمے بوت کہ مارا اے ھزمتے زمہ داری رست گڑا ما دلپروش نہ بوتیں۔ ² ما وتارا چہ شرمناکیں گپاں دور کت ءُ نہ مکّاری کت نہ ھدائے کلوہ بدل کت، ھدا شاھد اِنت کہ ما راستی ءَ ھچبر چیر نہ دئیں ما وتارا تیوگینانی دیم ءَ پیش کنیں۔ ³ اگاں مے مستاگ اندیم اِنت تباہ بوتگینانی واستا اندیم اِنت۔ ⁴ بزاں ھما بے ایمانانی وجہ ءَ کہ آیانی اگلان ءَ اے جہان ءِ ھدایا کور کتگ اَنت تاکہ مسیح کہ ھدائے سورت اِنت آئی ءِ جلال ءِ مستاگ ءِ رژن آیانی سرا مہ کپ ایت۔ ⁵ چیاکہ ما وتی نہ مسیح یسوع ءِ منادی ءَ کناں آ ھداوند اِنت ءُ وتی بارہ ءَاے وڑ گُش ایت، یسوع ءِ ھاترا شمے گلام اِنت۔ ⁶ ھدایا وت گُشت تھاری ءَ رژن درپشینت ھمائے مے دلانی تہ ءَ درپشینیت تاکہ ما یسوع مسیھئے دیم ءِ رژن ءَ ھُدائے جلال ءَ پجّا بْیاریں۔ ⁷ بلے مے کرّا اے ھزانہ ھاکے رزانانی تہ ءَ اِنت تانکہ اے بلائیں توان چہ مے نیمگ ءَ نہ اِنت بلکیں چہ ھُدائے نیمگ ءَ اِنت۔ ⁸ ما ھر گورا مسیبت سگّیں بلے نہ پرشتگیں ھیران ایں بلے نا امیت نہ ایں۔ ⁹ آزار دئیگ بیں بلے ایوکّ نہ ایں چھ گل دیئگ بیں بلے نہ مِریں۔ ¹⁰ ما را ھر وھد ءَ یسوع ءِ مرگ جان ءَ اِنت ءُ گردیں تانکہ مے بدنا یسوع ءِ زندمان ھم زاھر بہ بیت۔ ¹¹ ما کہ زندگ ایں مدام پہ یسوع ئیگی مرگے دست ءَ دیئگ بیں تانکہ مے جان ءَ یسوع ءِ زند زاھر بہ بیت۔ ¹² ما گوں مرگ ءَ دوچاریں شما زند ءِ بھاران ئے۔ ¹³ چیاکہ مے تہ ءَ ایمان ءِ ھما روہ اِنت کہ آئی ءِ بابت ءَ نبشتہ اِنت ” منا باور اَت پمیشکا ھبر کت“ مے ایمان ھم ھمے ڈولا اِنت گڑا مار ھم باور اِنت پمیشکا ھبر کنیں۔ ¹⁴ چیاکہ ما زانیں ھمائی یسوع ءَ زندگ کت آ مارا گوں یسوع زندگ کنت ، گوں شما مارا وتی دیم ءَ ھازر کنت۔ ¹⁵ پمیشکا تیوگیں چیز شمے واستا اَنت تانکہ بازیں مردمانی وجہ ءَ پزل گیشتر بہ بیت ھدائے جلال ءِ واستا شگر گزاری گیش بہ بیت۔ ¹⁶ پمیشکا ما ھمت دور نا داتگ بلِّ تُرے مے زاھر کوھن ترَّان اِنت، بلے مے باتن ھر روچ نوک بئیان اِنت۔ ¹⁷ چیاکہ مے دمانکی مسیبت مے واستا بلاھیں ءُ ابدمانین جلال جوڑ کن اَنت۔ ¹⁸ مے چم زاھریں چیزاں سکّ نہ اَنت، ھما چیزاں سکّ اَنت کہ گِندگ نہ بنت چیاکہ آ چیز کہ زاھر اَنت، آ لھتیں روچی اَنت بلے نہ دیستگیں چیز ابدمان اَنت۔